រំលឹកពីការចែកផ្លូវរបស់គ្រូបង្វឹកល្បីៗ ជាមួយក្លិបបាល់ទាត់ចំនួន៦ ក្នុងឆ្នាំ២០២១នេះ
- ភ្នំពេញ
រាជធានីភ្នំពេញ ៖ ការប្រកួតបាល់ទាត់ Metphone Cambodia នៅតែបញ្ចប់ដោយភាពអធិកអធម បន្ទាប់ពីមានក្រុមបាល់ទាត់
រាជធានីភ្នំពេញ ៖ ការប្រកួតបាល់ទាត់ Metphone Cambodia នៅតែបញ្ចប់ដោយភាពអធិកអធម បន្ទាប់ពីមានក្រុមបាល់ទាត់
រាជធានីភ្នំពេញ ៖ ការប្រកួតបាល់ទាត់ Metphone Cambodia នៅតែបញ្ចប់ដោយភាពអធិកអធម បន្ទាប់ពីមានក្រុមបាល់ទាត់ជាច្រើនចូលរួមដូចគ្មានការប៉ះទង្គិចជាមួយបញ្ហាជំងឺកូវីដ១៩ ហើយនៅវគ្គចុងក្រោយនៅតែស្វែងរកឃើញក្រុមខ្លាំង គឺក្លិបភ្នំពេញក្រោន ដែលមហាជនទទួលយក ក្លាយជាម្ចាស់ពាន។
យ៉ាងណាក៏ដោយ អ្វីដែលគេសម្គាល់ឃើញគឺក្លិបបាល់ទាត់រហូត៦ក្រុមផ្សេងគ្នា ត្រូវគេឃើញមានការបាក់បែកជាមួយគ្រូបង្វឹកនៅក្នុងរដូវកាលនៃការប្រកួតមួយនេះ ដែលអាចចាត់ទុកថាគឺការកត់សម្គាល់មួយថ្មី ក្នុងប្រវត្តិសាស្ត្របាល់ទាត់ ដែលមានក្រុមបាល់ទាត់ច្រើនបំផុតចែកផ្លូវជាមួយគ្រូបង្វឹក។
តាំងពីដើមរដូវកាលរហូតដល់ចុងបញ្ចប់រដូវកាល គ្រូបង្វឹកដែលបានចែកផ្លូវជាមួយក្លិបទាំង៦នោះរួមមាន ១-ក្លិបសូលទីឡូអង្គរបានប្រកាសចែកផ្លូវគ្នាជាមួយគ្រូបង្វឹកលោក Darren Pomroy ហៅ Charlie ហើយ បន្ទាប់ពីលោកបានដឹកនាំក្រុមបរាជ័យ ៥ប្រកួតជាប់គ្នានាដើមរដូវកាលឆ្នាំ២០២១។ នេះបើតាមការបញ្ជាក់របស់ក្រុមមានមូលដ្ឋាននៅខេត្តសៀមរាប មួយនេះ តាំងពីព្រឹកថ្ងៃទី០១ ខែកក្កដា ឆ្នាំ២០២១។ ជាមួយការចែកផ្លូវគ្នាពាក់កណ្ដាលផ្លូវខាងលើនេះ លោក Charlie បានសម្ដែងការសោកស្ដាយ និងខកចិត្តជាខ្លាំងក្រោយការចាប់ផ្ដើមមិនបានល្អ ក្នុងការប្រកួតលីគកំពូលកម្ពុជា ឆ្នាំ២០២១ បន្ទាប់ពីលោកបានធ្វើការអស់រយៈពេល ៨ខែ និងបានដឹកនាំការប្រកួតផ្លូវការចំនួន ៥លើកកន្លងមក។
គ្រូបង្វឹកសញ្ជាតិអង់គ្លេសរូបនេះបានបញ្ជាក់ថា «វាគឺជាការសម្រេចចិត្តដ៏លំបាកមួយសម្រាប់ខ្ញុំ និងខកចិត្តជាខ្លាំងចំពោះលទ្ធផលដែលធ្វើមិនបានល្អ»។
២-ក្លិបបាល់ទាត់វិសាខា បានប្រកាសចែកផ្លូវជាមួយគ្រូបង្វឹកអៀឡង់ លោក Colum Curits តាំងពីពេលដែលក្រុមមួយនេះ ស្ថិតក្នុងការប្រកួតខ្លាំង ក្នុងក្របខណ្ឌលីគកំពូលកម្ពុជា ឆ្នាំ២០២១ ។ ការប្រកាសចែកផ្លូវគឺបានធ្វើឡើង បើទោះជាលោកគ្រូ Colum Curtis បានចូលរួមជាមួយក្រុមវិសាខា កាលពីដើមរដូវកាលឆ្នាំ២០២០ ហើយជួយឲ្យក្រុមទទួលបានត្រឹមចំណាត់ថ្នាក់លេខ៥ ក្នុងលីគ និងគ្រងជើងឯកពានសម្ដេចតេជោ ហ៊ុន សែន ថ្នាក់ជាតិជាប្រវត្តិសាស្ដ្ររបស់ខ្លួន។
៣-ក្លិបបាល់ទាត់ណាហ្គាវើល បានប្រកាសជាផ្លូវការថា លោក មាស ចាន់ណា ត្រូវបានចាកចេញពីក្លិបកាលចុងខែតុលា ឆ្នាំ២០២១ បន្ទាប់ពីកិច្ចសន្យារបស់លោកត្រូវបានផុតកំណត់។ ក្លិបបាល់ទាត់ណាហ្គាវើល បានថ្លែងអំណរគុណចំពោះលោកដែលបានបំពេញការងារសម្រាប់ក្លិបកន្លងមក ទាំងជាកីឡាករ និងជាគ្រូបង្វឹកផងរយៈពេល២០ឆ្នាំ។ ក្លិបក៏បានជូនពរឱ្យគាត់បន្តទទួលបានជោគជ័យ ក្នុងអាជីពជាគ្រូបង្វឹកនាពេលអនាគតផងដែរ។
លោក មាស ចាន់ណា មានបទពិសោធក្នុងវិស័យបាល់ទាត់ប្រមាណ ២០ឆ្នាំជាមួយណាហ្គាវើល (១៣ឆ្នាំជាកីឡាករ និង៧ឆ្នាំជាគ្រូបង្វឹក)។ លោកគ្រូធ្លាប់ជាអតីតកីឡាករឆ្នើមមួយរូបដែលពាក់ស្លាកលេខ៧និងជាប្រធានក្រុមផងដែរ។ អតីតកីឡាករក្រុម NagaWorld រូបនេះពូកែខាងលើបាល់ចូលប្រអប់គ្រោះថ្នាក់ ក៏ដូចជាការលើកបាល់ជ្រុងនិងការទាត់បាល់ហ្វ្រីឃីក។ ក្រោយការប្រកាសរបស់ក្លិប លោក មាស ចាន់ណា បានសរសេរបែបនេះនៅលើបណ្ដាញសង្គម៖ «បងសូមអរគុណដល់ប្អូនៗដែលជាកីឡាករណាហ្គាវើលទាំអស់ដែលយើងបានរួមរស់ជាមួយគ្នា ហត់នឿយជាមួយគ្នា សប្បាយជាមួយគ្នា តែពេលនេះជាពេលវេលាដែលយើងត្រូវបែកគ្នា បាល់ទាត់តែប៉ុណ្ណឹង សូមប្អូនៗបន្តការហ្វឹកហាត់អោយបានល្អដើម្បីអាជីពបាល់ទាត់» ។
៤-លោក មាស សំអឿន គ្រូបង្វឹកក្រុមអគ្គីសនីកម្ពុជា បានប្រកាសលាលែងចាកចេញពីតំណែងពីក្រុម កាលពីរសៀលថ្ងៃអង្គារ ទី ២៣ ខែវិច្ឆិកា ឆ្នាំ ២០២១ ដោយអតីតគ្រូបង្វឹកក្រុមបៀលប្រាយយូណាយធីត វេស្ទើនភ្នំពេញ រូបនេះបានបញ្ជាក់ថា «ពេលនេះ ខ្ញុំ មាស សំអឿន បានបញ្ចប់កុងត្រាជាមួយក្រុមអគ្គីសនីកម្ពុជា ជាចុងក្រោយ ខ្ញុំសូមជូនពរឱ្យក្រុមអគ្គីសនីកម្ពុជា នឹងមានការរីកចម្រើនទៅអនាគត»។
៥-ក្លិបបាល់ទាត់អង្គរថាយហ្គឺរ បានប្រកាសចែកផ្លូវជាមួយគ្រូបង្វឹកសញ្ជាតិអេស្ប៉ាញលោក Oriol Segura បន្ទាប់ពីដឹកនាំក្រុមអស់រយ:ពេល៤ឆ្នាំ ពោលគឺចាប់ពីឆ្នាំ២០១៧-២០២១ សរុប១០០ប្រកួតគត់។
៦-ក្លិបបាល់ទាត់កងយោធពលខេមរភូមិន្ទ បានសម្រេចសម្រេចបញ្ចប់កិច្ចសន្យាជាមួយលោក Lee Tae-hoon មុនពេលកំណត់ បន្ទាប់ពីដឹកនាំក្រុមបង្ហាញទម្រង់លេងមិនសូវបានល្អ។
គួរបញ្ជាក់លោក Lee Tae Hoon ត្រូវបានក្លិបកងយោធពលខេមរភូមិន្ទ ប្រកាសតែងតាំងជាគ្រូបង្គោលនៅថ្ងៃទី០១ ខែមិថុនា ឆ្នាំ២០២១ ជាមួយកិច្ចសន្យារយៈពេល២ឆ្នាំ ខណ:គ្រូបង្វឹកសញ្ជាតិកូរ៉េខាងត្បូងរូបនេះទើបតែដឹកនាំក្រុមបានត្រឹមតែ៥ខែកន្លះប៉ុណ្ណោះ ៕
ចែករំលែកព័តមាននេះ