រាជធានីភ្នំពេញ ៖ ប្រាសាទបុរាណខ្មែរបានបង្កប់ដោយរឿងរាវជាច្រើនដែមនុស្សមិនសូវបានដឹង ។ អ្នកបានទៅទស្សនាអង្គរវត្ត ភាគច្រើនមិនបានអានស្រាវជ្រាវឯកសារជាមុន ដូច្នេះមិនបានដឹងរឿងរាវទាំងនោះឡើយ ។ អ្នកទៅអង្គរបានស្គាល់ត្រឹមរូបរាងខាងក្រៅប្រាសាទប៉ុណ្ណោះ លោក សុខ សុក្រឹត្យា រដ្ឋលេខាធិការក្រសួងទេសចរណ៍បានលើកទ្បើងថា បើអ្នកទេសចរទៅលេងខេត្តសៀមរាប គេតែងតែនឹកឃើញមុនគេ គឺប្រាសាទអង្គរវត្ត ។ ប៉ុន្តែលោកថា នៅតំបន់នេះមិនមែនមានតែការទស្សនាប្រាសាទតែមួយប៉ុណ្ណោះទេ គឺមានទីកន្លែងកម្សាន្តរាប់មិនអស់ជាច្រើនទៀត ។
លោកបញ្ជាក់ថា អ្នកទេសចរដែលចូលកម្សាន្តប្រាសាទអង្គរវត្តកន្លងមកភាគច្រើនបានត្រឹមតែមើលប្រាសាទ តែមិនបានស្គាល់អ្វីដែលស៊ីជម្រៅជាងនេះនៅឡើយទេ ។ កម្ពុជាបានកំពុងគិតដល់ពីវិស័យទេសចរណ៍បែបជំនឿសាសនា ហើយក្រសួងទេសចរណ៍ កំពុងលើកគម្រោងនេះឡើង ។ លោកបញ្ជាក់ថា បន្ទាប់ពីនេះទៅយើងនឹងដាក់នូវគោលការណ៍ពីការដែលអ្នកទេសចរចូលមកកម្សាន្តនៅប្រាសាទអង្គរវត្ត តើពួកគាត់មកដើម្បីអ្វី ? យើងនឹងបន្ថែមសកម្មភាពនៅកន្លែងឱ្យបានច្រើន ហើយណែនាំដល់អ្នកទេសចរ ឱ្យបានដឹងពីការដែលចូលមកកម្សាន្តនៅខេត្តនេះ និងបានទៅកាន់ទីនោះឱ្យបានច្បាស់លាស់ និងពីអ្វីដែលគេចង់បាន ។
លោក សុខ សុក្រឹត្យា បានលើកឡើងដូច្នេះទៅកាន់បណ្តាញសារព័ត៌មានថៃ នៅពេលលោកបានបំពេញទស្សនកិច្ចនៅប្រទេសជិតខាងនេះ ក្នុងគោលបំណងទាក់ទាញអ្នកទេសចរ និងអ្នកវិនិយោគថៃ ចូលមកកម្ពុជាកាន់តែច្រើន ។ លោកថា ក្រោយកម្ពុជាសម្រេចបានជោគជ័យនូវយុទ្ធសាស្ត្រវ៉ាក់សាំងកូវីដ ១៩ ជាឱកាសល្អសម្រាប់អ្នកវិនិយោគ ក្នុងការទៅវិនិយោគលើវិស័យទេសចរណ៍ក្នុងប្រទេសកម្ពុជា ដោយមានការគាំពារ និងលើកទឹកចិត្តខ្ពស់ពីរាជរដ្ឋាភិបាល ។ ផ្តើមពីនោះលោក ក៏បានលើកបង្ហាញពីការអភិវឌ្ឍវិស័យហេដ្ឋារចនាសម្ព័ន្ធ មានភាពប្រទាក់ក្រឡាគ្នាពីទីក្រុង ដល់ជនបទ ដែលជួយឱ្យការធ្វើដំណើរកម្សាន្តនៅកម្ពុជា អាចធ្វើដំណើរទៅគ្រប់ទីកន្លែងដោយងាយស្រួលផងដែរ ។
មន្ត្រីជាន់ខ្ពស់ក្រសួងទេសចរណ៍ បានអំពាវនាវដល់ពលរដ្ឋថៃ ទៅសម្រាកកម្សាន្តនៅប្រទេសកម្ពុជា ហើយក៏បានលើកទឹកចិត្តដល់អ្នកវិនិយោគរបស់ថៃ ទៅវិនិយោគលើវិស័យទេសចរណ៍នៅក្នុងប្រទេសកម្ពុជាផងដែរ ព្រោះកម្ពុជា មានគោលនយោបាយជំរុញការអភិវឌ្ឍលើវិស័យទេសចរណ៍ប្រកបដោយភាពប្រាកដនិយម និងការទាក់ទាញ ។ លោកបានបញ្ជាក់ថា ប្រាសាទអង្គវត្តមានប្រវត្តិយូរលង់ ហេតុនេះមានរឿងរ៉ាវជាច្រើនដែលអ្នកទេសចរចូលមកហើយគួរមានការសិក្សាស្វែងយល់ពីគម្រោងការដើរកម្សាន្តឱ្យបានច្បាស់លាស់ ។
ផ្នែកទេសចរណ៍កម្ពុជា និងថៃ បានបង្កើតគម្រោងនាំចូលអ្នកទេសចរថៃ តាមផ្លូវអាកាស ផ្លូវគោក និងផ្លូវទឹក ដែលគម្រោងការនេះ អាចចាប់ផ្តើមបញ្ជូនភ្ញៀវទៅវិញទៅមកនៅខែកុម្ភៈ ឆ្នាំ ២០២២ ខាងមុខ លោក សុក្រិត្យា អះអាងថា នឹងធ្វើការងារជាមួយប្រតិបត្តិករទេសចរណ៍ថៃ ក្នុងរឿងនេះដើម្បីរៀបចំកញ្ចប់ទេសចរពីថៃមកកម្ពុជា ៕
ចែករំលែកព័តមាននេះ