រាជធានីភ្នំពេញ ៖ អ្នកនាំពាក្យរដ្ឋសភាលោក ឡេង ប៉េងឡុង បានសម្តែងសុទិដ្ឋិនិយមចង់ឃើញក្រុមអ្នកតំណាងរាស្ត្រភាគច្រើនមកពីគណបក្សប្រជាជនកម្ពុជា(CPP) និងក្រុមតំណាងរាស្ត្រភាគីតិចមកពីគណបក្សសង្គ្រោះជាតិ(CNRP) ចូលតុពិភាក្សាដោះស្រាយបញ្ហានយោបាយរួមគ្នាតាមរយៈវប្បធម៌សន្ទនា ។
ការចង់ឃើញជំនួបចរចាទ្វេភាគីនេះ បន្ទាប់ពីអ្នកនាំពាក្យគណបក្សប្រជាជនកម្ពុជា ធ្លាប់បានប្រកាសបើកភ្លើងខៀវឱ្យគណបក្សសង្គ្រោះជាតិជួបចរចាតាមរយៈអគ្គលេខាធិការរដ្ឋសភា។ ប៉ុន្តែបើតាមអ្នកនាំពាក្យរដ្ឋសភាថា រហូតមកដល់ពេលនេះ ខាងគណបក្សសង្គ្រោះជាតិមិនមានធ្វើលិខិត ក៏ដូចជាសំណើណាមួយមកកាន់អគ្គលេខាធិការដ្ឋានរដ្ឋសភានោះទេ ។
លោក ឡេង ប៉េងឡុង បានប្រាប់អ្នកសារព័ត៌មាននាព្រឹកថ្ងៃទី១៩ ខែឧសភា នៅវិមានរដ្ឋសភាថា លោកចង់ឱ្យគណបក្សប្រជាជនកម្ពុជានិងគណបក្សសង្គ្រោះជាតិចរចាគ្នា ដើម្បីដោះស្រាយបញ្ហានយោបាយរួមគ្នា កុំយកខ្មែរជាសត្រូវ ។
លោកគូសបញ្ជាក់ថា «ខ្ញុំយល់ឃើញថាការជួបចរចាគ្នាជាការល្អ ការស្រុះស្រួលគ្នាជាការល្អ ស្រុះស្រួលគ្នារវាងខ្មែរនិងខ្មែរជាការល្អ ហើយចង់ឲ្យស្រុះស្រួលគ្នាជួបចរចាគ្នាជាការល្អ ។ អាហ្នឹដើម្បីផលប្រយោជនខ្មែរទាំងអស់គ្នាដើម្បីបម្រើដល់ជនជាតិខ្មែរទាំងអស់ »។
ជាមួយគ្នានេះ លោក ឡេង ប៉េងឡុង បានឱ្យដឹងថា រដ្ឋសភាកំពុងរង់ចាំសំណើពីក្រសួងយុត្តិធម៌ ។ លោកបញ្ជាក់ថា «តាមច្បាប់សភាត្រូវតែយកមកពិនិត្យ តែខ្ញុំមិនបានចាំទេ ។ ប៉ុន្តែច្បាប់ចែងថា ទាល់តែមានការស្នើសុំរបស់ក្រសួងយុត្តិធម៌ ទើបយកមកពិនិត្យបាន» ។
ទោះបីជាមានសំណួរថា តើបទបញ្ជាផ្ទៃក្នុងរដ្ឋសភាមានចំណុចណាមួយអាចឱ្យរដ្ឋសភាព្យួរ ឬឱ្យតុលាការនាំខ្លួនសមាជិកសភាក្នុងការគេចវេះមិនចូលតុលាការ? លោក ឡេង ប៉េងឡុង ថ្លែងថា បទបញ្ជាផ្ទៃក្នុងរដ្ឋសភាធ្វើឡើងដើម្បីដំណើរការរដ្ឋសភា ។ ចំពោះដំណើររឿងក្តីមានច្បាប់ផ្សេងៗដូចជា ច្បាប់រដ្ឋធម្មនុញ្ញ ច្បាប់ព្រហ្មទណ្ឌ ជាដើម ។
លោក ឡេង ប៉េងឡុង លើកឡើងទៀតថា ប្រសិនបើមានសំណើពីក្រសួងយុត្តិធម៌នោះ រដ្ឋសភានឹងពិនិត្យ ហើយពេលនេះរដ្ឋសភាកំពុងរង់ចាំលិខិតជាផ្លូវការរបស់ក្រសួងយុត្តិធម៌ដាក់ជូនរដ្ឋសភាក្នុងការសម្រេចថា ដក ឬព្យួរអភ័យឯកសិទ្ធិលោក កឹម សុខា សមាជិកសភា និងជាប្រធានស្តីទីគណបក្សសង្គ្រោះជាតិនោះ ។
ទោះបីជាភាគីគណបក្សប្រជាជនកម្ពុជាធ្លាប់បានប្រកាសថា បើកទ្វារចំហសម្រាប់ការចរចាជាមួយគណបក្សសង្គ្រោះជាតិកាលពីពេលថ្មីៗនេះយ៉ាងណាក្តី ក៏លោក ឡេង ប៉េងឡុង អ្នកនាំពាក្យរដ្ឋសភាថ្លែងថា រហូតមកដល់ពេលនេះមិនឃើញគណបក្សសង្គ្រោះជាតិទាក់ទង ឬធ្វើការចរចាជាមួយគណបក្សប្រជាជននៅឡើយទេ ។
មន្ត្រីជាន់ខ្ពស់គណបក្សសង្គ្រោះជាតិ ធ្លាប់បានលើកឡើងថា គណបក្សមិនទាន់ដាក់សំណើដើម្បីពិភាក្សាជាមួយគណបក្សប្រជាជនកម្ពុជានោះទេ ។ ប៉ុន្តែបើមានការចរចាមែននោះ មានករណីការចាប់ខ្លួន ការឃុំខ្លួនរបស់ស្ថាប័នតុលាការលើសមាជិកសភាទាំងរំលោភច្បាប់ គឺនៅមានអភ័យសិទ្ធិ ។
ការចង់ឱ្យមានជំនួបចរចារវាងតំណាងក្រុមភាគច្រើននិងភាគតិចក្នុងសភា គឺបន្ទាប់ពីអ្នកវិភាគមួយចំនួនយល់ឃើញថា ស្ថានភាពនយោបាយនៅក្នុងប្រទេសកម្ពុជាកំពុងតែឡើងកម្តៅ។ ពិសេសនោះ ការឃុំខ្លួនសមាជិកសភាគណបក្សប្រឆាំង និងការចាប់ខ្លួនមន្ត្រីអង្គការសង្គមស៊ីវិលនាពេលកន្លងមក ៕
ចែករំលែកព័តមាននេះ