រាជធានីភ្នំពេញ ៖ ធ្លាប់មានការលំបាក និងការតស៊ូតាំងពីកុមារភាពលើវិថីសិល្បៈរហូតមានមុខនាពេលបច្ចុប្បន្ននេះ តារាចម្រៀងនាង សួស វីហ្សា បានប្រកាសថានឹងធ្វើរឿងមួយចំពោះលោកគ្រូ អ្នកគ្រូ ដែលធ្លាប់បង្ហាត់បង្រៀនរូបនាងទាំងបុរាណ និងសម័យ។ ហើយអ្វីដែលតារារូបនេះ នឹងធ្វើ គឺនាងនឹងស្វែងរកលោកគ្រូ អ្នកគ្រូចាស់ៗរបស់នាង ដើម្បីជាការគោរពនឹងដឹងគុណចំពោះពួកគាត់ ខណៈពេលនាងធ្លាប់សន្យានឹងធ្វើរឿងមួយនេះ នៅពេលនាងបានធូរធារ។
ជាមួយនឹងរូបភពកាលពីកុមារភាពពេលកំពុងហាត់របាំ តារាចម្រៀងនាង សួស វីហ្សា បានភ្ជាប់ជាមួយនឹងសារបង្ហោះតាមហ្វេសប៊ុកថា «អតីតកាលរបស់ខ្ញុំ ខ្ញុំធ្លាប់ត្រឹមតែជាក្មេងស្រីរាំរបាំបុរាណម្នាក់ ទាំងតូច ទាំងស្គម ទាំងខ្មៅ ទាំងក្រ ទាំងលំបាក កាលនោះត្រូវបែងចែកពេលវេលារៀនសូត្រផង និងយកពេលមកហាត់របាំផង ហើយឆ្លៀតរត់ទៅរៀនច្រៀងទៀត ហេតុតែចង់រកលុយជួយគ្រួសារ»។
នាងបញ្ជាក់ថា «ដោយសារតែខ្ញុំកើតមក ខ្ញុំមាននិស្ស័យជាមួយសិល្បៈ មិនថាសិល្បៈផ្នែកបុរាណ និងសម័យ ខ្ញុំមានដុងនឹងស្រលាញ់តាំងពីកំណើត ទើបធ្វើអោយខ្ញុំខិតខំប្រឹងប្រែងហាត់រៀនតាំងតែពីតូចអស់រយៈពេលជាង១០ឆ្នាំប្លាយ។ ចង់ប្រាប់ថា បើគ្មានសិល្បៈទេ ខ្ញុំក៏គ្មានថ្ងៃនេះដែរ ដោយសារសិល្បៈទើបធ្វើអោយខ្ញុំមានថ្ងៃនេះ ខ្ញុំមិនភ្លេចគុណអ្នកទេ ខ្ញុំនឹងចងចាំអ្នកអស់មួយជីវិត (សិល្បៈបុរាណ & សិល្បៈសម័យ)»។
សួស វីហ្សា បានលើកឡើងថា «ខ្ញុំក៏មិនដែលភ្លេចគុណលោកគ្រូ អ្នកគ្រូរបាំរបស់ខ្ញុំដែរ ខ្ញុំធ្លាប់សន្យានឹងខ្លួនឯងថា បើពេលណាមួយខ្ញុំធូរធារ ខ្ញុំអាចមានលទ្ធភាព ខ្ញុំនឹងស្វែងរកពួកគាត់ដើម្បីធ្វើការគោរពដឹងគុណគាត់»។
បើតាម សួស វីហ្សា បន្តទៀតថា «(ខ្ញុំនឹងប្រកាសស្វែងរកលោកគ្រូ អ្នកគ្រូដ៏កំសត់របស់ខ្ញុំទាំងអស់ក្នុងពេលឆាប់ៗខាងមុខនេះ នេះជាក្តីប្រាថ្នារបស់ខ្ញុំចំពោះអ្នកមានគុណខ្ញុំ) ជួបគ្នាក្នុងពេលឆាប់ៗ លោកគ្រូ អ្នកគ្រូ អ្នកមានគុណទីពីររបស់កូន»។
ជាការកត់សម្គាល់ រហូតមកទល់នាពេលនេះ សួស វីហ្សា មិនទាន់ឈានជើងឡើងឆាកតន្ត្រីជាថ្មីឡើងវិញនៅឡើយទេ ចាប់តាំងពីនាងបានជាសះស្បើយពីជំងឺកូវីដ១៩។ មូលហេតុដែលមិនទាន់ឡើងឆាកជាថ្មីនោះ គឺដោយសារនាងកំពុងតែជាប់ដៃរកស៊ីជាមួយស្វាមី ដោយនៅពេលនេះ នាងបានបោះទុនខ្ទង់លានដុល្លារកស៊ីលើជំនួញជាច្រើននៅក្នុងដៃ។
ទោះជាយ៉ាងណា តារារូបនេះនៅតែអះអាងថា ខ្លួននឹងមិនបោះបង់អាជីពចម្រៀងនេះដោយងាយៗនោះឡើយ ដោយសារនាងបានតស៊ូលើវិថីនេះអស់ជាច្រើនឆ្នាំទម្រាំមានថ្ងៃនេះ។ សួស វីសា ក៏សន្យាថា នាងនឹងរកពេលវេលាណាមួយវិលមកឆាកតន្ត្រីបង្ហើរសំនៀងជូនទស្សនិកជន ជាពិសេសប្រិយមិត្តគាំទ្រជាថ្មីឡើងវិញ៕
ចែករំលែកព័តមាននេះ