ដើម្បីពង្រឹងគុណភាពផ្លូវ និងត្រួតពិនិត្យយានយន្តដែលដឹកលើសទម្ងន់នៅតាមដងផ្លូវ ក្រសួងសាធារណការ និងដឹកជញ្ជូន បានចុះល្បាតដាក់ជញ្ជីងចល័តតាមដងផ្លូវ ហើយជាក់ស្តែងនៅ
ខេត្តស្វាយរៀង ៖ ដើម្បីពង្រឹងគុណភាពផ្លូវ និងត្រួតពិនិត្យយានយន្តដែលដឹកលើសទម្ងន់នៅតាមដងផ្លូវ ក្រសួងសាធារណការ និងដឹកជញ្ជូន បានចុះល្បាតដាក់ជញ្ជីងចល័តតាមដងផ្លូវ ហើយជាក់ស្តែងនៅព្រឹកថ្ងៃទី០៧ ខែធ្នូ ឆ្នាំ២០២១នេះ កម្លាំងជញ្ជីងចល័ត បានចុះត្រួតពិនិត្យផ្លូវលេខ១៨ (ប្រសូត-កំពង់រោទិ៍) ត្រង់ចំណុចភូមិពោធិ៍តាវង្ស ឃុំប្រសូត្រ ស្រុកស្វាយទាប ខេត្តស្វាយរៀង។
ក្រុមការងារគណៈកម្មាធិការសម្របសម្រួលអចិន្ត្រៃដឹកនាំត្រួតពិនិត្យយានយន្តដឹកលើសទម្ងន់កម្រិតកំណត់ បានដឹកនាំកម្លាំងជញ្ជីងចល័ត សហការជាមួយមន្ទីរសាធារណការ និងដឹកជញ្ជូនខេត្តស្វាយរៀង ចុះត្រួតពិនិត្យរាល់យានយន្តធុនធំដែលដឹកលើសទម្ងន់ ហើយបើកគេចស្ថានីយជញ្ជីងផ្លូវជាតិលេខ១ ដើម្បីផាកពិន័យ។
លោកអ៊ុយ សម្បត្តិ អនុប្រធានលេខាដ្ឋានគណៈកម្មាធិការសម្របសម្រួលអចិន្ត្រៃដឹកនាំត្រួតពិនិត្យ យានយន្តដឹកលើសទម្ងន់កម្រិតកំណត់ បានឲ្យដឹងថា ក្នុងកិច្ចប្រតិបត្តិត្រួតពិនិត្យរថយន្តដឹកលើសទម្ងន់ចរាចរណ៍លើដងផ្លូវជាតិលេខ១៨នេះ យើងសង្កេតឃើញមានរថយន្តដឹកខ្សាច់ និងរថយន្តដឹកស្រូវជាដើម ដោយឡែករថយន្តភាគច្រើនគឺបានចូលរួមគោរព និងអនុវត្តច្បាប់លើសទម្ងន់បានយ៉ាងត្រឹមត្រូវតាមទម្ងន់ដឹកជញ្ជូន។
លោកអ៊ុយ សម្បត្តិ អនុប្រធាន បានបន្ថែមទៀតថា សូមឱ្យបងប្អូនប្រជាពលរដ្ឋដែលប្រកបមុខរបររកស៊ីដឹកទំនិញលើសទម្ងន់កំណត់ទាំងអស់ សូមមេត្តាចូលរួមសហការជាមួយក្រុមការងារគណៈកម្មការសម្របសម្រួលអចិន្ត្រៃយ៍ដឹកនាំត្រួតពិនិត្យ និងអាជ្ញាធរសមត្ថកិច្ច ជាពិសេសសូមឱ្យបងប្អូនប្រជាពលរដ្ឋទាំងអស់ចូលរួមគោរពច្បាប់ចរាចរណ៍ផ្លូវគោកអោយបានគ្រប់ៗគ្នា។
ជាលទ្ធផល ក្នុងប្រតិបត្តិការចុះត្រួតពិនិត្យផ្លូវជាតិលេខ១៨ (ប្រសូត-កំពង់រោទិ៍) ក្នុងស្រុកស្វាយទាបខាងលើ បានឃាត់រថយន្តឲ្យថ្លឹងជាច្រើនគ្រឿង ហើយក៏រកឃើញមានរថយន្តចំនួន៤គ្រឿង ដែលដឹកខ្សាច់ និងស្រូវ បានផ្ទុកហួសចំនួនកំណត់ និងត្រូវពិន័យជាប្រាក់តាមច្បាប់សាធារណការផងដែរ៕
ចែករំលែកព័តមាននេះ