វៀតណាមបើកឲ្យប្រជាជនចូលធ្វើការនៅកម្ពុជាវិញ តែចំពោះពលរដ្ឋមួយចំនួន(វីដេអូ)
- ស្វាយរៀង
ភាគីវៀតណាម បានបើកឲ្យប្រជាជនចូលមកធ្វើការ និងប្រកបមុខរបររកស៊ីនៅប្រទេសកម្ពុជាសាជាថ្មីវិញហើយក្នុងខែធ្នូនេះ ចំពោះប្រជាជនណាដែលបាន
ខេត្តស្វាយរៀង ៖ ភាគីវៀតណាម បានបើកឲ្យប្រជាជនចូលមកធ្វើការ និងប្រកបមុខរបររកស៊ីនៅប្រទេសកម្ពុជាសាជាថ្មីវិញហើយក្នុងខែធ្នូនេះ ចំពោះប្រជាជនណាដែលបានចាក់វ៉ាក់សាំងការពារជំងឺកូវីដ១៩ គ្រប់ដូស។
បើតាមមន្ត្រីច្រកទ្វាព្រំដែនអន្តរជាតិបាវិត ក្រុងបាវិត បានឲ្យដឹងនៅព្រឹកថ្ងៃទី៧ ខែធ្នូ ឆ្នាំ២០២១ នេះថា មានប្រជាជនវៀតណាម ចូលមកកម្ពុជា តាមច្រកទ្វារព្រំដែនអន្តរជាតិបាវិតនៅដើមខែធ្នូ ឆ្នាំ២០២១នេះ ជាបណ្តើរៗហើយ បើគិតចាប់ពីថ្ងៃទី១ ខែធ្នូ រហូតមកដល់ព្រឹកថ្ងៃទី៧ ខែធ្នូនេះ គឺសរុបជាង១,០០០នាក់ ក្នុងនោះមានទិដ្ឋាការតាមរយៈក្រុមហ៊ុនចូលមកធ្វើការជាបុគ្គលិកក្រុមហ៊ុន និងមានអ្នកមកជាភ្ញៀវទេសចរណ៍ផងដែរ។
លោកង៉ូវ សុខា មន្ត្រីចត្តាឡីស័កនៃមន្ទីរសុខាភិបាលខេត្តប្រចាំនៅច្រកទ្វារព្រំដែនអន្តរជាតិបាវិត បានឲ្យដឹងថា ដោយអនុវត្តតាមប្រសាសន៍សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាល បានផ្តល់អនុសាសន៍នៅថ្ងៃទី១៥ ខែវិច្ឆិកា ឆ្នាំ២០២១ កន្លងទៅថា អនុញ្ញាតិឲ្យភ្ញៀវបររទេសចូលមកព្រះរាជាណាចក្រកម្ពុជា គឺអ្នកបានចាក់វ៉ាក់សាំងការពារជំងឺកូវីដ១៩ ពេញលេញ «គ្រប់ដូស»។ ហើយចំពោះជនបររទេស ដែលជាជនជាតិវៀតណាម តាមច្រកទ្វារព្រំដែនអន្តរជាតិបាវិត គឺទី១- បានចាក់វ៉ាក់សាំងការពារជំងឺកូវីដ-១៩ ពេញលេញគ្រប់ដូស ។ ទី២- មានលិខិត ធ្វើតេស្តិ៍ CPR ចេញដោយវេជ្ជបណ្ឌិតប្រទេសវៀតណាមក្នុងរយៈពេល៧២ម៉ោង។
មន្ត្រីដដែលបន្តទៀតថា ក្រោយពីពិនិត្យឃើញឯកសារទាំង២នេះរួច មន្ត្រីនគបាលអន្តោប្រវេសន៍ច្រកទ្វារព្រំដែនអន្តរជាតិបាវិត បានបញ្ជូនជនបរទេសទាំងនោះ មកមន្ត្រីជំនាញចត្តាឡីស័ក ដើម្បីពិនិត្យធ្វើតេស្តិ៍រហ័សម្តងទៀត បើអវិជ្ជមាន គឺអនុញ្ញាតិឲ្យធ្វើដំណើរចូលទៅតាមគោលដៅនៅក្នុងព្រះរាជាណាចក្រកម្ពុជា ប៉ុន្តែបើវិជ្ជមានកូវី-១៩វិញ គឺបញ្ជូនទៅប្រទេសវៀតណាមវិញភ្លាមៗតែម្តង។
មន្ត្រីដដែលបន្តទៀតថា ក៏ប៉ុន្តែប្រសិនបើភ្ញៀវជនបរទេសណា ចង់ស្នាក់នៅព្យាបាលនៅក្នុងប្រទេសកម្ពុជា គឺត្រូវបង់ប្រាក់សម្រាប់ការព្យាបាល ដោយក្នុងម្នាក់២,៥០០ដុល្លារទៅ៣,០០០ដុល្លារសហរដ្ឋអាមេរិក។ ចំពោះជនបរទេសដែលចាក់វ៉ាក់សាំមិនគ្រប់ និងគ្មានលិខិតបញ្ជាក់ការធ្វើតេស្តិ៍ CPR ពីវេជ្ជបណ្ឌិតប្រទេសវៀតណាមនោះទេ គឺក្រោយពីធ្វើតេស្តិ៍រហ័សអវិជ្ជមានកូវីដ១៩ ក៏តម្រូវឲ្យធ្វើចត្តាឡីស័ករយៈពេល១៤ថ្ងៃ ទើបអនុញ្ញាតិឲ្យធ្វើដំណើរចូលក្នុងកម្ពុជា។
លោកង៉ូវ សុខា ក៏បានបញ្ជាក់ដែរថា នៅថ្ងៃទី១ ខែធ្នូ ឆ្នាំ២០២១នេះ ជនជាតិវៀតណាមបានចូលមកតាមច្រកទ្វារព្រំដែនអន្តរជាតិបាវិត សរុបគឺ១៣៧នាក់ ហើយបានចាក់វ៉ាក់សាំងពេញលេញចំនួន១៣៤នាក់ ក្នុងនោះក្មេង២នាក់ និងមន្ត្រីស្ថានទូតម្នាក់ ។ ថ្ងៃទី២ ខែធ្នូ ជនជាតិវៀតណាមសរុបចំនួន១១៧នាក់ ក្នុងនោះក្មេងម្នាក់ ត្រូវធ្វើចត្តាឡីស័ក១៤ថ្ងៃ (ចាក់វ៉ាក់សាំងមិនគ្រប់ដូស)។
លោកបន្តថា ថ្ងៃទី៣ ខែធ្នូ ជនជាតិវៀតណាមចំនួន៣១៥នាក់ វ៉ាក់សាំងពេញលេញចំនួន៣១០នាក់ ក្នុងនោះក្មេងចំនួន០៣នាក់ និងមនុស្សពេញវ័យចំនួន២នាក់ត្រូវធ្វើចត្តាឡីស័ក១៤ថ្ងៃ។ នៅថ្ងៃទី៤ ខែធ្នូ មានជនជាតិវៀតណាមចំនួន១៤៧នាក់ វ៉ាក់សាំងពេញលេញ១៤៣នាក់ ក្នុងនោះក្មេងចំនួន០៣នាក់ និងមនុស្សពេញវ័យម្នាក់ត្រូវធ្វើចត្តាឡីស័ក១៤ថ្ងៃ ។ ចំណែកថ្ងៃទី៥ ខែធ្នូវិញ ក៏មានជនជាតិវៀតណាមចំនួន៧៤នាក់ វ៉ាក់សាំងពេញលេញចំនួន៧៣នាក់ ក្នុងនោះក្មេងម្នាក់។
លោកបន្តទៀតថា ថ្ងៃទី៦ ខែធ្នូ ជនជាតិវៀតណាម សរុប១៤២នាក់ វ៉ាក់សាំងពេញលេញចំនួន១៤១នាក់ ក្នុងនោះម្នាក់ត្រូវធ្វើចត្តាឡីស័ក១៤ថ្ងៃ (វ៉ាក់សាំងមិនគ្រប់ដូស)។ ចំណែកនៅព្រឹកថ្ងៃទី៧ ខែធ្នូ នេះ គិតត្រឹមម៉ោង១១និង៣០នាទីព្រឹក មានជនជាតិវៀតណាមចូលមកកម្ពុជាតាមច្រកទ្វារព្រំដែនអន្តរជាតិបាវិត ក្រុងបាវិត សរុបចំនួន៨៩នាក់ បានចាក់វ៉ាក់សាំងពេញលេញ និងមានលិខិតបញ្ជាក់ថាបានពិនិត្យធ្វើតេស្តិ៍ CPR ចេញដោយវេជ្ជបណ្ឌិតវៀតណាម និងបានធ្វើតេស្តិ៍រហ័ស ដោយមន្ត្រីចត្តាឡីស័កនៃមន្ទីរសុខាភិបាលនៅច្រកទ្វារព្រំដែនអន្តរជាតិបាវិត ជាលទ្ធផលគឺអវិជ្ជមានកូវីដ១៩។ ដូច្នេះ ក្នុងរយៈពេល៧ថ្ងៃ ដែលមានជនបរទេសជនជាតិវៀតណាមចូលមកកម្ពុជា គឺមានចំនួនសរុប១,០២១នាក់ហើយ៕
ចែករំលែកព័តមាននេះ