ប្រភពព័ត៌មានស្និទ្ធនឹងភ្នាក់ងារសន្តិសុខអេហ្ស៊ីបរាយការណ៍ថា ការប៉ះទង្គិចគ្នារវាងពួកគ្រឹស្ត និងពួកអ៊ិស្លាមបណ្តាលឱ្យមនុស្សស្លាប់៦នាក់ជាពួកគ្រឹស្ត និង៤៥នាក់ទៀតត្រូវរបួសកាលពីថ្ងែទី៨ មីនា នៅទីក្រុងគែរ បន្ទាប់ពីការដុតព្រះវិហារគ្រឹស្តមួយនៅជាយរដ្ឋធានីមក ។
មនុស្សប្រមាណជា៥.០០០នាក់មុននេះបានប្រមូលផ្តុំគ្នារួចហើយនាពេលយប់នៅមុខអគារទូរទស្សន៍ជាតិ ដើម្បីបរិហារចំពោះការដុតព្រះវិហារ HELOUAN នោះដោយសារតែរឿងស្រឡាញ់គ្នារវាងបុរសកាន់សាសនាគ្រឹស្តម្នាក់ និងនារីអ៊ិស្លាមម្នាក់ ។ ការប៉ះទង្គិចគ្នាកាលពីថ្ងៃទី៨ មីនា បានផ្ទុះឡើងពេលពួកគ្រឹស្តមួយក្រុមបានរាំងខ្ទប់ផ្លូវថ្នល់សំខាន់មួយនៃតំបន់នោះ។ កងយោធាត្រូវបានបញ្ជូនទៅហើយបាញ់ទៅលើអាកាស ដើម្បីបំបែកពួកបាតុករទាំង២ក្រុម ក៏ប៉ុន្តែនៅពុំអាចបញ្ចប់ការប៉ះទង្គិចគ្នានោះបាន។ យោងតាមសាក្សីទាំងឡាយថា បាតុករមួយចំនួនមានកាន់អាវុធផង ។ ប្រមុខមុខប្រឹក្សាយោធាជាន់ខ្ពស់ ដែលកាន់អំណាចនៅអេហ្ស៊ីបក្រោយការចាកចេញរបស់ប្រធានាធិបតីលោកហូស្នី មូបារ៉ាក់ បានសន្យាថា ព្រះវិហារ HELOUAN នឹងត្រូវកសាងឡើងវិញឱ្យបានមុនបុណ្យ PÂQUES ខាងមុខនេះ ៕
ចែករំលែកព័តមាននេះ