ទស្សនាវដ្ដី «Arabian Business» ផ្សាយថា ប្រទេសអេមីរ៉ាតអារ៉ាបរួម «UAE» មានគម្រោងបង្កើតភ្នំសិប្បនិម្មិត ដើម្បីជំរុញឱ្យមានទឹកភ្លៀង ដោយចំណាយប្រាក់ជាច្រើនលានដុល្លារ ។
ប្រជាជននិយាយថា តំបន់វាលខ្សាច់រងទុក្ខវេទនាដោយសារភាពរាំងស្ងួត ហើយភ្នំសិប្បនិម្មិតអាចមានចំណែកជូយបង្កើតដុំពពកឱ្យកើតជាទឹកភ្លៀងបាន ។
ភ្នំគឺជាកត្ដាសំខាន់បង្កឱ្យមានភ្លៀង ព្រោះធ្វើឱ្យមានសំណើមអណ្ដែតទៅទីខ្ពស់ ហើយចាប់ផ្ដើមត្រជាក់ ក្រោយមកផ្ដុំគ្នាក្លាយទៅជាពពកច្រើន និងក្លាយជាភ្លៀង ។
មជ្ឈមណ្ឌលដើម្បីស្រាវជ្រាវបរិយាកាសជាតិ (NCAR) សហរដ្ឋអាមេរិក បានទទួលប្រាក់ជាង៤០០.០០០ដុល្លារ ក្នុងការសិក្សាស្រាវជ្រាវយ៉ាងលំអិតថា ការបង្កើតភ្នំសិប្បនិម្មិតអាចបង្កើនបរិមាណពពកបានដែរ ឬអត់?
លោក Roelof Bruintjes អ្នកដឹកនាំក្នុងការស្រាវជ្រាវគម្រោងនេះ បញ្ជាក់ប្រាប់ «Arabian Business» ថា អ្វីដែលពួកគេកំពុងត្រួតពិនិត្យ គឺផលប៉ះពាក់របស់ភ្នំក្នុងរូបភាពផ្សេងៗ តើផ្ដល់ផលប៉ះពាល់ដល់ស្ថានភាពអាកាសធាតុ ឬអត់? ឬមានចំណោតបែបណា? ហើយពួកគេនឹងបង្ហើបឱ្យដឹងអំពីដំណាក់កាលដំបូងនៅរដូវក្ដៅ។
លោក Bruntjes បញ្ជាក់ថា បច្ចុប្បន្នមិនទាន់អាចគិតគូរពីចំនួនប្រាក់ដែលត្រូវប្រើប្រាស់បានទេ ប៉ុន្ដែទទួលស្គាល់ថាគម្រោងនេះនឹងដំណើរការបន្ដ ប្រសិនបើវាមិនហួសពីលទ្ធភាពរបស់រដ្ឋាភិបាលអេមីរ៉ាតអារ៉ាប់រួម ហើយដំណាក់កាលទី២នឹងស្ថិតនៅលើក្រុមហ៊ុនវិស្វកម្ម តើអាចបង្កើតភ្នំសិប្បនិម្មិតបាន ឬអត់ ?
ចែករំលែកព័តមាននេះ