ភ្នំពេញ៖ ទីបំផុតទៅ រាជរដ្ឋាភិបាល បានសម្រេចបញ្ជូនសំណុំរឿងលោក ឈួរ ច័ន្ទឌឿន អតីតអភិបាលខេត្តកំពង់ឆ្នាំង ដែលសព្វថ្ងៃជាអនុរដ្ឋលេខាធិការក្រសួងអភិវឌ្ឍន៍ជនបទ ទៅកាន់អង្គភាពប្រឆាំងអំពើពុករលួយ ACU ធ្វើការអង្កេត ស្រាវជ្រាវ និងចាត់វិធានការច្បាប់។ លោក ឈួរ ច័ន្ធឌឿន ពាក់ព័ន្ធនឹងការទន្ទ្រានដីព្រៃលិចទឹក នៅបឹងទន្លេសាប ជាង ២ពាន់ហិកតា។
ចំណាត់ការនេះ ត្រូវបានបង្ហាញ ក្នុងលិខិតរបស់ទីស្តីការគណៈរដ្ឋមន្ត្រី ចុះថ្ងៃទី៣ ខែធ្នូ ឆ្នាំ២០២១ ក្នុងកម្មវត្ថុអំពី ករណីរបាយការណ៍ ស្តីពី លទ្ធផលនៃការចុះត្រួតពិនិត្យ និងចាត់វិធានបង្ក្រាបការទន្ទ្រានដីរដ្ឋ ក្នុងដែនព្រៃលិចទឹកនៃតំបន់បឹងទន្លេសាប ស្ថិតក្នុងភូមិសាស្ត្រខេត្តកំពង់ឆ្នាំង និងខេត្តកំពង់ធំ។ ចំណាត់ការ លើអតីតអភិបាលខេត្តកំពង់ឆ្នាំង លោក ឈួរ ច័ន្ទឌឿន ក៏ធ្វើឡើងដោយយោងតាមចំណារដ៏ខ្ពង់ខ្ពស់បំផុតរបស់សម្តេចតេជោ នាយករដ្ឋមន្ត្រី ហ៊ុន សែន ចុះថ្ងៃទី៣០ ខែវិច្ឆិកា ឆ្នាំ២០២១។
តាមលិខិតរបស់ទីស្តីការគណៈរដ្ឋមន្ត្រី រាជរដ្ឋាភិបាលសម្រេចប្រគល់ភារកិច្ចជូនអង្គភាពប្រឆាំងអំពើពុករលួយ ធ្វើការអង្កេត ស្រាវជ្រាវ និងចាត់វិធានការច្បាប់ចំពោះបុគ្គល ឈ្មោះ ឈួរ ច័ន្ទឌឿន អតីតអភិបាលនៃគណៈអភិបាលខេត្តកំពង់ឆ្នាំង។
ក្នុងនោះ រាជរដ្ឋាភិបាល ក៏បានសម្រេចដកហូតដីរដ្ឋ ទំហំ ២១០០,៦៦ ហិកតា ដែលស្ថិតក្នុងដែនព្រៃលិចទឹក ដូចមានកំណត់ក្នុងអនុក្រឹត្យលេខ ១៩៧ អបក្រ.បក ចុះថ្ងៃទី២៩ ខែសីហា ឆ្នាំ២០១១ ដែលត្រូវបានទន្ទ្រានកាន់កាប់ដោយខុសច្បាប់ ស្ថិតនៅឃុំច្រណូក និងឃុំដារ ស្រុកកំពង់លែង ខេត្តកំពង់ឆ្នាំង។ ដីព្រៃលិចទឹក នៅបឹងទន្លេសាបនេះ ជាដីដែលលោក ឈួរ ច័ន្ទឌឿន រំលោភយកជាកម្មសិទ្ធិ ហើយត្រូវបានសម្តេចតេជោ ហ៊ុន សែន ប្រកាសក្នុងសារជាសំឡេង កាលពីថ្ងៃទី២៨ ខែវិច្ឆិកា ឆ្នាំ២០២១។
សូមរម្លឹកថា កាលពីរសៀលថ្ងៃអាទិត្យ ទី២៨ ខែវិច្ឆិកា ឆ្នាំ២០២១ សម្តេចតេជោ នាយករដ្ឋមន្ត្រី ហ៊ុន សែន បានចេញសារជាសំឡេង ដោយបញ្ជាឲ្យអភិបាលខេត្ត ជាប់បឹងទន្លេសាប រួមមាន៖ ខេត្តកំពង់ឆ្នាំង ពោធិសាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ រួមទាំងគណៈកម្មការសូរិយោដីថ្នាក់ជាតិ ដឹកនាំដោយលោកឧបនាយករដ្ឋមន្ត្រី ជា សុផារ៉ា អង្គភាពប្រឆាំងអំពើពុករលួយ និងស្ថាប័នពាក់ព័ន្ធថ្នាក់ជាតិដទៃទៀត ត្រូវធ្វើសកម្មភាពជាបន្ទាន់ ដើម្បីទប់ស្កាត់ការកាប់រានព្រៃលិចទឹក ដើម្បីយកដីធ្វើកម្មសិទ្ធិ នៅតំបន់បឹងទន្លេសាប។
ចំពោះមុខ សម្តេចតេជោ ហ៊ុន សែន ក៏បានបញ្ជាឲ្យដកហូតនូវដីព្រៃលិចទឹក នៅបឹងទន្លេសាប ដែលអតីតអភិបាលខេត្តកំពង់ឆ្នាំង លោក ឈួរ ច័ន្ទឈឿន រំលោភយកជាង ២០០០ហិកតា ផងដែរ។
បន្ថែមលើបទបញ្ជាឲ្យអភិបាលខេត្តជាប់បឹងទន្លេសាប និងអាជ្ញាធរសមត្ថកិច្ចពាក់ព័ន្ធ ត្រូវចាត់វិធានការជាបន្ទាន់ ដើម្បីទប់ស្កាត់បទល្មើសកាប់រានដីព្រៃលិចទឹក នៅតំបន់បឹងទន្លេសាប សម្តេចតេជោ នាយករដ្ឋមន្ត្រី ហ៊ុន សែន ក៏បានប្រកាសព្រមានឲ្យមន្ត្រីខិលខូចទាំងអស់ ចេញសារភាពជាបន្ទាន់ បើមិនដូច្នោះទេ មន្ត្រី និងអ្នកពាក់ព័ន្ធទាំងនោះ នឹងត្រូវដកហូត រឹបអូសទ្រព្យ ព្រមទាំងចាប់ខ្លួន បើសិនជាពាក់ព័ន្ធនឹងបទល្មើស កាប់រានព្រៃ យកដីតំបន់លិចទឹកបឹងទន្លេសាប ធ្វើកម្មសិទ្ធិ។
សូមជម្រាបជូនថា លោក ឈួរ ច័ន្ទឌឿន ត្រូវបានដកតំណែងពីអភិបាលខេត្តកំពង់ឆ្នាំង កាលពីខែមិថុនា ឆ្នាំ២០២១។ នៅថ្ងៃទី២៥ ខែមិថុនា ឆ្នាំ២០២១ ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យ ត្រាស់បង្គាប់តែងតាំង លោក ឈួរ ច័ន្ទឌឿន ជាអនុរដ្ឋលេខាធិការ ក្រសួងអភិវឌ្ឍន៍ជនបទ៕
ចែករំលែកព័តមាននេះ