ប្រទេសកូរ៉េខាងត្បូង ៖ អង្គការកិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) កាលពីថ្ងៃចន្ទ បានទម្លាក់ការព្យាករកំណើនសេដ្ឋកិច្ចរបស់កូរ៉េខាងត្បូងនៅក្នុងឆ្នាំ២០១៦ ត្រឹមអត្រា២,៧% ពី៣,១% ដោយសារតែពាណិជ្ជកម្មសកល
ប្រទេសកូរ៉េខាងត្បូង ៖ អង្គការកិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) កាលពីថ្ងៃចន្ទ បានទម្លាក់ការព្យាករកំណើនសេដ្ឋកិច្ចរបស់កូរ៉េខាងត្បូងនៅក្នុងឆ្នាំ២០១៦ ត្រឹមអត្រា២,៧% ពី៣,១% ដោយសារតែពាណិជ្ជកម្មសកលមានភាពត្រដាបត្រដួស និងការធ្លាក់ចុះខ្សោយនៃកំណើនសេដ្ឋកិច្ចចិន ។
សម្រាប់ឆ្នាំក្រោយ កូរ៉េខាងត្បូងដែលជាប្រទេសមហាអំណាចសេដ្ឋកិច្ចធំជាងគេទី៤របស់អាស៊ី នឹងរក្សាកំណើនសេដ្ឋកិច្ចត្រឹមអត្រា៣% ខណៈដែលសេដ្ឋកិច្ចពិភពលោកនឹងមានស្ថិរភាព។ នេះបើយោងតាមរបាយការណ៍ចុងក្រោយដែលផ្តល់ដោយ OECD ។
នៅក្នុងការព្យាករមុននេះ OECD រំពឹងថា សេដ្ឋកិច្ចកូរ៉េខាងត្បូងនឹងមានកំណើន៣,១% នៅក្នុងឆ្នាំ២០១៦ និង៣,៦% នៅក្នុងឆ្នាំ ២០១៧ ។
តាមរបាយការណ៍ឲ្យដឹងថា សន្ទុះងើបឡើងយ៉ាងខ្លាំងកាលពីឆមាសទី២ ឆ្នាំ២០១៥ ត្រូវបានគាំទ្រដោយការជំរុញកំណើនសារពើពន្ធ ប៉ុន្តែការធ្លាក់ចុះក្នុងរយៈពេលដើមឆ្នាំនេះ គឺដោយសារតែតម្រូវការប្រើប្រាស់ក្នុងវិស័យឯកជនធ្លាក់ចុះ ។ ម្យ៉ាងទៀត តម្រូវការចុះខ្សោយពីប្រទេសចិន ដែលស្មើនឹង១ភាគ៤នៃការនាំចេញរបស់កូរ៉េខាងត្បូង បានបន្ដរារាំងដល់កំណើននៃការនាំចេញ ។
មូលនិធិរូបិយវត្ថុអន្តរជាតិ (IMF) បានទម្លាក់ការព្យាកររបស់ខ្លួននៅក្នុងឆ្នាំ២០១៦ សម្រាប់កូរ៉េខាងត្បូង ដែលមានអត្រា២,៧% ចំណែកធនាគារ Bank of Korea ក៏បានទម្លាក់ចុះការព្យាកររបស់ខ្លួនផងដែរ គឺពីអត្រា៣% មកត្រឹម២,៨% ។ ប៉ុន្តែរដ្ឋាភិបាលកូរ៉េខាងត្បូងជឿជាក់ថា គោលដៅកំណើនសេដ្ឋកិច្ចរបស់ខ្លួនមានអត្រា៣,១% ទោះបីជាអ្នកបង្កើតគោលនយោបាយសេដ្ឋកិច្ចកំពូលមានតម្រុយថា វានឹងអាចធ្លាក់ចុះជាងនេះក្តី ។
ផលិតផលក្នុងស្រុកសរុបរបស់កូរ៉េខាងត្បូង (GDP) បានកើនឡើង១,២% នៅត្រីមាសទី៣ និង០,៧% នៅត្រីមាសទី៤កាលពីឆ្នាំមុន ។ នេះដោយសារបានពង្រីកការចំណាយសារពើភ័ណ្ឌរបស់រដ្ឋាភិបាល និងការប្រើប្រាស់ឯកជន ខណៈការនាំចេញទៅក្រៅប្រទេសបានធ្លាក់ចុះជារៀងរាល់ខែនៅឆ្នាំនេះ ។
ប៉ុន្តែសេដ្ឋកិច្ចហាក់ដូចជាមានសភាពមិនសូវល្អឡើយនៅត្រីមាសទី១ ខណៈដែលផលិតផលក្នុងស្រុកសរុបមានកំណើនតិចតួចប៉ុណ្ណោះត្រឹម ០,៤% ពោលគឺដោយសារការនាំចេញធ្លាក់ចុះលឿន និងការប្រើប្រាស់មិនមានកំណើនខ្លាំង ។
ការនាំចេញបានបង្ហាញនូវការធ្លាក់ចុះ២ខ្ទង់ចាប់តាំងពីដើមឆ្នាំនេះមក ដែលមានអត្រាធ្លាក់ចុះ១៩%នៅខែមករា និង១៣,១%នៅខែកុម្ភៈ។ វាបានធ្លាក់ចុះតិចតួចនៅត្រឹម៨,១%នៅក្នុងខែមីនា ប៉ុន្តែបានកើនឡើងវិញ១១,២%នៅខែមេសា ។
រដ្ឋមន្ត្រីហិរញ្ញវត្ថុកូរ៉េខាងត្បូង បានឲ្យដឹងថា ៖ « លោកគ្មានគម្រោងណាមួយឆ្លើយតបភ្លាមៗ ទៅនឹងការបន្ថែមថវិកាដើម្បីជួយដល់កំណើនសេដ្ឋកិច្ចឡើយ » ៕
ចែករំលែកព័តមាននេះ