រាជធានីភ្នំពេញ ៖ រថយន្តស៊េរីទំនើប២គ្រឿង ក្នុងនោះមួយរថយន្តម៉ាករ៉ង់រ៉ូវែរដែលត្រូវគេស្គាល់ថា អ្នកបើកបរគឺជាតារាចម្រៀង
ខេម បានបុកគ្នាចំពីពេញយ៉ាងទំហឹងជាមួយរថយន្តមួយគ្រឿងម៉ាកស៊ីលីកា ដែលបើកដោយបុរសម្នាក់បានកៀបជាប់ស្លាប់ក្នុងរថយន្ត រីឯតារាចម្រៀងខេម ត្រូវគេដឹងថា មិនមានរងរបួសនោះទេ ហេតុការណ៍ដ៏រន្ធត់នេះកើតឡើងកាលពីម៉ោង០២ និង៤០នាទីរំលងអធ្រាត្រ ឈានចូលថ្ងៃទី១៨ ឧសភា ២០១៦ ស្ថិតតាមបណ្តោយផ្លូវជាតិលេខ៥ ត្រង់ចំណុចមុខឃ្លាំងសាំងស៊ូគីម៉ិច ក្នុងភូមិឃ្លាំងសាំង សង្កាត់ប្ញស្សីកែវ ខណ្ឌប្ញស្សីកែវ ។
ប្រភពឱ្យដឹងថា សពជនរងគ្រោះឈ្មោះលី ការីម ភេទប្រុស អាយុ៣១ឆ្នាំ ជនជាតិខ្មែរអ៊ិស្លាម ជាបុគ្គលិកនៅគ្រឹះស្ថានមីក្រូហិរញ្ញវត្ថុអម្រឹត ស្នាក់នៅសង្កាត់ច្រាំងចំរេះ២ ខណ្ឌប្ញស្សីកែវ បើករថយន្តម៉ាកស៊ីលីកា ពណ៌ខ្មៅ ពាក់ស្លាកលេខភ្នំពេញ2M-5575 បើកចេញពីភ្នំពេញត្រឡប់ទៅផ្ទះ ។ ចំណែករថយន្តម៉ាករ៉ង់រ៉ូវែរ ពណ៌.ស ពាក់ស្លាកលេខភ្នំពេញ2X-9987 ជិះគ្នា២នាក់ ដែលគេស្គាល់ថា តារាចម្រៀងខេម ជាអ្នកបើកបរ និងមាននារីម្នាក់រួមដំណើរជាមួយ ធ្វើដំណើរវិលត្រឡប់មកពីខេត្តពោធិ៍សាត់ ចូលរាជធានីភ្នំពេញ ។
សាក្សីនៅកន្លែងកើតហេតុឱ្យដឹងថា មុនពេលកើតហេតុគេរថយន្តស៊ីលីកា បើកដោយបុរសខ្មែរអ៊ិស្លាមនោះ បានបែកកង់មុខ ខាងឆ្វេងក្នុងល្បឿនយ៉ាងលឿន និងរថយន្តតារាចម្រៀងខេម និងមាននារីម្នាក់ក៏ក្នុងល្បឿនលឿនដូចគ្នា ។ លុះមកដល់ចំណុចខាងលើ រថយន្តស៊ីលីកា ក៏រេចង្កូតទៅបុករថយន្តតារាចំរៀងខេមចំពីមុខពេញទំហឹង បណ្តាលឱ្យអ្នកបើកបររថយន្តស៊ីលីកាបោកដើមទ្រូងស្លាប់កៀបជាប់នៅក្នុងរថយន្ត ចំណែកខាងរថយន្តរ៉ង់រ៉ូវែរ គ្រាន់តែខ្ទេចមួយកំណាត់ខាងមុខ ។
ក្រោយពេលកើតហេតុភ្លាមៗ គេឃើញតារាចម្រៀងខេមនិងនារីម្នាក់នោះ បានចេញពីក្នុងរថយន្តរត់ឡើងជិះរថយន្តហាយឡែនឌ័រ ពណ៌ស្ករមួយគ្រឿងទៀតចេញទៅបាត់ បន្សល់ទុកតែសពជនរងគ្រោះក្នុងរថយន្តស៊ីលីកានៅកន្លែងកើតហេតុ ហើយត្រូវសាច់ញាតិដឹកយកទៅធ្វើបុណ្យតាមប្រពៃណី ។ ចំណែករថយន្តទាំង២គ្រឿង ត្រូវសមត្ថកិច្ចវាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោក ដើម្បីធ្វើការស្រាវជ្រាវបន្តទៀត ។
សូមបញ្ជាក់ថា ចំពោះការអះអាងខាងលើនេះ គ្រាន់តែជាប្រភពព័ត៌មានពីអ្នកឃើញហេតុការណ៍តែប៉ុណ្ណោះ ដោយសមត្ថកិច្ចកំពុងស្រាវជ្រាវបន្ត ។
ចែករំលែកព័តមាននេះ