នៅតាមដងផ្លូវ មានការរអ៊ូររទាំខ្លាំង កើតមានទាក់ទងនឹងអ្នកបើកឡានថ្លៃ ប៉ុន្តែអន់ចរិត ។ ដោយអាងខ្លួនមានឡានថ្លៃបើក អ្នកបើកបរខ្លះចុចស៊ីផ្លេ ឬក៏បើករញ៉េរញ៉ៃ ដោយមិនខ្លាចច្បាប់ឡើយ ។
នៅតាមដងផ្លូវ មានការរអ៊ូររទាំខ្លាំង កើតមានទាក់ទងនឹងអ្នកបើកឡានថ្លៃ ប៉ុន្តែអន់ចរិត ។ ដោយអាងខ្លួនមានឡានថ្លៃបើក អ្នកបើកបរខ្លះចុចស៊ីផ្លេ ឬក៏បើករញ៉េរញ៉ៃ ដោយមិនខ្លាចច្បាប់ឡើយ ។
អ្នកធ្វើដំណើរតាមដងផ្លូវ ពិសេសអ្នកជិះម៉ូតូ មានការខឹងសម្បារចំពោះអ្នកបើកឡានថ្លៃខ្លះ ដែលអួតក្អេងក្អាងចុចស៊ីផ្លេយ៉ាងកងរំពង និងបើកបរមិនគោរពច្បាប់ ។ នេះជាអ្វីដែលអ្នកបើកឡានថ្លៃ ត្រូវកែប្រែដើម្បីចៀសវាងទំនាស់នៅតាមដងផ្លូវ និងទទួលបានការគោរពពីមនុស្សម្នា ។
អ្នកបើកឡានថ្លៃ ត្រូវប្រកាន់យកអត្តចរិតថ្លៃថ្នូរគោរពដល់មនុស្សផងទាំងពួង ដែលធ្វើដំណើរតាមដងផ្លូវសាធារណ: ។ ចំណែកនគរបាលត្រូវមានសេចក្តីក្លាហាន ធ្វើការផាកពិន័យដល់អ្នកបើកឡានថ្លៃទាំងឡាយណា ដែលមិនគោរពតាមច្បាប់ចរាចរណ៍ ។ មិនថាឡានថ្លៃ ឬឡានថោក ឬម៉ូតូឡើយ ត្រូវតែគោរពច្បាប់ចរាចរណ៍ទាំងអស់គ្នា ។
បើសិនជាដងផ្លូវភ្នំពេញ នៅតែសំបូរដោយរថយន្តថ្លៃ ប៉ុន្តែអ្នកបើកបរមិនថ្លៃថ្នូរនោះ សង្គមកម្ពុជានឹងនៅតែមានភាពរញ៉េរញ៉ៃដោយនាំឱ្យមនុស្សឈ្លោះទាស់ទែងគ្នាឥតប្រយោជន៍នៅតាមដងផ្លូវ ។
ដូច្នេះ វាចាំបាច់ណាស់ ដែលអ្នកបើកឡានថ្លៃទាំងអស់ ត្រូវប្រកាន់អត្តចរិតថ្លៃថ្នូរនៅតាមដងផ្លូវ ។ នៅពេលដែលសង្គមកម្ពុជា មានឡានថ្លៃតាមដងផ្លូវជាមួយនឹងអ្នកបើកបរ ដែលមានចរិតថ្លៃថ្នូរហើយនោះ វានឹងបង្ហាញថា កម្ពុជាគឺជាសង្គមថ្លៃថ្នូរមួយដែលមនុស្សគ្រប់គ្នាយល់អំពីតម្លៃមនុស្ស និងមានការគោរពគ្នាទៅវិញទៅមក ដោយមិនថា ជាអ្នកមាន ឬអ្នកក្រឡើយ ។
សូមឱ្យកម្ពុជាកាន់តែមានការរីកចម្រើន ហើយមានឡានថ្លៃកាន់តែច្រើននៅតាមដងផ្លូវ ។ ប៉ុន្តែសំខាន់ជាងនេះ គឺមនុស្សកាន់តែមានចរិតថ្លៃថ្នូរ ពិសេសអ្នកបើកបរឡានថ្លៃនៅតាមដងផ្លូវ ៕
ចែករំលែកព័តមាននេះ