អតីតបវរកញ្ញាទេសចរណ៍ឆ្នាំ២០០៣ អ្នកនាង អ៊ិន សុខលីដា បានធ្វើការរំលឹកឡើងវិញខ្លះៗនូវរឿងរ៉ាវអតីតកាលរបស់ខ្លួន ដែលធ្លាប់មានមោទនភាពក្នុងនាមតំណាងប្រទេសកម្ពុជា ចូលប្រឡង
រាជធានីភ្នំពេញ ៖ អតីតបវរកញ្ញាទេសចរណ៍ឆ្នាំ២០០៣ អ្នកនាង អ៊ិន សុខលីដា បានធ្វើការរំលឹកឡើងវិញខ្លះៗនូវរឿងរ៉ាវអតីតកាលរបស់ខ្លួន ដែលធ្លាប់មានមោទនភាពក្នុងនាមតំណាងប្រទេសកម្ពុជា ចូលប្រឡងបវរកញ្ញា ដែលនាំអោយពិភពលោកបានស្គាល់កម្ពុជាកាន់តែច្បាស់។
អ៊ិន សុខលីដា ធ្លាប់បានក្លាយជាបវរកញ្ញាកម្ពុជាទី១ ដែលបានជាប់ក្នុងវគ្គ១០នាក់ចុងក្រោយ នៅក្នុងការប្រកួតបវរកញ្ញាទេសចរណ៍ដែលរៀបចំឡើងនៅក្នុងប្រទេសម៉ាឡេស៊ីកាលពីអំឡុងឆ្នាំ២០០៣។
ការរំលឹករឿងរ៉ាវខាងលើ របស់ អ៊ិន សុខលីដា នៅពេលនេះបានធ្វើឡើងស្របពេលដែល Miss Grand Cambodia 2021 សុធីតា ប៉ូគីមថេង ក៏បានសាងប្រវត្តិថ្មីមួយទៀតសម្រាប់វិស័យបវរកញ្ញាកម្ពុជា ដែលបានឈានដល់វគ្គ Top 10 នៅក្នុងការប្រកួតនៅប្រទេសថៃ កាលពីពេលថ្មីៗនេះ។
ជាមួយនឹងរូបថតអនុស្សាវរីយ៍មួយចំនួនអំឡុងពេលខ្លួនចូលរួមការប្រកួតនោះ អ៊ិន សុខលីដា បានភ្ជាប់ជាមួយនឹងសារបង្ហោះតាមហ្វេសប៊ុកថា «រូបថតទាំងនេះជាអនុស្សាវរីយ៍ដែលនាងខ្ញុំមិនអាចភ្លេចបាន! ព្រោះនាងខ្ញុំបានបង្ហាញនឹងអួតប្រាប់បរទេសអំពីប្រទេសកម្ពុជាជាទឹកដីដែលមានអរិយធម៍ និងវប្បវធម៌ទន់ភ្លន់ល្អឥតខ្ចោះទៅកាន់ពិភពលោកបានស្គាល់!»។
នាងបញ្ជាក់ថា «កាលឆ្នាំ២០០៣ ខ្ញុំទៅប្រឡងបរវកញ្ញាទេសរចណ៍អន្តជាតិនៅប្រទេសម៉ាឡេស៊ី ខ្ញុំជាប់ក្នុង 10នាក់ចុងក្រោយ Top 10 ជាប្រវត្តិសាស្ត្ររបស់កម្ពុជាជាលើកទី1 កាលពីជាង 10ឆ្នាំមុន! »។
នាងថា «អ្នកបង សាពណ៍ ជាអគ្គនាយការក្រុមហ៊ុនបង្ហាញម៉ូតដ៏ល្បីមួយ គាត់បានស្រែកយំនិងស្រែកប្រាប់គេឯងនៅកន្លែងប្រឡងភ្លាម ពេលគេប្រកាសថា Cambodia លេខរៀងទី5 ក្នុង10នាក់! គ្រាន់តែប្រទេសខ្មែរយើងកាលនោះមិនមានការផ្សាយផ្ទាល់តាមទូរទស្សន៍ និងអត់មាន Facebook អញ្ចឹង បានអត់សូវមានអ្នកគាំទ្រវិស័យបរវកញ្ញា ទើបស្ងាត់ឈឹង ហើយបងប្អូនមិនបានដឹង!។ យ៉ាងណាថ្ងៃនេះ នាងខ្ញុំសែនសប្បាយចិត្ត នឹងមានភាពកក់ក្តៅដែលមានបងប្អូនជាច្រើនបានជួយ ឡែកផេកជាផ្លូវការរបស់នាងខ្ញុំ! ហើយជាពិសេសបាន like និង comments ល្អៗផ្តល់នូវកម្លាំងចិត្ត!»។
នាងបន្ថែមថា «ខ្ញុំលែងឯកោហើយ ព្រោះមានបងប្អូនជាច្រើននៅចាំ និងស្រលាញ់គាំទ្រដល់រូបនាងខ្ញុំចង់ប្រាប់ថា ខ្ញុំស្រលាញ់នឹងគោរពដល់ទឹកចិត្តបងប្អូនខ្លាំងណាស់»។
ជាការកត់សម្គាល់ ចាប់តាំងពីបានជាប់ជាកញ្ញាឯកទេសចរណ៍កម្ពុជាមក អ្នកនាង អ៊ិន សុខលីដា បានបង្ហាញខ្លួនជាបន្តបន្ទាប់តាមរយៈការសម្តែងខ្សែភាពយន្ត និងឈុតបទចម្រៀងជាបន្តបន្ទាប់។ យ៉ាងណាក្រោយពីប្រឡូកក្នុងវិស័យសិល្បៈបានមួយរយៈ អតីតតារាសម្តែងរូបនេះក៏បានបាត់វត្តមានឈឹងពីវិស័យមួយនេះ ដោយមិនមានដំណឹងអ្វីសោះ។
ទោះជាយ៉ាងណា ទើបតែពេលថ្មីនេះប៉ុណ្ណោះ ដែលគេបានដឹងថា អ៊ិន សុខលីដា បានចេញទៅរស់នៅសហរដ្ឋអាមេរិក ដើម្បីកសាងគ្រួសារនៅទីនោះតាំងពីអំឡុងឆ្នាំ២០១២មកម្ល៉េះ ខណៈពេលនេះ នាងក៏ទទួលបានចំណងដៃកូនស្រីម្នាក់រួចមកហើយដែរ៕
ចែករំលែកព័តមាននេះ