អបអរសាទ! កម្ពុជានឹងមានរោងចក្រផលិតវ៉ាក់សាំងកូវីដក្នុងប្រទេសនាឆ្នាំក្រោយ
- ភ្នំពេញ
រាជធានីភ្នំពេញ ៖ គួរឱ្យមោទនភាពណាស់ ដែលកម្ពុជានឹងមានរោងចក្រផលិតវ៉ាក់សាំងបង្ការជំងឺកូវីដ១៩នៅក្នុងប្រទេសនៅឆ្នាំ
រាជធានីភ្នំពេញ ៖ គួរឱ្យមោទនភាពណាស់ ដែលកម្ពុជានឹងមានរោងចក្រផលិតវ៉ាក់សាំងបង្ការជំងឺកូវីដ១៩នៅក្នុងប្រទេសនៅឆ្នាំក្រោយ ។ នេះបើតាមឯកអគ្គរដ្ឋទូតចិនប្រចាំនៅក្នុងប្រទេសកម្ពុជា។
លោក វ៉ាង វិនធៀន ឯកអគ្គរដ្ឋទូតចិនប្រចាំនៅកម្ពុជាបានថ្លែងក្នុងពិធីសម្ភោធផ្លូវជាតិលេខ១១ នាព្រឹកថ្ងៃទី៦ ធ្នូ ឆ្នាំ២០២១ នេះថា ពេលនេះភាគីចិនបាននិងកំពុងតែមមាញឹកក្នុងធ្វើទំនាក់ទំនងជាមួយកម្ពុជា ដើម្បីធ្វើការផលិតវ៉ាក់សាំងបង្ការជំងឺកូវីដ១៩នៅក្នុងប្រទេសកម្ពុជា។
លោកបន្តថា «ក្រុមហ៊ុនស៊ីណូហ្វាមចិនបាននិងកំពុងតែធ្វើការងារជាមួយក្រសួងសុខាភិបាលកម្ពុជា ហើយប្រហែលជាឆ្នាំក្រោយប្រជាជនកម្ពុជានឹងអាចប្រើប្រាស់វ៉ាក់សាំងបង្ការជំងឺកូវីដ១៩ដែលផលិតក្នុងស្រុកបាន»។
លោកបន្តថា «ខ្ញុំជឿងជាក់ថា តាមរយៈកិច្ចព្រមព្រៀងពាណិជ្ជកម្មសេរីរវាងកម្ពុជា និងចិន ភាគីជាដៃគូរសេដ្ឋកិច្ចតំបន់គ្រប់ជ្រុងជ្រោយអាស៊ីបូពា៌ ការកសាងសង្គមវាសនារួមសេដ្ឋកិច្ច កម្ពុជា ចិន…នឹងធ្វើឲ្យមានការអភិវឌ្ឍន៍ជាច្រើននៅពេលខាងមុខ»។
សូមជម្រាបថា ការបញ្ជាក់របស់ឯកអគ្គរដ្ឋទូតចិនបែបនេះ បន្ទាប់ពីសម្តេចតេជោ ហ៊ុន សែន នាយករដ្ឋមន្ត្រី បានស្នើភាគីចិននាំយកផលិតផលវត្ថុធាតុដើម ដើម្បីផលិតវ៉ាក់សាំងបង្ការជំងឺកូវីដនៅក្នុងប្រទេសកម្ពុជា ហើយអាចលក់ទៅកាន់ប្រទេសផ្សេងទៀតដែលត្រូវការ។
ផ្លូវជាតិលេខ១១នេះបានចំណាយថវិកាសាងសង់អស់ទឹកប្រាក់ប្រមាណ ៩៨.៣៨៨ លានដុល្លារអាមេរិក ជាហិរញ្ញប្បទានរបស់សាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា។
គម្រោងសាងសង់ផ្លូវជាតិលេខ១១ និងផ្លូវក្នុងក្រុងព្រៃវែង មានប្រវែងសរុប៩៦.៤៨គីឡូម៉ែត្រ ចាប់ពីអ្នកលឿង (ចំណុចប្រសព្វផ្លូវជាតិលេខ១) ស្ថិតនៅភូមិលេខ៤ ឃុំព្រែកខ្សាយ-ខ ស្រុកពាមរក៍ ខេត្តព្រៃវែង ដល់ថ្នល់ទទឹង (ចំណុចប្រសព្វផ្លូវជាតិលេខ៧) ស្ថិតក្នុងភូមិស្លាបក្តោង ឃុំជប់ ស្រុកត្បូងឃ្មុំ ខេត្តត្បូងឃ្មុំ។ ក្នុងប្រវែងខ្សែផ្លូវសរុប ផ្លូវជាតិមានប្រវែង ៨៦.៦៨គីឡូម៉ែត្រ ឆ្លងកាត់ទឹកដីខេត្តព្រៃវែង ប្រវែង ៦៥គីឡូម៉ែត្រ និងទឹកដីខេត្តត្បូងឃ្មុំ ប្រវែង ២១.៦៨គីឡូម៉ែត្រ និងផ្លូវក្នុងក្រុងព្រៃវែងប្រវែង ៩.៨០គីឡូម៉ែត្រ។
ហេដ្ឋារចនាសម្ព័ន្ធ ផ្លូវ ស្ពាន គឺជាវិស័យអាទិភាពមួយនៅក្នុងគោលនយោបាយដឹកនាំរបស់រាជរដ្ឋាភិបាលកម្ពុជា។ មកដល់ពេលបច្ចុប្បន្ននេះ ទោះបីស្ថិតក្នុងវិបត្តិនៃការរាតត្បាតដោយជំងឺកូវីដ១៩យ៉ាងណាក្តី តែការកសាងហេដ្ឋារចនាសម្ព័ន្ធ ផ្លូវ ស្ពាន នៅតែបន្តដំណើរការ ហើយផ្លូវជាច្រើនបានបញ្ចប់ការសាងសង់ និងសម្ពោធដាក់ឱ្យប្រើប្រាស់ជាបន្តបន្ទាប់ ដើម្បីបំពេញសេចក្តីត្រូវការរបស់ប្រជាពលរដ្ឋ និងដើម្បីរុញកំណើនសេដ្ឋកិច្ចជាតិ។
ផ្លូវជាតិលេខ១១ និងផ្លូវក្នុងក្រុងព្រៃវែង គឺជាចំណងដៃដ៏ថ្លៃថ្លាមិនអាចកាត់ថ្លៃបាន របស់រាជរដ្ឋាភិបាលកម្ពុជា ជូនដល់ប្រជាពលរដ្ឋខេត្តព្រៃវែង និងខេត្តត្បូងឃ្មុំ ព្រមទាំងប្រជាពលរដ្ឋទូទាំងប្រទេស ដើម្បីប្រើប្រាស់ជាប្រយោជន៍ទូទៅ និងយូរអង្វែង៕
ចែករំលែកព័តមាននេះ