ភ្នំពេញ, ថ្ងៃទី៥ ខែឧសភា ឆ្នាំ ២០១៦ ៖ ក្រុមហ៊ុន កូកា-កូឡា កម្ពុជា បានបង្ហាញជាផ្លូវការនូវយុទ្ធសាស្ត្រទីផ្សារសាកលរបស់ខ្លួន ហៅថា «ស្លាកសញ្ញាតែមួយ» ឬ «One Brand» ដើម្បីបង្រួបបង្រួមគ្រួសារ កូកា-កូឡា ទាំងអស់ ឱ្យស្ថិតនៅក្រោមអត្ដសញ្ញាណដើមតែមួយ។ លោក ម៉ាកូស ដឺ ឃ្វីនតូ (Marco De Quinto) នាយកផ្នែកទីផ្សារប្រចាំក្រុមហ៊ុន កូកា-កូឡា បានលើកឡើងថា «តាមរយៈយុទ្ធសាស្ត្រ «ស្លាកសញ្ញាតែមួយ» ឬ «One Brand» យើងនឹងផ្លាស់ប្តូរពីការផ្សព្វផ្សាយពហុពាណិជ្ជសញ្ញាទៅជាការផ្សព្វផ្សាយពាណិជ្ជសញ្ញាតែមួយ ដែលនឹងជួយលើកកម្ពស់បានទាំងផលិតផល និងម៉ាកយីហោ»។
យុទ្ធសាស្ត្រ «ស្លាកសញ្ញាតែមួយ» ពង្រីកតម្លៃ និងវិសាលភាពអត្តសញ្ញាណដើម កូកា-កូឡា ជាសាកល ដើម្បីផ្តល់ភាពងាយស្រួលដល់អតិថិជនក្នុងការជ្រើសរើស កូកា-កូឡា របស់ពួកគេ។ យុទ្ធសាស្ត្រនេះ បានចាប់ផ្តើមដោយការចាប់ផ្តើមនូវយុទ្ធនាការ «រសជាតិនៃអារម្មណ៍ស្រស់ស្រាយ» ឬ «Taste The Feeling»។ កូកា-កូឡា ធ្វើឱ្យគ្រប់ឱកាសកាន់តែពិសេស តាមរយៈកម្រងរូបភាពដ៏សម្បូរបែបដែលផ្តិតមកនូវរឿងរ៉ាវផ្សេងៗពីជុំវិញពិភពលោក និង មានផលិតផល កូកា-កូឡា ជាតួអង្គសំខាន់ក្នុងការផ្សព្វផ្សាយ។
យុទ្ធនាការនេះ នឹងធ្វើឡើងនៅគ្រប់ទីផ្សារទាំងអស់ទូទាំងពិភពលោកក្នុងឆ្នាំ២០១៦ នេះ តាមរយៈការផ្សព្វផ្សាយដែលរួមមាន ស្ប៉តទូរទស្សន៍ចំនួន10 រូបភាពផ្សព្វផ្សាយជាង100 ប្រព័ន្ធពហុរូបភាពបែបថ្មី បទភ្លេង ទំនុកច្រៀង និងការចែករំលែក ឬ Share បន្តគ្នាតាមប្រព័ន្ធឌីជីថល។
យុទ្ធនាការនេះ ត្រូវបានច្នៃប្រឌិតឡើងថ្មីតាមបែបសហសម័យ ដោយរួមបញ្ចូលអត្តសញ្ញាណដើមរបស់ កូកា-កូឡាដែលមានរសជាតិឆ្ងាញ់ ធ្វើឱ្យអារម្មណ៍រីករាយ ស្រស់ថ្លា អមជាមួយនិមិត្តសញ្ញា «ឡូហ្គូរង្វង់ពណ៌ក្រហម» ដែលចាប់កំណើតតាំងពីទសវត្សរ៍ឆ្នាំ១៩៣០ មកម្ល៉េះ។ លោក ដឺ ឃ្វីនតូ (de Quintos) បានបន្ថែមទៀតថា «ដោយផ្តិតយកឡូហ្គូរង្វង់ពណ៌ក្រហមរបស់ កូកា-កូឡា មកធ្វើជាយុទ្ធសាស្ត្រចម្បងនៅក្នុងការវេចខ្ចប់ យើងកំពុងបោះជំហានឆ្ពោះទៅរកការអនុវត្តពេញលេញនៃយុទ្ធសាស្ត្រ «One-Brand» ដើម្បីរួបរួមក្រុមគ្រួសារ កូកា-កូឡា ទាំងអស់ឱ្យស្ថិតនៅក្រោមអត្តសញ្ញាណតែមួយ។
លោក ជី សិលា នាយកប្រតិបត្តិក្រុមហ៊ុន Sabay ដែលជាក្រុមហ៊ុនឌីជីថលឈានមុខគេផ្នែកប្រព័ន្ធផ្សព្វផ្សាយ និងកម្សាន្តនៅកម្ពុជា ព្រមទាំងស្គាល់ច្បាស់ពី កូកា-កូឡា បានយល់ស្របថា «យុទ្ធនាការប្រកបដោយការច្នៃប្រឌិតថ្មីនេះ គឺជាការបោះជំហានថ្មីមួយដ៏ត្រឹមត្រូវ។ វាសាមញ្ញតែបានបង្កើតទំនាក់ទំនងដ៏រឹងមាំជាមួយអត្តសញ្ញាណដើមជាសាកលរបស់ កូកា-កូឡា។
ដូចគ្នានេះដែរ លោក Erich Joachimsthaler នាយកប្រតិបត្តិ និងជាស្ថាបនិកនៃក្រុមហ៊ុន Vivaldi Partners Group ដែលជាក្រុមហ៊ុនពិគ្រោះយោបល់អំពីយុទ្ធសាស្ត្រម៉ាកយីហោលំដាប់ពិភពលោកមួយបានយល់ឃើញស្របគ្នាដែលថា «អ្វីដែល កូកា-កូឡា កំពុងធ្វើនាពេលនេះ គឺនាំយកអារម្មណ៍ស្រស់ស្រាយត្រឡប់មកវិញ ហើយនៅចុងបញ្ចប់នៃថ្ងៃនីមួយៗ គេនឹងនិយាយថា ញ៉ាំ កូកា-កូឡា ធ្វើឱ្យស្រស់ស្រាយជានិច្ច»។ លោក ដឺ ឃ្វីនតូ (de Quintos)បានពោលបន្ថែមថា «គោលគំនិតទាំងនេះ គឺស្របទៅតាមយុទ្ធសាស្ត្រ «One Brand» ដែលយើងចង់រំឭកដល់អតិថិជនទាំងអស់នូវមូលហេតុដែលពួកគេស្រឡាញ់ផលិតផលដូចទៅនឹងការស្រឡាញ់ម៉ាកយីហោដែរ»។
លោក Rodolfo Echeverria អនុប្រធានផ្នែកច្នៃប្រឌិត ទំនាក់ទំនង និងឌីជីថល នៃក្រុមហ៊ុន កូកា-កូឡា បានលើកឡើងថា «យុទ្ធនាការប្រកបដោយការច្នៃប្រឌិតនេះ ត្រូវបានបង្កើតឡើងដើម្បីឆ្លុះបញ្ចាំងឱ្យឃើញថា ភាពសាមញ្ញនៃការញ៉ាំ កូកា-កូឡា ត្រជាក់មួយដបអាចធ្វើឱ្យបរិយាកាសធម្មតាក្លាយជាពិសេស។ រឿងរ៉ាវផ្សេងៗ ដែលបង្ហាញនៅក្នុងយុទ្ធនាការនេះ ត្រូវបានបង្កើតឡើង គឺអាចផ្សាភ្ជាប់ជាមួយអតិថិជនរបស់យើងនៅទូទាំងពិភពលោក»។
លោក ចែម វុឌ្ឍសុវិន្ទ អ្នកជំនាញថតរូប និងប្រធានប្រតិបត្តិទូទៅរបស់ក្រុមហ៊ុន Plusmax Group ព្រមទាំងជា គណៈកម្មការនៃកម្មវិធីកំពូលតារាបង្ហាញម៉ូដកម្ពុជា បានសរសើរដល់ទិសដៅថ្មីដែលក្រុមហ៊ុន កូកា-កូឡា កំពុងតែធ្វើថា «ពណ៌ដែលប្រើលើរូបភាពនីមួយៗ បង្កើតអារម្មណ៍ពិសេសម្យ៉ាង ដែលបង្កប់នូវរឿងរ៉ាវផ្សេងៗពោរពេញដោយភាពកក់ក្ដៅ និងភាពប្រាកដនិយម ហើយទិដ្ឋភាពរួមនៅតែបានបង្ហាញពីសិល្បៈបែបសហសម័យដដែល»។ លោក James Sommerville អនុប្រធានក្រុមហ៊ុន Global Design ក៏បានលើកឡើងថា «រូបថតទាំងនេះ បង្ហាញពីសកម្មភាពរបស់មនុស្សក្នុងឱកាសផ្សេងៗ ហើយខណ្ឌចែកគ្នារវាងពួកគេ និងអ្វីដែលពួកគេចូលចិត្ត»។
បទចម្រៀងក៏បានដើរតួយ៉ាងសំខាន់នៅក្នុងយុទ្ធនាការ «រសជាតិនៃអារម្មណ៍ស្រស់ស្រាយ» ឬ «Taste The Feeling» នេះដែរ ដោយចម្រៀងមួយបទនេះ ផលិតឡើងដោយសិល្បករ និងផលិតករសញ្ជាតិស៊ុយអែត ឈ្មោះ Aviccii និងច្រៀងដោយ តារាចម្រៀង Conrad Sewell។ បន្ទាប់ពីបានឃើញវីដេអូចម្រៀងនេះ តារាចម្រៀង និងអ្នកនិពន្ធបទភ្លេង លោក សួន ពិសិដ្ឋ បានផ្តល់ចំណាប់អារម្មណ៍ថា «បទចម្រៀងនេះមានភាពទាក់ទាញ និងបង្កើតអារម្មណ៍ល្អៗតាមរយៈទំនុកច្រៀង។ ចម្រៀងមួយបទនេះនឹងទទួលបានការចាប់អារម្មណ៍ជាពិសេសពីសំណាក់យុវជនជំនាន់ក្រោយយ៉ាងឆាប់រហ័ស»។ សូម្បីតែ តារាចម្រៀង Sewell ផ្ទាល់ក៏បានយល់ស្រប និងនិយាយថា «វាជាបទចម្រៀងមួយដែលធ្វើឱ្យមានអារម្មណ៍ល្អ ហើយខ្ញុំគិតថា អ្នកស្តាប់នឹងពេញចិត្តចំពោះបទចម្រៀងនេះ ហើយចង់ដោនឡូនទុកមិនខាន។ ខ្ញុំពិតជាមានមោទនភាពណាស់ដែលបានរួមចំណែកនៅក្នុងបទចម្រៀងនេះ»។
ចែករំលែកព័តមាននេះ