រាជធានីភ្នំពេញ ៖ ក្រោយព្រឹត្តិការណ៍ប៉ះទង្គិចជាមួយមេក្លោងជួញដូរគ្រឿងញៀន បណ្តាលឱ្យពលីមន្ត្រីអាវុធហត្ថម្នាក់កាលពីពេលកន្លងមកនោះ គេសង្កេតឃើញថា កម្លាំងកងរាជអាវុធហត្ថរាជធានីភ្នំពេញ ហាក់ដូចជាកំពុងបង្កើនសកម្មភាពបង្ក្រាបគ្រឿងញៀនកាន់តែក្តៅឡើងៗ ។
ជាក់ស្តែង កាលពីរសៀលថ្ងៃទី១៥ ឧសភា ២០១៦ កម្លាំងអាវុធហត្ថរាជធានីភ្នំពេញ បានបញ្ជូនគ្រឿងញៀនចំនួន៣២៨កញ្ចប់ និងជនសង្ស័យចំនួន៣២នាក់ ត្រូវបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមនីតិវិធី ។
ក្នុងការបង្ក្រាបក្រុមជួញដូរ ចែកចាយ និងប្រើប្រាស់គ្រឿងញៀនមួយសំបុកធំនេះ មន្ត្រីអាវុធហត្ថរាជធានីបានបញ្ជាក់ថា កំលាំងជំនាញអាវុធហត្ថរាជធានីភ្នំពេញ បានការសហការតាមបណ្តាខណ្ឌដូចជា ៖
១-កំលាំងអាវុធហត្ថខណ្ឌទួលគោក ស្រាវជ្រាវឃាត់ខ្លួនបានជនសង្ស័យចំនួន២០នាក់ រួមជាមួយថ្នាំញៀនចំនួន១៧៧កញ្ចប់ ស្ថិតនៅចំណុចផ្លូវរទេះភ្លើង ក្នុងភូមិ២៣ សង្កាត់បឹងកក់២ ខណ្ឌទួលគោក និងនៅផ្ទះសំណាក់អូយែស (O’yes) ផ្លូវ១៣២ សង្កាត់ស្រះចក ខណ្ឌដូនពេញ ហើយដកហូតបានដែកអក្សរ T សម្រាប់លួចកាច់.កម៉ូតូ និងកាំបិតធ្មេញរណារមួយឈុត ដែលជនសង្ស័យសារភាពថា ធ្លាប់លួចកាច់.កម៉ូតូបាន១គ្រឿង នៅមុខបាចតុមុខ ។
២-សហការកំលាំងអាវុធហត្ថខណ្ឌមានជ័យ ចុះស្រាវជ្រាវឃាត់ខ្លួនជនសង្ស័យចំនួន៤នាក់ នៅចំណុចបន្ទប់ជួលលេខ១៤ ភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ និងដកហូតថ្នាំញៀនបាន១៣៤កញ្ចប់ ។
៣-សហការជាមួយកំលាំងអាវុធហត្ថខណ្ឌដង្កោ ខណ្ឌព្រែកព្នៅ ចុះស្រាវជ្រាវឃាត់ខ្លួនបានជនសង្ស័យចំនួន៨នាក់ ដកហូតថ្នាំញៀនបាន១៧កញ្ចប់ នៅចំណុចបន្ទប់ជួលភូមិឫស្សី និងបន្ទប់ជួល ភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ និងនៅចំណុចស្ថានីយបូមទឹក ភូមិព្រែកព្នៅ ខណ្ឌព្រែកព្នៅ ។
មន្ត្រីអាវុធហត្ថបន្តថា ការបាត់បង់អាយុជីវិតមន្ត្រីជំនាញកងរាជអាវុធហត្ថម្នាក់ ក្នុងកិច្ចប្រតិបត្តការបង្ក្រាបក្រុមជួញដូរគ្រឿងញៀន ដោយមានការផ្ទុះអាវុធដាក់គ្នានោះ បានធ្វើឱ្យលោកឧត្តសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្តលើផ្ទៃប្រទេស និងជាមេបញ្ជាការកងរាជអាវុធហត្តរាជធានីភ្នំពេញ កាន់តែបង្កើតសមត្ថភាពពង្រឹងកំលាំងក្រោមឱវាទ ចុះស៊ើបអង្កេតស្រាវជ្រាវរកទីកន្លែង និងសំបុកជួញដូរចែកចាយ និងប្រើប្រាស់គ្រឿងញៀន ដើម្បីបង្ក្រាបយ៉ាងមានប្រសិទ្ធិភាព ។
ចែករំលែកព័តមាននេះ