ក្រុងប៉ោយប៉ែត ៖ រថយន្តដឹកទំនិញសំពីងសំពោងរបស់ពួកឈ្មួញមួយចំនួនគេសង្កេតឃើញធ្វើចរាចរជារៀងរាល់ថ្ងៃនៅក្រុងប៉ោយប៉ែត។ ជាក់ស្តែងគេឃើញរថយន្តសណ្តោងរ៉ឺម៉ក និងមានម្ចាស់២ទៅ៣នាក់ប្រកបរបរដឹកទំនិញសព្វសារពើពីបណ្តាខេត្តផ្សេងៗ ហើយយកទៅស្តុកនៅឃ្លាំងក្នុងក្រុងប៉ោយប៉ែត ។ បន្ទាប់មកគេឃើញម្ចាស់ទំនិញនោះយករថយន្ត ទៅផ្ទេរទំនិញទាំងអស់នេះអូសចូលទៅចំណុចច្រកទ្វារប៉ោយប៉ែតក្នុងគោលបំណងនាំឆ្ពោះទៅប្រទេសសៀម។
តាមប្រភពព័ត៌មានឱ្យដឹងថា ម្ចាស់ដឹកទំនិញតាមរថយន្តសំពីងសំពោងមានទាំងសណ្តោងកន្ទុយផងនោះ គឺបណ្តាលមកពីចង់កេងចំណេញថ្លៃសេវាបង់លុយឱ្យទៅស្ថាប័នសមត្ថកិច្ចពាក់ព័ន្ធដែលឈរជើងនៅក្នុងក្រុងប៉ោយប៉ែត។ ការដឹកទំនិញផ្សេងៗអូសចូលមកតាមច្រកប៉ោយប៉ែតក្នុងគោលបំណងនាំចេញទៅប្រទេសសៀមមុនពេលចូលមាត់ច្រកទី១ ចំណុចរង្វង់មូលនោះ គឺត្រូវបង់លុយឱ្យសមត្ថកិច្ចចំនួន២កន្លែង ។ ចំពោះការបង់លុយទាំងអស់នោះ គឺពួកគេជាសមត្ថកិច្ចគិតចំនួនក្បាលរថយន្ត គឺក្នុង១រថយន្តតម្លៃពី១.២០០បាតដល់១.៥០០បាត គឺីគិតជាលុយបាតសុទ្ធតែម្តង។ ដូច្នេះហើយទើបបានជាពួកឈ្មួញដាក់ទំនិញក្នុងមួយរថយន្ត រួមទាំងសណ្តោងរឺុម៉ក ធ្វើយ៉ាងណាឱ្យបានច្រើនទើបរកចំណេញបានខ្លះ។ ប្រភពដដែលបន្តថា ចំណែកច្រកទី២ដោយសារខាងភាគីសៀមមិនអនុញ្ញាតឱ្យនាំចូលក្នុងប្រទេសគេទាំងសំពីងសំពោងទើបគេយកទៅទំលាក់ចុះនៅបរិវេណកាស៊ីណូហ្គោលឌិនក្រោន រួចយករថយន្តផ្សេងទៀតមកដាក់ឱ្យសមល្មមទៅតាមការកំណត់របស់ភាគីសៀមទើបពួកគេអាចនាំចូលបាន។
រថយន្តដឹកទំនិញសំពីងសំពោងលើសចំណុះនេះធ្វើឱ្យប្រជាពលរដ្ឋរិះគន់យ៉ាងខ្លាំងទៅដល់អាជ្ញាធរ និងសមត្ថកិច្ច ជំនាញដែលគ្មានវិធានការ និងគិតគូរចំពោះបញ្ហាសណ្តាប់ធ្នាប់សាធារណៈ និងអាយុជីវិតដ៏មានតម្លៃរបស់អ្នកដំណើរដោយគិតតែពីផលប្រយោជន៍ផ្ទាល់ខ្លួនខ្លាំងពេក ។ ម្យ៉ាងទៀតមាត់ច្រកប៉ោយប៉ែតមានភ្ញៀវទេសចរជាតិ និងអន្តរជាតិឆ្លងកាត់ច្រើនណាស់ក្នុង១ថ្ងៃមិនក្រោមពី៥០០នាក់ឡើយ នេះគឺជាមុខមាត់របស់ថ្នាក់ដឹកនាំធំជាងគេសំរាប់ច្រកប៉ោយប៉ែត ។ មន្ត្រីសមត្ថកិច្ចពាក់ប្រព័ន្ធមានតួនាទីឈរជើងចំណុចមាត់ច្រករង្វង់មូលមិនអាចសុំការបំភ្លឺបានឡើយចំពោះបញ្ហាយកលុយលើចំនួនក្បាលរថយន្តដែលដឹកទំនិញឆ្លងកាត់ ៕
ចែករំលែកព័តមាននេះ