អង្គការសុខភាពពិភពលោក (WHO) កាលពីថ្ងៃសុក្រម្សិលមិញនេះបានជំរុញប្រទេសទាំងអស់បង្កើនសមត្ថភាពសុខាភិបាល និងចាក់វ៉ាក់សាំងដល់ប្រជាពលរដ្ឋពួកគេដើម្បីប្រយុទ្ធប្រឆាំងនឹងការកើនឡើងករណីឆ្លងកូវីដ ១៩ ដែលកំពុងជំរុញដោយវីរុសបំប្លែងថ្មី Omicron។
ស្ថាប័នសុខភាពពិភពលោកនេះនិយាយថា ការបិទការធ្វើដំណើរជាវិធានការអាចពន្យារពេលបណ្តោះអាសន្នប៉ុណ្ណោះ ប៉ុន្តែវាមិនមែនជាដំណោះស្រាយឡើយ។
ទោះបីមានការបិទព្រំដែនពីការធ្វើដំណើរមកពីប្រទេសនៅតំបន់អាហ្វ្រិចខាងត្បូងក្តី អូស្ត្រាលីបានក្លាយជាប្រទេសចុងក្រោយគេដែលរាយការណ៍ពីការឆ្លងវីរុសបំប្លែងថ្មីក្នុងសហគមន៍។ ចំណែកនៅអាមេរិកវិញ រកឃើញមានការឆ្លងវីរុសបំប្លែងថ្មីនៅក្នុងរដ្ឋចំនួន ៥ ។
រហូតមកដល់ពេលនេះ ប្រទេសជាង ៣០បានរាយការណ៍ពីករណីវីរុសបំប្លែងថ្មី Omicron ហើយវីរុសនេះបានធ្វើដំណើរមកដល់អាស៊ីផងដែរ ដោយមានករណីឆ្លងក្នុងប្រទេសជប៉ុន កូរ៉េខាងត្បូង សិង្ហបុរី ម៉ាឡេស៊ី និងឥណ្ឌាជាដើម ។ រដ្ឋាភិបាលនៃប្រទេសជាច្រើនបានធ្វើការរឹតបន្តឹងការធ្វើដំណើរ ដើម្បីទប់ស្កាត់ការឆ្លងរីករាលដាននៃវីរុស មរណៈនេះ។
លោក Takeshi Kasai នាយកប្រចាំតំបន់របស់អង្គការសុខភាពពិភពលោកបាននិយាយថា«ការគ្រប់គ្រងព្រំដែនអាចពន្យារពេលបានបណ្តោះអាសន្ន ប៉ុន្តែប្រទេស និងសហគមន៍ទាំងអស់ត្រូវត្រៀមខ្លួនសម្រាប់ការកើនឡើងករណីឆ្លងថ្មី»។
លោកថ្លែងទៀតថា«ប្រជាជនមិនគួរផ្អែកលើវិធានការព្រំដែនប៉ុណ្ណោះឡើយ ។ អ្វីដែលសំខាន់បំផុតគឺការត្រៀមខ្លួនចំពោះការឆ្លងថ្មីដែលមានកម្រិតខ្ពស់ ។ រហូតមកដល់ពេលនេះ ព័ត៌មានបង្ហាញថា យើងមិនចាំបាច់ត្រូវផ្លាស់ប្តូរវិធីសាស្ត្ររបស់យើងទេ» ។
លោកបានជំរុញឲ្យប្រទេសទាំងអស់ចាក់វ៉ាក់សាំងជូនប្រជាជនដែលងាយរងគ្រោះឲ្យបានពេញលេញ និងប្រកាន់ខ្ជាប់នូវវិធានការបង្ការដូចជា ការពាក់ម៉ាស និងគន្លាតសង្គម។
សូមបញ្ជាក់ថា វីរុសបំប្លែងថ្មី Omicron ត្រូវបានអ្នកវិទ្យាសាស្ត្រអាហ្វ្រិចខាងត្បូងបានរាយការណ៍ទៅកាន់អង្គការសុខភាពពិភពលោក កាលពីថ្ងៃទី ២៤ ខែវិច្ឆកា ។ អ្នកវិទ្យាសាស្ត្រថាវីរុសនេះមានការឆ្លងរីករាលដាលខ្លាំង និងធន់នឹងវ៉ាក់សាំង ។
គិតត្រឹមថ្ងៃសៅរ៍ ទី ៤ខែធ្នូនេះ ពិភពលោកមានករណីឆ្លងកូវីដ ១៩ជាង ២៦៤លាននាក់ និងស្លា.ប់ជាង ៥,២៣លាននាក់៕ (យោងតាមប្រភព៖ Channel News Asia)
ចែករំលែកព័តមាននេះ