ប្រទេសវៀតណាម ៖ ផែនការរបស់ថៃ ក្នុងការបង្កើនការលក់អង្ករក្នុងស្ដុកឲ្យបានចំនួន១១,៤លានតោនត្រឹមរយៈពេល២ខែ បានបង្កឱ្យមានក្ដីព្រួយបារម្ភថា វាអាចនឹងប៉ះពាល់ដល់តម្លៃ ក៏ដូចជាការនាំចេញអង្កររបស់វៀតណាម
ប្រទេសវៀតណាម ៖ ផែនការរបស់ថៃ ក្នុងការបង្កើនការលក់អង្ករក្នុងស្ដុកឲ្យបានចំនួន១១,៤លានតោនត្រឹមរយៈពេល២ខែ បានបង្កឱ្យមានក្ដីព្រួយបារម្ភថា វាអាចនឹងប៉ះពាល់ដល់តម្លៃ ក៏ដូចជាការនាំចេញអង្កររបស់វៀតណាមដែរឬយ៉ាងណា ។ ទោះជាយ៉ាងណា វិនិយោគិនក្នុងវិស័យនេះមួយចំនួនមានសុទិដ្ឋិនិយមថា នឹងគ្មានផលប៉ះពាល់អ្វីគួរឲ្យកត់សម្គាល់ទេ ។
ប្រទេសថៃមានផែនការលក់អង្ករទាំងអស់ចំនួន១១,៤លានតោនពីស្តុករបស់រដ្ឋាភិបាលនៅក្នុងខែឧសភា និងខែមិថុនា ដើម្បីបង្កើតប្រាក់ចំនួន២,៨ប៊ីលានដុល្លារអាមេរិក ដែលជាការលក់លាងឃ្លាំងដ៏ធំបំផុតមិនធ្លាប់មានពីមុនមករបស់ប្រទេសនាំចេញអង្ករនៅលើពិភពលោក បន្ទាប់ពីប្រទេសឥណ្ឌា ។
ប្រធាននាយកដ្ឋានកែច្នៃជលផលកសិកម្ម និងផលិតកម្មអំបិល លោក Le Van Banh បានថ្លែងថា ៖ « ការលក់អង្ករចេញពីស្ដុកដ៏ធំបំផុតរបស់ថៃ ពិតជាមានផលប៉ះពាល់ទៅទីផ្សារអង្ករពិភពលោក អនុលោមតាមច្បាប់ស្តីពីការផ្គត់ផ្គង់និងតម្រូវការ រួមទាំងទីផ្សារអង្កររបស់វៀតណាមផងដែរ » ។
ទោះជាយ៉ាងណា លោកបញ្ជាក់ថា ៖ « ចំពោះផលប៉ះពាល់មកលើការនាំចេញអង្កររបស់វៀតណាម នឹងគ្មានអ្វីគួរឲ្យកត់សម្គាល់ទេ គឺយ៉ាងច្រើនត្រឹមតែរយៈពេលខ្លីប៉ុណ្ណោះ»។
លោកបន្ដថា ៖ « គម្រោងរបស់ថៃ ក្នុងការលក់អង្ករចំនួន១១,៤លានតោនក្នុងរយៈពេលត្រឹមតែ២ខែនោះ គឺមិនអាចធ្វើទៅរួចទេ ។ ការនាំចេញអង្ករជាមធ្យមរបស់ថៃមានចំនួន៤០ម៉ឺនតោន ទៅ៥០ម៉ឺនតោនក្នុង១ខែ ។ ដូច្នេះ គម្រោងនេះហាក់ដូចជាមិនសមហេតុផលឡើយ » ។
សមាគមស្បៀងអាហារវៀតណាមបានឱ្យដឹងថា ផលប៉ះពាល់ទៅលើការនាំចេញអង្ករនឹងគ្មានទំហំធំទេនៅក្នុងត្រីមាសទី២ និងទី៣ ស្របពេលដែលកិច្ចសន្យាភាគច្រើនត្រូវបានចុះហត្ថលេខានៅចុងត្រីមាស ឆ្នាំ២០១៥ ហើយមានការប៉ាន់ប្រមាណថា អង្ករចំនួន១,៤លានតោននឹងត្រូវបានដឹកជញ្ជូនទៅក្រៅប្រទេស យោងតាមកិច្ចសន្យាដែលបានចុះហត្ថលេខាស្រាប់ ។
លោក Le Van Banh បញ្ជាក់ថា ៖ « ការលក់អង្ករលាងឃ្លាំងនេះ ពិតជាមានគុណភាពក្រោមស្តង់ដា ដែលរដ្ឋាភិបាលថៃបានទិញបន្ទាប់ពីគម្រោងឥណទានស្រូវឆ្នាំ២០១២-២០១៣ ហើយថៃនឹងកំណត់គោលដៅទីផ្សារដែលគ្មានការទាមទារដូចនៅទ្វីបអាហ្វ្រិក » ។
ចាប់តាំងពីខែឧសភា ឆ្នាំ២០១៤ ថៃបានដាក់ដេញថ្លៃអង្ករចំនួន៥,០៥លានតោន ក្នុងតម្លៃ១,៥ប៊ីលានបាត ។ រដ្ឋាភិបាលថៃបាននិយាយកាលពីពេលមុនថា ខ្លួនមានបំណងសម្អាតស្តុកនៅចុងឆ្នាំ២០១៧ ។
ទន្ទឹមគ្នានេះដែរ ទីផ្សារនាំចូលអង្ករចម្បងរបស់វៀតណាមគឺ ប្រទេសចិន ហ្វ៊ីលីពីន និងឥណ្ឌូណេស៊ី ខណៈប្រទេសទាំងនេះពេញចិត្តលើស្តង់ដាគុណភាពអង្កររបស់វៀតណាមដែលទើបប្រមូលផលថ្មីៗនេះ ។ ដូច្នេះ ការនាំចេញអង្កររបស់វៀតណាម នឹងគ្មានផលប៉ះពាល់គួរឲ្យកត់សម្គាល់ដោយសារតែការលក់ចេញអង្កររបស់ថៃ ក្នុងខែខាងមុខនេះឡើយ ។
យោងតាមប្រធាននាយកដ្ឋានដាំដុះ ចំណុះក្រោមក្រសួងកសិកម្ម និងអភិវឌ្ឍន៍ជនបទ Ma QuangTrung បានថ្លែងថា ៖ « ការនាំចេញអង្កររបស់វៀតណាមក្នុងរយៈពេល៤ខែដំបូងឆ្នាំនេះ បានឈានដល់២,០៦លានតោន ដែលមានតម្លៃ៩១៦លានដុល្លារអាមេរិក កើនឡើង១១,៨%ក្នុងបរិមាណ និង១៣,៨%ក្នុងរយៈពេលដូចគ្នាកាលពីឆ្នាំមុន ។ រីឯតម្លៃនាំចេញអង្ករជាមធ្យម ស្មើនឹង៤៣៨ដុល្លារអាមេរិកក្នុង១តោន កើនឡើង០,៣២% ក្នុងរយៈពេលដូចគ្នាកាលពីឆ្នាំមុន ។ ចិន គឺជាប្រទេសដែលនាំចូលអង្ករពីវៀតណាមធំបំផុត ស្មើនឹងជាង៣០% នៃការនាំចេញអង្ករសរុបរបស់វៀតណាម » ។
ឆ្នាំមុន វៀតណាម គឺជាប្រទេសនាំចេញអង្ករធំជាងគេទី៣ក្នុងពិភពលោក ដែលបរិមាណនាំចេញស្មើនឹង៦,៤លានតោន ៕
ចែករំលែកព័តមាននេះ