អូមីក្រុង ចូលដល់ប្រទេសឥណ្ឌាជាលើកដំបូងរកឃើញ ០២ករណី
ឥណ្ឌា ៖ មន្ត្រីសុខាភិបាលឥណ្ឌា បានប្រកាសកាលពីថ្ងៃទី០២ ធ្នូ ២០២១ថា រកឃើញករណីដំបូង នៃវីរុសអូមីក្រុង លើបុរសពីរនាក់ នៅរដ្ឋ…
ឥណ្ឌា ៖ មន្ត្រីសុខាភិបាលឥណ្ឌា បានប្រកាសកាលពីថ្ងៃទី០២ ធ្នូ ២០២១ថា រកឃើញករណីដំបូង នៃវីរុសអូមីក្រុង លើបុរសពីរនាក់ នៅរដ្ឋ Karnataka ភាគខាងត្បូងនៃប្រទេស បានធ្វើតេស្ត វិជ្ជមាន ចំពោះវីរុសកូវីដបំប្លែងថ្មី Omicron នេះ ។
មន្ត្រីបាននិយាយថា ម្នាក់ក្នុងចំណោមពួកគេ ជាជនជាតិអាហ្វ្រិកខាងត្បូង មានអាយុ ៦៦ឆ្នាំ ប៉ុន្តែបានធ្វើដំណើរចាកចេញពីប្រទេសឥណ្ឌារួចហើយ ទៅទីក្រុងឌូបៃ ។ ម្នាក់ទៀត គឺជាវេជ្ជបណ្ឌិត អាយុ ៤៦ឆ្នាំ នៅទីក្រុង Bengaluru ភាគខាងត្បូងប្រទេសឥណ្ឌា ខណៈដែលលោកវេជ្ជបណ្ឌិតរូបនេះ មិនមានប្រវត្តិធ្វើដំណើរទេ ។
អង្គការសុខភាពពិភពលោក (WHO) បានព្រមានថា អូមីក្រុង បង្កហានិភ័យខ្ពស់ នៃការចម្លង ។
នៅក្នុងសន្និសីទសារព័ត៌មានមួយ កាលពីថ្ងៃព្រហស្បតិ៍ មន្ត្រីសុខាភិបាល បានអោយដឹងថា អ្នកជំងឺ២នាក់នោះ ដែលឆ្លងអូមីក្រុងនេះ បានបង្ហាញរោគសញ្ញាស្រាល ។ អ្នកជំងឺ ត្រូវបានគេដាក់ឲ្យនៅដាច់ដោយឡែក ។
ក្រុមមន្ត្រី បាននិយាយទៀតថា អ្នកទាក់ទងជាមួយនឹងអ្នកជំងឺ ដោយផ្ទាល់ចំនួន ២៤នាក់ និងដោយប្រយោលចំនួន ២៤០នាក់ ត្រូវបានតាមដាន ហើយពួកគេបានធ្វើតេស្ត អវិជ្ជមាន ទាំងអស់គ្នា ។
ចាប់ពីថ្ងៃពុធនេះ ប្រទេសឥណ្ឌាបានប្រកាសការរឹតបន្តឹងការធ្វើដំណើរថ្មី សម្រាប់អ្នកដំណើរអន្តរជាតិ ដែលមកដល់ពីប្រទេស ដែលមានហានិភ័យ រួមមាន ៖ ចក្រភពអង់គ្លេស អាហ្វ្រិកខាងត្បូង នូវែលសេឡង់ បង់ក្លាដែស ហុងកុង និងអ៊ីស្រាអែល ។
ពួកគេនឹង ត្រូវបានធ្វើតេស្តនៅពេលមកដល់ ហើយមិនអាចចាកចេញពីព្រលានយន្តហោះ ដោយគ្មានលទ្ធផលតេស្តរបស់ពួកគេទេ ។ អ្នកដែលធ្វើតេស្ត វិជ្ជមាន នឹងត្រូវបានដាក់ឲ្យនៅដាច់ពីគេ និងព្យាបាល ។ អ្នកដែលធ្វើតេស្ត អវិជ្ជមាន ត្រូវដាក់ឲ្យនៅដាច់ពីគេនៅផ្ទះ រយៈពេល ០៧ថ្ងៃ ហើយត្រូវធ្វើតេស្តម្តងទៀតនៅថ្ងៃទីប្រាំបី ៕
ចែករំលែកព័តមាននេះ