រាជធានីភ្នំពេញ ៖ នៅថ្ងៃទី៣០ ខែមីនា លោក ច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ និងលោក គ្រីស្យង់ កូណង់ ឯកអគ្គរដ្ឋទូតបារាំងប្រចាំកម្ពុជា បានអញ្ជើញបើកសិក្ខាសាលាមួយស្ដីពីកាលានុវត្ដភាពនៃការអភិវឌ្ឍន៍សេដ្ឋកិច្ចប្រទេសកម្ពុជា «បរិស្ថាន កសិកម្ម និងអភិវឌ្ឍន៍ ៖ តើកម្ពុជាជ្រើសយកជម្រើសណា?» ក្នុងក្របខណ្ឌនៃការរៀបចំកិច្ចពិភាក្សាមួយចំនួនលើប្រធានបទផ្សេងៗ ។ សិក្ខាសាលានេះនឹងផ្ដោតលើការជជែកពិភាក្សាអំពីវិស័យផ្សេងៗនៃសេដ្ឋកិច្ចកម្ពុជា ការផលិតស្រូវ ការអភិវឌ្ឍន៍ចីរភាពក្នុងផ្នែកកសិកម្មនិងព្រៃឈើ អគ្គិសនីកម្ម ការផ្គត់ផ្គង់ទឹកនៅតំបន់ជនបទ ការចិញ្ចឹមសត្វ និងការគ្រប់គ្រងហានិភ័យផ្នែកសុខភាព ។
វិស័យទាំងនេះ ដែលជាមុខព្រួញសកម្មភាពអាទិភាពរបស់រាជរដ្ឋាភិបាលកម្ពុជា អាចនាំទៅដល់ភាពជាដៃគូថ្មីៗថែមទៀត ដោយមានការរួមសហការគ្នារវាងអ្នកជំនាញបារាំង និងផ្នែកឯកជនបារាំង និងកម្ពុជា ។ ក្នុងកិច្ចពិភាក្សាខាងលើនេះ ក៏មានបង្ហាញផងដែរពីលទ្ធផលនៃការសិក្សាស្រាវជ្រាវលើដំណាំស្រូវនៅកម្ពុជា ដែលបានធ្វើឡើងដោយឧត្ដមក្រុមប្រឹក្សាសេដ្ឋកិច្ចជាតិកម្ពុជា ក្រោមជំនួយហិរញ្ញប្បទានរបស់ទីភ្នាក់ងារអភិវឌ្ឍន៍បារាំង (AFD) ។
វាគ្មិនដែលឡើងធ្វើបទអន្ដរាគមន៍ក្នុងសិក្ខាសាលា ដែលរៀបចំឡើងរួមគ្នាដោយការិយាល័យសេដ្ឋកិច្ចប្រចាំស្ថានទូតបារាំង រួមជាមួយទីភ្នាក់ងារAFD នេះ រួមមាន លោក ហង់ជួន ណារ៉ុន រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ លោក ឡត រស្មី អគ្គលេខាធិការនៃក្រសួងកសិកម្ម រុក្ខាប្រមាញ់ និងនេសាទ ព្រមទាំងលោក ទុន លាន អគ្គនាយកនៃអគ្គនាយកដ្ឋានថាមពលនៃក្រសួងឧស្សាហកម្ម រ៉ែ និងថាមពល។ ក្នុងចំណោមតំណាងផ្នែកឯកជន គេសង្កេតឃើញផងដែរនូវវត្ដមានរបស់អ្នកឧកញ៉ាម៉ុង ឫទ្ធី ព្រឹទ្ធសមាជិកកម្ពុជា ។ រីឯខាងភាគីបារាំងមានអ្នកជំនាញមកពីក្រសួងកសិកម្ម ក្រុមហ៊ុន Agreenium និងទីភ្នាក់ងារ AFD ព្រមទាំងតំណាងក្រុមហ៊ុនមួយចំនួនដូចជា ក្រុមហ៊ុន Marbour, Clause និង Asvelis បានអញ្ជើញមកចូលរួមជាពិសេស ដើម្បីបង្ហាញពីចំណេះធ្វើរបស់ខ្លួនក្នុងវិស័យអភិវឌ្ឍន៍កសិកម្ម និងការគ្រប់គ្រងហានិភ័យផ្នែកសុខភាពក្នុងក្របខណ្ឌផ្នែកចិញ្ចឹមសត្វ ។ អ្នកគ្រប់គ្រងអង្គការក្រៅរដ្ឋាភិបាលបារាំងដែលមានវត្ដមាននៅកម្ពុជាដូចជា អង្គការ CIRAD (មានជំនាញខាងស្រាវជ្រាវកសិកម្ម) អង្គការ GRET (ក្រុមស្រាវជ្រាវ និងផ្លាស់ប្ដូរបច្ចេកវិទ្យា) ក៏បានចូលរួមផងដែរក្នុងសិក្ខាសាលានេះ ។ ម្ចាស់ជំនួយដែលធ្វើសកម្មភាពក្នុងវិស័យទាំងនេះបានផ្ដល់វិភាគទានក្នុងកិច្ចពិភាក្សាខាងលើនេះដែរ ។
នៅចុងបញ្ចប់នៃសិក្ខាសាលា ឯកអគ្គរដ្ឋទូតបារាំងបានប្រគល់ជាផ្លូវការនូវផែនការអគ្គិសនីកម្មជនបទជូនលោកអ៊ិត ប្រាំង រដ្ឋលេខាធិការក្រសួងឧស្សាហកម្ម រ៉ែ និងថាមពល ។ ការសិក្សាស្រាវជ្រាវនេះ ដែលធ្វើឡើងដោយក្រុមហ៊ុនផ្ដល់ប្រឹក្សា និងវិស្វកម្មIED (នវានុវត្ដន៍ ថាមពល អភិវឌ្ឍន៍) និងឧបត្ថម្ភថវិកាដោយមូលនិធិបារាំង FASEP បង្ហាញយ៉ាងលម្អិតអំពីគម្រោងនៃការធ្វើអគ្គិសនីកម្មនៅក្នុងខេត្ដទាំង២៣នៅក្នុងប្រទេសកម្ពុជា លើកលែងតែរាជ ធានីភ្នំពេញ ។ ជាពិសេស ការសិក្សានេះបានលើកឡើងអំពីលទ្ធភាពក្នុងការផ្ដល់ជំនួយដល់ការបង្កើតថាមពលកកើតឡើងវិញ ដែលអាចបើកផ្លូវដល់ការអនុវត្ដន៍គម្រោងថ្មីៗមួយចំនួនទៀតក្នុងវិស័យនេះ ដោយសហការគ្នារវាងទីភ្នាក់ងារ AFD និងផ្នែកឯកជនកម្ពុជា ៕
ចែករំលែកព័តមាននេះ