ខេត្តកំពង់ស្ពឺ ៖ ទំនាស់ដីបឹងធារាសាស្ត្រមួយកន្លែងកំពុងផ្ទុះរឿងតវ៉ា ដោយសារភាគីម្ខាងអះអាងថា មានលិខិតកាន់កា.ប់ស្របច្បាប់ ចំណែកភាគីម្ខាងទៀត ដែលមានពលរដ្ឋមួយភូមិបានអះអាងថា ជាបឹងរួមតាំងពីដើម
ខេត្តកំពង់ស្ពឺ ៖ ទំនាស់ដីបឹងធារាសាស្ត្រមួយកន្លែងកំពុងផ្ទុះរឿងតវ៉ា ដោយសារភាគីម្ខាងអះអាងថា មានលិខិតកាន់កាប់ស្របច្បាប់ ចំណែកភាគីម្ខាងទៀត ដែលមានពលរដ្ឋមួយភូមិបានអះអាងថា ជាបឹងរួមតាំងពីដើមមកមិនគួរណាវាស់ពុះកាត់ឱ្យឯកជនកាន់កាប់ធ្វើជា កម្មសិទ្ធិឡើយ ទីតាំងបឹងធារាសាស្ត្រនេះ ស្ថិតក្នុងឃុំព្រៃវិហារ ស្រុកគងពិសី ។ ការស្នើសុំមិនឱ្យចេញប្លង់នេះធ្វើឡើងកាលពីល្ងាចថ្ងៃទី១១ ឧសភា បន្ទាប់ពីអ្នកភូមិទាំងអស់ដឹងថា នៅព្រឹកថ្ងៃទី១២ ឧសភា ២០១៦នេះ ក្រុមមន្ត្រីជំនាញបានចុះទៅកាន់កន្លែងទំនាស់នោះ ។
លោក ជុំ សុថុល មេភូមិព្រៃកេសបានឱ្យដឹងថា ក្រុមប្រជាពលរដ្ឋក្នុងភូមិមានចំនួនសរុប១០៨គ្រួសារ ដែលបានមកជួបជុំគ្នានេះក្នុងគោលបំណងស្នើឱ្យជំនាញ និងអាជ្ញាធរកុំចេញប្លង់កម្មសិទ្ធិដីបឹងធារាសាស្ត្រនេះទៅឱ្យឯកជនកាន់កាប់ ។ ការដែលមិនឲ្យចេញប្លង់កម្មសិទ្ធិនេះ គឺពលរដ្ឋទាំងអស់មានបំណងរក្សាទុកដីបឹងធារាសាស្ត្រនេះប្រើប្រាស់ជាប្រយោជន៍រួម។ ការដែលពួកគាត់តវ៉ានេះសំអាងថា តាំងពីឆ្នាំ១៩៧៩មក គឺប្រជាពលរដ្ឋបានអាស្រ័យផលពីបឹងមួយនេះគ្រប់ក្រុមគ្រួសារ មិនថាគ្រួសារណាជាគ្រួសារណាទេ ស្រាប់តែនៅពេលថ្មីៗនេះបែរជាមន្ត្រីជំនាញសុរិយោដី និងមន្ត្រីធនធានទឹកបានចុះមកបាញ់ប្លង់(ចុចជីភីអេស)ដើម្បីចេញប្លង់កម្មសិទ្ធិទៅឱ្យបុគ្គលឯកជនកាន់កាប់ ទៅវិញទើបផ្ទុះការតវ៉ាឡើង ។
ពាក់ព័ន្ធនឹងបញ្ហានេះដែរលោក ដួង សយមេឃុំព្រៃវិហារបានឱ្យដឹងថា ដីដែលមានបញ្ហានេះជាដីដែលមានប័ណ្ណកម្មសិទ្ធិរបស់គេត្រឹមត្រូវចេញដោយអាជ្ញាធរឃុំតាំងពីឆ្នាំ១៩៩៤មកម្ល៉េះ ។ តែលោកមេឃុំក៏បានបញ្ជាក់ផងដែរថា ដីដែលកំពុងមានបញ្ហានេះ គឺជាដីទំនប់ធារាសាស្ត្រពិតមែន ចំណែកអ្នកកាន់កាប់មិនមែនអ្នកភូមិព្រៃកេសនេះទេ គឺមកពីភូមិទួលត្បែងនិងភូមិដំរីស្លាប់(ភូមិទាំង២ស្ថិតនៅក្នុងឃុំព្រៃវិហារ) ។ នៅពេលថ្មីៗនេះ អ្នកដែលកាន់កាប់ដីបឹងបានស្នើសុំធ្វើប័ណ្ណកម្មសិទ្ធិក៏ត្រូវប្រជាពលរដ្ឋនៅភូមិព្រៃកេសប្រឆាំងតវ៉ាមិនឱ្យជំនាញចេញប្លង់ឡើយ ។
ទាក់ទិននឹងរឿងនេះដែរ លោក ញា៉ញ់ ជាបហ៊ង ប្រធានមន្ទីរធនធានទឹកខេត្តកំពង់ស្ពឺដែលធ្លាប់ចុះទៅដល់កន្លែងទំនាស់នោះបានឱ្យដឹងថា ពេលនេះលោកកំពុងរកដំណោះស្រាយណាមួយដែលសមស្របដើម្បីកុំឱ្យស្ថានការណ៍កាន់តែតឹងតែងខ្លាំង ។ ទោះជាយ៉ាងណា លោកបានបញ្ជាក់ថា ជាធម្មតាដីទំនប់បឹងធារាសាស្ត្រ គឺមិនមានជំនាញណាមួយអាចចេញប្លង់ឱ្យកាន់កាប់ជាកម្មសិទ្ធិឯកជនបានឡើយ ។
បើតាមព្រឹទ្ធាចារ្យមួយរូបបានប្រាប់ថា ទំនប់ធារាសាស្ត្រនេះ កសាងឡើងក្នុងកំឡុងរបបប៉ុលពត ៣ឆ្នាំ៨ខែនិង២០ថ្ងៃ ដែលប្រើកម្លាំងមនុស្សរាប់រយនាក់ ហើយក៏មានអ្នកបាត់បង់ជីវិតមិនតិចដែរក្នុងការសាងសង់ទំនប់ធារាសាស្ត្រមួយនេះ ។ ហេតុអ្វីបានជាអស់លោកជំនាញប្រុងចេញប្លង់ឱ្យក្លាយទៅជាកម្មសិទ្ធិឯកជនទៅវិញ ៕
ចែករំលែកព័តមាននេះ