រាជធានីភ្នំពេញ ៖ ថ្ងៃទី១១ ខែឧសភា ឆ្នាំ២០១៦ វីង ដែលជាធនាគារឈានមុខគេក្នុងការផ្តល់សេវាហិរញ្ញវត្ថុតាមទូរស័ព្ទដៃនៅកម្ពុជា បានចុះកិច្ចព្រមព្រៀងលើកិច្ចសហប្រតិបត្តិការជាមួយក្រុមហ៊ុន យីន កុក ដែលជាក្រុមហ៊ុនផ្តល់សេវាកម្មអាហារ ជាមួយក្រុមហ៊ុនម៉ាកល្បីៗអន្តរជាតិ មានដូចជា ហាងកាហ្វេ T&C ហាងភីហ្សាដូមីណូស ហាងមាន់បំពងកូរ៉េក្យូឆុន ហាងបឺហ្គើរ Lotteria ហាងអាហារ The Asian Kitchen និងហាងនំបុ័ង Tous les Jours ក្នុងការផ្តល់ជូនប្រព័ន្ធទូទាត់ប្រាក់ដ៏ទំនើបសម្រាប់ទីផ្សារកម្ពុជា។ កិច្ចសហប្រតិបត្តិការនេះ នឹង ផ្តល់លទ្ធភាពដល់ក្រុមហ៊ុនវីង ក្នុងការផ្តល់ជូនបទពិសោធន៍នៃការទូទាត់ប្រាក់ដ៏អស្ចារ្យដល់ក្រុមហ៊ុន យីនកុក ដែលធ្វើឲ្យក្រុមហ៊ុនមានភាពពិសេសដាច់គេពីក្រុមហ៊ុនប្រកួតប្រជែងដទៃទៀត ។ នេះជាបទពិសោធន៍ថ្មីប្លែកមួយកម្រិតទៀតក្នុងវិស័យសេវាកម្មអាហារ ។
លោក ចូចូ ម៉ាឡូឡូស អគ្គនាយកក្រុមហ៊ុនវីង បានមានប្រសាសន៍ថា៖ នេះជាការប្តេជ្ញាចិត្តដ៏មុតមាំរបស់វីង ក្នុងផ្តល់ជូនប្រជាជនកម្ពុជានូវសេវាកម្មហិរញ្ញវត្ថុប្រកបដោយភាពងាយស្រួល រហ័ស និងសុវត្ថិភាព ជាពិសេសតាមរយៈក្រុមហ៊ុនយីនកុក ដែលជាបណ្តាញក្រុមហ៊ុននាំយកនូវម៉ាកអន្តរជាតិ ល្បីៗមកទីផ្សារកម្ពុជា ។ យើងជឿថា យើងនឹងអាចបន្តសម្រេចបាននូវការបេ្តជ្ញាចិត្តនេះ ។
លោក ចូចូ ម៉ាឡូឡូស ក៏បានបន្ថែមទៀតថា យើងពិតជាមានមោទនភាពសម្រាប់កិច្ចសហប្រតិបត្តិការនេះ ជាមួយសហគ្រាសឯកជនដូចជាក្រុមហ៊ុន យីនកុក ។ វីង នឹងបន្តផ្តល់ជូនសេវាកម្មហិរញ្ញវត្ថុកាន់តែទូលំទូលាយសម្រាប់ទីផ្សារកម្ពុជា ។
លោកគួច សុខលី ជាអគ្គនាយក និងប្រធានគ្រប់គ្រងទូទៅរបស់ក្រុមហ៊ុន យីនកុក បានថ្លែង ថា ភាពជាដៃគូរបស់យើងជាមួយក្រុមហ៊ុន វីង បង្ហាញពីការប្ដេជ្ញាចិត្តរបស់យើងចំពោះអតិថិជនរបស់យើងតាមរយៈការធ្វើឲ្យកាន់តែមានភាពងាយស្រួលដល់ពួកគេក្នុងការប្រើសេវារបស់ក្រុមហ៊ុនវីង ។ យើងសម្លឹងឃើញអនាគតដ៏មានសក្តានុពលក្នុងការពង្រីកខ្លួនរបស់វីង នៅក្នុងប្រទេសកម្ពុជា ដែលជាការងាយស្រួលដល់អតិថិជនធ្វើការចំនាយដោយ មិនចាំបាច់ចាយលុយសុទ្ធ នៅកន្លែងដោយផ្ទាល់ តែពួកគេអាចចំនាយតាមទូរស័ព្ទ និងតាមអនឡាញ ឬតាមបណ្តាញសេវាកម្ម ផ្សេងៗដែលវីងបានផ្តល់ឱ្យ ។ នេះជាភាពងាយស្រួលមួយទៀតដែលវីងជាដៃគូសហការយើងអាចជួយដល់ក្រុមហ៊ុនយើងបាន។ កិច្ចសហការនេះ ជាការសហការដែលផ្តល់ផលចំនេញទាំងសងខាង ជាពិសេសធ្វើអោយអតិថិជនវីង សប្បាយចិត្ត និងអតិថិជនរបស់ក្រុមហ៊ុនយីនកុកសប្បាយចិត្តដូចគ្នា ។ ទីពីរទៀតសោត កិច្ចព្រមព្រៀងនេះក៏ជួយសម្រួលដល់ភាពងាយស្រួលដល់បុគ្គលិកក្រុមហ៊ុនយិនកុកទាំងមូលដែលមានផ្ទះនៅតាមបណ្តាខេត្តនានា ពួកគាត់អាចផ្ទេរប្រាក់តាមរយះវីងដែលមានភ្នាក់ងារវីងស្ទើរគ្រប់កន្លែងក្នុងប្រទេសកម្ពុជា ។
អំពីក្រុមហ៊ុនយីន កុក ជាក្រុមហ៊ុនដែលនាំចូលនៅសិទ្ធិផ្តាច់មុខផ្នែកសេវាកម្មអាហារ ដែលធានាប្រកបដោយគុណភាពស្តង់ដារ និងសេវាកម្មខ្ពស់ជាមួយហាង ល្បីៗពីបរទេសមានដូចជា ហាងភីហ្សាដូមីណូស ហាងមាន់បំពងកូរ៉េក្យូឆុន ហាងនំប៉័ង Tous Les Jours ហាងបឺហ្គើរ Lotteria ហាងអាហារThe Asian Kitchen និងហាងកាហ្វេ T&C ។ ដោយមើលឃើញពីវិស័យរីកចម្រើនផ្នែកចំនីអាហារកាន់តែមានភាពសម្បូរបែប ក្រុមហ៊ុនយីនកុកតែងតែពាំនាំអ្វីដែលជាទំនោរថ្មី និងពេញនិយមសម្រាប់ប្រជាជនអាស៊ី ។ យើងធានាថាគ្រប់ហាង ដែលទទួលសិទ្ធិផ្តាច់មុខដោយក្រុមហ៊ុនយីនកុក នឹងទទួលបម្រើ ស្វាគមន៍អតិថិជនយ៉ាងដិតដល់ ជាមួយនឹងភាពកក់ក្តៅ ជាមួយនឹងសេវាកម្មដ៏ឥតខ្ចោះ ៕
ចែករំលែកព័តមាននេះ