រាជធានីភ្នំពេញ ៖ Yeo’s ដែលជាក្រុមហ៊ុនម្ហូបអាហារនិងភេសជ្ជៈមានកេរ្តិ៍ឈ្មោះល្បីល្បាញលំដាប់អន្តរជាតិ ហើយជាក្រុមហ៊ុនផ្គត់ផ្គង់ភេសជ្ជៈនាំមុខគេនៅកម្ពុជា បានរៀបចំជាថ្មីទៀតហើយនូវកម្មវិធីពិសាអាហារពេលល្ងាចជាមួយអ្នកម្តាយនៅរាជធានីភ្នំពេញ កាលពីថ្ងៃទី៧ ខែឧសភា ឆ្នាំ២០១៦ កន្លងមកនេះ ។ ដោយមានការគាំទ្រយ៉ាងច្រើនសន្ធឹកសន្ធាប់ និងការទទួលបានជោគជ័យពីកម្មវិធីពិសាអាហារពេលល្ងាចជាមួយអ្នកម្តាយរបស់Yeo’s ដ៏ធំសម្បើមអស្ចារ្យ និងដំបូងគេបង្អស់នៅកម្ពុជា កាលពីឆ្នាំមុន ស្របតាមរយៈសំណូមពរជាច្រើនរបស់អ្នកគាំទ្រ Yeo’s បានជំរុញឲ្យក្រុមហ៊ុន សម្រេចរៀបចំនូវព្រឹត្តិការណ៍ដ៏រំភើប និងមានអត្ថន័យនេះសាជាថ្មីម្តងទៀត ដើម្បីជាការអបអរសាទរនូវការដឹងគុណ និងបង្ហាញសេចក្តីស្រឡាញ់របស់កូនៗចំពោះអ្នកម្តាយក្នុងព្រឹត្តិការណ៍ពិសាអាហារដ៏ពិសេសនេះផងដែរ ។
សមាជិកគ្រូសារប្រមាណ៥០០គ្រួសារ ដោយរួមបញ្ចូលទាំងលោកឪពុកផង បានចូលរួមក្នុងកម្មវិធីជាមួយឈុតសម្លៀកបំពាក់ពណ៌ក្រហម ដើម្បីបង្ហាញនូវសេចក្តីស្រឡាញ់របស់ខ្លួនចំពោះអ្នកម្តាយ ។ ក្នុងកម្មវិធីពេលល្ងាចនោះដែរ មានការផ្តល់ជូនអាហារយ៉ាងសម្បូរបែបជាលក្ខណៈប៊ូហ្វេ ជាមួយការពិសាភេសជ្ជៈ Yeo’s ដោយសេរី ព្រមទាំងការសម្តែងពីសំណាក់តារាចម្រៀងល្បី និងមានប្រជាប្រិយភាពគឺលោក ខេម ក៏ដូចជាការចាក់បញ្ចាំងនូវវីដេអូឃ្លីប និងការអាននូវសំបុត្ររំជួលចិត្ត ដែលសរសេរដោយកូនប្រុសស្រីជាច្រើន ទៅកាន់អ្នកម្តាយជាទីស្រឡាញ់ ។
អស់ជាច្រើនសប្តាហ៍នៅមុនកម្មវិធីពិសេសនៃការពិសាអាហារពេលល្ងាចនេះមកដល់ ក្រុមហ៊ុន Yeo’s ក៏បានរៀបចំកម្មវិធី សំបុត្រផ្ញើជូនអ្នកម្តាយ ឬ #Lettertomom តាមរយៈប្រព័ន្ធឌីជីថលដែលអាចទាក់ទាញអ្នកចូលរូមជាង ១.០០០នាក់ ដើម្បីសរសេរជាសំបុត្របង្ហាញពីសេចក្តីស្រឡាញ់ផ្ញើជូនជាពិសេសទៅកាន់អ្នកម្តាយរបស់ខ្លួន ។ វាគឺជាការបញ្ចប់ដ៏មានន័យខ្លឹមសារបំផុតចំពោះការពិសាអាហារក្នុងទិវាដឹងគុណអ្នកម្តាយ នៅពេលដែល Yeo’s បានប្រគល់ប៉េងប៉ោងរាងបេះដូង ភ្ជាប់ជាមួយនូវកូនលិខិតតូចមួយសរសេរដោយកូនៗរបស់គាត់ចំពោះរូបគាត់ផ្ទាល់ ៕
ចែករំលែកព័តមាននេះ