ខេត្តព្រះសីហនុ៖ តាមការគម្រោងទុក សម្តេចតេជោ នាយករដ្ឋមន្ត្រី ហ៊ុន សែន នឹងអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ផ្លូវ ៣៤ខ្សែ និងសមិទ្ធផលនានា ក្នុងខេត្តព្រះសីហនុ នាព្រឹកថ្ងៃទី២ ខែធ្នូ ឆ្នាំ២០២១។ សម្តេចតេជោ ហ៊ុន សែន បានអញ្ជើញទៅដល់ខេត្តព្រះសីហនុ កាលពីរសៀលថ្ងៃទី១ ខែធ្នូ ឆ្នាំ២០២១ និងបានអញ្ជើញពិនិត្យសមិទ្ធផលនានា ក្នុងខេត្តព្រះសីហនុ ពេលសម្តេច អញ្ជើញមកដល់ទឹកដីឆ្នេរសមុទ្រនេះ។
សមិទ្ធផលផ្លូវថ្មី ៣៤ខ្សែ រួមទាំងសមិទ្ធផលផ្សេងទៀត ក្នុងខេត្តព្រះសីហនុ ដែលបើកសម្ពោធនាពេលនេះ នឹងត្រូវបើកទទួលភ្ញៀវទេសចរ និងបើកសេដ្ឋកិច្ចសង្គមឡើងវិញ នៅចុងឆ្នាំ២០២១ នេះ។ ខេត្តព្រះសីហនុ ក៏នឹងត្រូវធ្វើជាម្ចាស់ផ្ទះ ក្នុងកិច្ចប្រជុំវេទិកាអាស៊ាន នៅខែមករា ឆ្នាំ២០២២ ផងដែរ។
សូមរម្លឹកថា សម្ដេចតេជោ ហ៊ុន សែន នាយករដ្ឋមន្ត្រី បានសម្រេចដកថវិកាសន្សំរបស់ជាតិ ចំនួន ១០០លានដុល្លារ ដើម្បីយកមកធ្វើការអភិវឌ្ឍន៍ ខេត្តព្រះសីហនុ ដោយបានផ្ដល់គោលនយោបាយ “ស្លឹកត្នោត ខ្ចប់ស្ករត្នោត” ប្រើប្រាស់ធនធាន ក្នុងខេត្ត ដើម្បីកសាងហេដ្ឋារចនាសម្ព័ន្ធផ្លូវ ៣៤ខ្សែ ក្នុងខេត្តព្រះសីហនុ។ ការដ្ឋានសាងសង់ផ្លូវថ្មីទាំងនេះ បានបើកការដ្ឋាន កាលពីថ្ងៃទី១៦ ខែវិច្ឆិកា ឆ្នាំ២០១៩។ ផ្លូវទាំង ៣៤ខ្សែ មានប្រវែង ៨៤,៥០៥ គីឡូម៉ែត្រ ស្មើជាង ១៤០០០០០ម៉ែត្រការ៉េ ស្ថាបនាដោយក្រុមហ៊ុន ក្នុងស្រុកចំនួន ៨ក្រុមហ៊ុន។
ចំណែកផ្លូវតភ្ជាប់ពីតំបន់ទំនប់រលក ទៅមហាវិថីសម្តេចសង្ឃ ទេព វង្ស ភ្ជាប់ទៅផ្លូវជាតិលេខ៤ ក្នុងស្រុកព្រៃនប់ ដែលនឹងស្ថាបនាអាចរួចរាល់នៅខែតុលា ឆ្នាំ២០២២ ការស្ដារអូរប្រឡាយ និងកសាងផ្លូវមួយចំនួនផ្សេងទៀត ក្នុងក្រុងព្រះសីហនុ។
ការអភិវឌ្ឍហេដ្ឋារចនាសម្ព័ន្ធផ្លូវថ្នល់ នៅខេត្តព្រះសីហនុ ដែលដាក់សម្ពោធឲ្យប្រើប្រាស់នេះ ត្រូវបានរៀបចំជាផ្លូវបេតុង បេទីម ចិញ្ចើមក្រានីត កម្រាលក្រានីត សួនជំរាបទឹក ការដាំរុក្ខជាតិ ភ្លើងបំភ្លឺសាធារណៈ ភ្លើងស្តុបចរាចរ និងការបំពាក់កាំម៉េរាសុវត្ថិភាព។ល។ ក្រៅពីការរៀបចំហេដ្ឋារចនាសម្ព័ន្ធ ក៏មានការរៀបចំសាងសង់ខ្ចូស នៅឆ្នេរអូឈើទាល តាមគំរូប្លង់គោលរបស់គណ:កម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជាផងដែរ។ នៅតាមបណ្តោយឆ្នេរលំហរសាធារណ: គណ:កម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា បានសាងសង់បន្ទប់ទឹកសាធារណៈចំនួន ៧ កំពុងដាក់ឲ្យដំណើរការ និង ២ទៀត ត្រៀមបើកឲ្យដំណើរការ នាពេលខាងមុខ។
លើសពីនេះ ខេត្តព្រះសីហនុ ក៏មានអាងប្រព្រឹត្តកម្មទឹកកខ្វក់ចំនួន ៣ ក្នុងនោះ ២សាងសង់រួច បានដាក់ឲ្យដំណើរការ អាងប្រព្រឹត្តកម្មទី១ មានសមត្ថភាពច្រោះទឹកកខ្វក់ ៥,២០០ម៉ែត្រគូប ក្នុងមួយថ្ងៃ អាងប្រព្រឹត្តកម្មទី២ មានសមត្ថភាពច្រោះទឹកកខ្វក់ ៧,២០០ម៉ែត្រគូប ក្នុងមួយថ្ងៃ។ អាងប្រព្រឹត្តកម្មទី៣ កំពុងដំណើរការសាងសង់ មានសមត្ថភាពច្រោះទឹកកខ្វក់បាន ២០,០០០ម៉ែត្រគូប ក្នុងមួយថ្ងៃ។
សមិទ្ធផលទាំងអស់នេះ បានធ្វើឲ្យខេត្តព្រះសីហនុ ប្រែមុខមាត់ថ្មី ដែលរាជរដ្ឋាភិបាលកំណត់យកខេត្តព្រះសីហនុ ជាតំបន់សេដ្ឋកិច្ចពិសេស គំរូពហុបំណង នាពេលខាងមុខ។
សូមរម្លឹកថា សមិទ្ធផលនានា នៃគម្រោងសាងសង់ផ្លូវ ៣៤ ខ្សែ នៅខេត្តព្រះសីហនុ ដើមឡើយ ត្រូវបានគ្រោងនឹងសម្ពោធដាក់ឱ្យប្រើប្រាស់ នៅថ្ងៃទី៩ ខែមេសា ឆ្នាំ២០២១ គឺនៅមុនពេលបុណ្យចូលឆ្នាំថ្មី។ ប៉ុន្តែដោយសារតែបញ្ហាកូវីដឆ្លងរាលដាល ក្នុងព្រឹត្តិការណ៍សហគមន៍ ថ្ងៃ២០កុម្ភៈ នាំឲ្យគម្រោងសម្ពោធនោះ ត្រូវពន្យារពេល រហូតដល់ថ្ងៃទី២ ខែធ្នូ ឆ្នាំ២០២១ នេះ៕
ចែករំលែកព័តមាននេះ