ប្រទេសបារាំងបានកត់ត្រាករណីឆ្លងជំងឺកូវីដ១៩ ប្រចាំថ្ងៃចំនួន ៤៧០០០ កាលពីថ្ងៃអង្គារ  ដែលជាចំនួនខ្ពស់បំផុតចាប់តាំងពីនិទាឃរដូវ នេះបើយោងតាមរដ្ឋមន្ត្រីសុខាភិបាលបារាំង Olivier Véran។

ទិន្នន័យបង្ហាញថា វាជាលើកទីមួយចាប់តាំងពីខែមេសា ដែលករណីកូវីដនៅក្នុងប្រទេសនេះបានកើនលើសការឆ្លងចំនួន ៤៣០០០ករណី ក្នុងរយៈពេល ២៤ម៉ោង។ យ៉ាងហោចណាស់មានការឆ្លងចំនួន ៤៣៦៩៨ករណី  ត្រូវបានកត់ត្រានៅថ្ងៃទី២០ ខែមេសាឆ្នាំនេះ។

លោករដ្ឋមន្រ្តី Véran បានប្រាប់សភាជាតិបារាំងថា៖ “ស្ថានការណ៍កាន់តែអាក្រក់ទៅៗហើយ។”

រលកទីប្រាំនៃជំងឺរាតត្បាតបានវាយប្រហារប្រទេសបារាំងយ៉ាងខ្លាំង បើទោះបីជាប្រទេសនេះមានអត្រាចាក់វ៉ាក់សាំងខ្ពស់បំផុតមួយនៅអឺរ៉ុបក៏ដោយ។ យោងតាមទិន្នន័យរបស់រដ្ឋាភិបាល យ៉ាងហោចណាស់ ៧៥.៤% នៃចំនួនប្រជាជនសរុបត្រូវបានចាក់វ៉ាក់សាំងពេញលេញ ដើម្បីការពារនឹងជំងឺនេះ។

ប្រទេសបារាំងមិនបានប្រើគោលនយោបាយរឹតបន្តឹងដូចជាការបិទខ្ទប់ ឬបម្រាមគោចរដើម្បីទប់ទល់នឹងរលកថ្មីនេះទេ ប៉ុន្តែបានពង្រឹងច្បាប់បច្ចុប្បន្នដែលមានរួចហើយ រួមទាំងប័ណ្ណសុខភាព និង ការពាក់ម៉ាស់ជាប្រចាំ។

គួរបញ្ជាក់ថា ការកើនឡើងនេះ គឺស្របពេលជាមួយនឹងការរកឃើញកូវីដបម្លែងថ្មីអូមីក្រុង។ ថ្វីបើវាធ្វើឱ្យមានការព្រួយបារម្ភជាសាកលក៏ដោយ គេនៅមិនទាន់ដឹងថា វាធ្ងន់ឬក៏ស្រាលនៅឡើយទេ។ វានឹងចំណាយពេលពីរបីសប្តាហ៍ នៃការធ្វើស្ទាបស្ទង់ ដើម្បីដឹងថាតើកូវីដបម្លែងថ្មី អូមីក្រុង ឆ្លងលឿនជាងប្រភេទដែលតា ឬក៏អត់ ហើយថា​ តើវាអាចគេចចេញពីការការពាររបស់វ៉ាក់សាំងដែរឬទេ។ អ្នកវិទ្យាសាស្ត្រក៏នឹងកំពុងរកមើលថាតើវាបណ្តាលឱ្យមានជំងឺធ្ងន់ធ្ងរជាងនេះ ឬ ទាមទារការព្យាបាលតាមរបៀបផ្សេងពីកូវីដប្រភេទមុនៗ៕