ខេត្តព្រះសីហនុ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី១ ធ្នូ ២០២១នេះ…
ខេត្តព្រះសីហនុ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី១ ធ្នូ ២០២១នេះ បានមានប្រសាសន៍ថា ប្រជាពលរដ្ឋខេត្តព្រះសីហនុ ដែលខ្វះខាតទឹកសាបសម្រាប់ចិញ្ចឹមត្រី ឬប្រើប្រាស់ស្រោចដំណាំ អាចមកទទួលយកទឹក ដែលចម្រោះស្អាចរួច នៅទីតាំងចម្រោះទឹកកខ្វក់ ចំនួន ៣ទីតាំង ក្នុងខេត្តព្រះសីហនុ ដោយមិនគិតប្រាក់ទេ ។
សម្តេចតេជោ ហ៊ុន សែន ថែ្លងបែបនេះ នាឱកាសអញ្ជើញចុះពិនិត្យទីតាំងប្រព័ន្ធចម្រោះទឹកកខ្វក់ ជាបច្ចេកវិទ្យាទំនើប ចុងក្រោយមកពីប្រទេសអ៊ីស្ត្រាអែល ដែលសម្លាប់មេរោគ ដោយប្រព័ន្ធឡាស៊ែរ មុននឹងទម្លាក់ចូលសមុទ្រ ក្នុងខេត្តព្រះសីហនុ ដែលត្រៀមដាក់សម្ពោធនៅថ្ងៃទី២ ខែធ្នូ ស្អែកនេះ ។
សម្តេចតេជោ ហ៊ុន សែន បានថ្លែងដូច្នេះថា ៖ បើនៅប្រទេសគេជឿនលឿន គេអាចប្រើប្រាស់ទឹកនេះ ទៅជាទឹកទទួលទានបាន ប៉ុន្តែយើងមិនអំពាវនាវឲ្យប្រជាជនយើងទទួលទានទឹកនេះទេ ប៉ុន្តែក្នុងករណីប្រជាជនយើងខ្វះទឹកសាប ដើម្បីចិញ្ចឹមត្រី អាចមកយកពីកន្លែងចម្រោះទឹកទាំង ៣ទីតាំង ដែលជាមធ្យមប្រព័ន្ធអាចចម្រោះទឹកស្អាតជាង ៣ម៉ឺនម៉ែត្រគូបក្នុង១ថ្ងៃៗ ។ អ៊ីចឹង ក្នុងករណី ដែលប្រជាពលរដ្ឋ ត្រូវការទឹកដើម្បីស្រោចដំណាំ ឬចិញ្ចឹមត្រី សូមអញ្ជើញមកយកទឹកនៅទីនោះ ដោយឥតគិតថ្លៃ ។
សម្តេចតេជោ ក៏បានអោយដឹងដែរថា ក្រៅពីខេត្តព្រះសីហនុ ខេត្តជាប់មាត់សមុទ្រ និងខេត្តជាប់ទន្លេផ្សេងៗទៀត ក៏ចាំបាច់ ត្រូវមានប្រព័ន្ធចម្រោះទឹកកខ្វក់នេះផងដែរ ដើម្បីធានាបាននូវបរិស្ថានល្អ ។ បន្ទាប់ពីមានប្រព័ន្ធចម្រោះទឹកកខ្វក់នេះហើយ ប្រជាពលរដ្ឋមកលេងខេត្តព្រះសីហនុ និងងូតទឹកសមុទ្រ មិនភ័យព្រួយរឿងកើតរមាស់ ឬធំក្លិនស្អុយទៀតនោះទេ ៕
ចែករំលែកព័តមាននេះ