រាជធានីភ្នំពេញ ៖ ថ្ងៃដ៏មហោឡារិក និងជាថ្ងៃប្រវត្តិសាស្ត្រមួយសម្រាប់សមាជិកព្រះវិហារសេវេនដេយអាត់វេនទីស្ទ (SDA) នៅប្រទេសកម្ពុជា ដោយវត្តមានលើកទីមួយ របស់លោកប្រធានព្រះវិហារសេវេនដេយអាត់វេនទីស្ទ
រាជធានីភ្នំពេញ ៖ ថ្ងៃដ៏មហោឡារិក និងជាថ្ងៃប្រវត្តិសាស្ត្រមួយសម្រាប់សមាជិកព្រះវិហារសេវេនដេយអាត់វេនទីស្ទ (SDA) នៅប្រទេសកម្ពុជា ដោយវត្តមានលើកទីមួយ របស់លោកប្រធានព្រះវិហារសេវេនដេយអាត់វេនទីស្ទ ពិភពលោក លោក Ted N.C. Wilson បានមកទស្សនកិច្ចប្រទេសកម្ពុជា ដើម្បីជួបសំណេះសំណាលនឹងផ្តល់ឱវាទល្អៗដល់សមាជិកព្រះវិហារសេវេនដេយអាត់វេនទីស្ទកម្ពុជា។
ក្នុងដំណើរមកដល់នៃលោក Ted N.C. Wilson នៅអាកាសយានដ្ឋានអន្តរជាតិពោធិ៍ចិនតុង លោកបានមានប្រសាសន៍ថា «នេះគឺជារឿងអស្ចារ្យខ្លាំងណាស់ ដែលខ្ញុំមានវត្តមានជាលើកដំបូងនៅក្នុងប្រទេសកម្ពុជា ដែលជាប្រទេសបានផ្តល់សិទ្ធិសេរីភាពខាងសាសនា» ។ ពួកយើងនឹងធ្វើដំណើរក្នុងរយៈពេល៣សប្តាហ៍ បំពេញទស្សនកិច្ចនៅក្នុងប្រទេសកម្ពុជា និងឡាវ បន្ទាប់មកយើងនឹងធ្វើដំណើរទៅកាន់ប្រទេសនៅអាហ្វ្រិក ។ ដូច្នេះដំណើរទស្សនកិច្ចមានរយៈពេល៧សប្តាហ៍ ដែលពួកយើងនឹងទៅកាន់ព្រះវិហារ និងជួបជាមួយគ្រីស្ទបរិស័ទជាច្រើនទៀតផង ដើម្បីលើកទឹកចិត្តពួកគេឲ្យជួយមនុស្សដទៃទៀត ក្នុងវិធីសាស្ត្រដ៏អស្ចារ្យ ។
លោកបន្តថា គោលបំណងសំខាន់នៃដំណើរទស្សនកិច្ចនេះ គឺចង់ជួបនឹងគ្រីស្ទបរិស័ទក្នុងប្រទេសកម្ពុជា និងធ្វើដំណើរកម្សាន្តនៅក្នុងប្រទេសកម្ពុជាផងដែរ។ ពូកយើងចង់ជួយមនុស្សទាំងឡាយឲ្យរស់នៅប្រកបដោយសុខភាពល្អទាំងផ្លូវកាយ និងផ្លូវចិត្ត ។ មិនតែប៉ុណ្ណោះ ខ្ញុំចង់លើកស្ទួយឲ្យមនុស្សចេះជួយគ្នាតាមលទ្ធភាពដែលពួកគេអាចធ្វើទៅបានសម្រាប់មិត្តភក្តិ និងអ្នកដទៃផងដែរ ។
ទាក់ទងនឹងសកម្មភាពនៃ Seventh-days Adventists លោកប្រធានបានមានប្រសាសន៍បន្ថែមថា សព្វថ្ងៃនេះ សកម្មភាពរបស់ Seventh-day Adventists មានព្រះវិហារនៅ២៥០ប្រទេសនៅក្នុងពិភពលោក។ ពួកយើងទាំងអស់គ្នាជាគ្រីស្ទបរិស័ទដែលមានជំនឿលើព្រះគម្ពីរ និងជឿថា ព្រះយេស៊ូ ជាព្រះរាជបុត្រារបស់ព្រះ ដោយទ្រង់បានសុគតដោយសារតែអំពើបាបរបស់ពួកយើង ហើយទ្រង់បានមានព្រះជន្មរស់ឡើងវិញ។ ពួកយើងជឿ និងគោរពអនុវត្តតាមការបង្រៀនរបស់ព្រះយេស៊ូ ដោយសារតែទ្រង់បានបង្រៀន និងអប់រំទាំងផ្លូវចិត្ត និងផ្លូវកាយដល់មនុស្សក្នុងសង្គមតាមរយៈព្រះគម្ពីរ។ ដូច្នេះហើយបានជាយើងមានព្រះវិហារ ដើម្បីជួយពង្រឹងប្រាជ្ញា ស្មារតីដល់មនុស្សឲ្យមើលឃើញពិភពលោកពោរពេញដោយក្តីសង្ឃឹម។ សេវេនដេយអាត់វេនទីស្ទ បានជួយដល់មនុស្សទាំងឡាយតាមវិធីផ្សេងៗពីគ្នា។ សព្វថ្ងៃនេះ យើងមានសមាជិកច្រើនជាង១៩ លាននាក់ ដែលរួមបញ្ជូលទាំងមនុស្សចាស់ និងយុវវ័យផងដែរ។
លោកប្រធានបានបន្ថែមថា ព្រះវិហារបានកើនឡើងនៅក្នុងបណ្តាប្រទេសជាច្រើនក្នុងរយៈពេលដ៏ខ្លី។ ខ្ញុំទើបតែមកពីប្រទេសអូស្ត្រាលីកាលពីប៉ុន្មានថ្ងៃមុន ហើយយើងមានបំណងចង់ជួយប្រជាជនដែលរស់នៅក្នុងតំបន់នោះ។ ព្រះវិហារសេវេនដេយអាត់វេនទីស្ទពិភពលោក ព្យាយាមផ្សាភ្ជាប់ទំនាក់ទំនងជាមួយប្រជាជនក្នុងសហគមន៍ និងផ្តល់ក្តីសង្ឃឹមដល់ពួកគេក្នុងជីវិត។
គួររំលឹកថា នៅក្នុងសាសនាគ្រីស្ទ មានបែងចែកជាច្រើននិកាយទៀត ដូចជាកាតូលិក ប្រូតេស្តង់ជាដើម ហើយក្នុងនោះដែរ សេវេនដេយអាត់វេនទីស្ទ (SDA) ក៏ជាអ្នកជឿទៅលើព្រះយេស៊ូដែរ។ លោក Ted N.C. Wilson បញ្ជាក់ថា សេវេនដេយអាត់វេនទីស្ទ (SDA) មានភាពអស្ចារ្យខ្លាំងណាស់ ដោយពួកយើងគោរពតាមព្រះគម្ពីរដែលជាព្រះបន្ទូលរបស់ព្រះ ហើយព្រះគម្ពីរបានសម្តែងថា ព្រះបានបង្កើតផែនដីក្នុងរយៈពេល៦ថ្ងៃ ហើយថ្ងៃទី៧ នៃសប្តាហ៍ គឺជាថ្ងៃបរិសុទ្ធ សូម្បីតែក្រឹត្យវិន័យទាំង១០ប្រការ គឺត្រូវឱ្យយើងរក្សាថ្ងៃបរិសុទ្ធ។ ដូច្នេះហើយក្រុមជំនុំសេវេនដេយអាត់វេនទីស្ទ ថ្វាយបង្គំថ្ងៃបរិសុទ្ធដែលត្រូវជាថ្ងៃសៅរ៍ ។ សេវេនដេយអាត់វេនទីស្ទ (SDA) ជឿជាក់យ៉ាងមុតមាំថា ព្រះយេស៊ូនឹងយាងមកវិញជាលើកទីពីរ ហើយពួកយើងនឹងលែងមានទុក្ខកង្វល់ និងអំពើបាបតទៅទៀតឡើយ។ នេះជាក្តីសង្ឃឹមដ៏អស្ចារ្យដែលយើងអាចចែករំលែកជាមួយនឹងអ្នកដទៃទៀត ហើយពួកយើងអាចរស់នៅយ៉ាងសប្បាយចិត្ត និងសុខភាពល្អ ដោយសារតែអំណាចនៃព្រះ។ ពួកយើងជឿថា នៅពេលដែលមនុស្សស្លាប់ ពួកគេមិនដឹងអ្វីទៀតឡើយ ។ ព្រះគម្ពីរបានសរសេរថា ការស្លាប់ គឺជាការសម្រាក។ សម្រាប់អ្នកជឿដល់ព្រះ ពួកគេរង់ចាំដល់ព្រះយាងមក ដើម្បីឱ្យពួកគេមានជីវិតជាថ្មីឡើងវិញ។
តាមរយៈអំណាចព្រះយេស៊ូ និងការបន្ទាបចិត្តកាយលើព្រះយេស៊ូ ដោយការអានគម្ពីរ អធិស្ឋាន និង ចំណាយពេលជាមូយនឹងព្រះនោះ យើងនឹងអាចរស់នៅប្រកបដោយក្តីសុខសាន្ត។ គួរបញ្ជាក់ថា សេវេនដេយអាត់វេនទីស្ទ (SDA) ជាក្រុមដែលអនុវត្ត និងលើកតម្តើងការថែទាំសុខភាពជាចម្បង ដោយផ្តោតលើការបរិភោគអាហារមិនប៉ះពាល់ដល់សុខភាព ហើយជៀសវាងឱ្យផុតពីការប្រើប្រាស់គ្រឿងស្រវឹង និងគ្រឿងញៀន៕
ចែករំលែកព័តមាននេះ