ប្រទេសមីយ៉ាន់ម៉ា ៖ ទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី បានមានប្រសាសន៍បន្ទាប់ពីកិច្ចប្រជុំជាមួយរដ្ឋមន្ត្រីក្រសួងការបរទេសថៃ លោក Don Pramudwinai ថា មីយ៉ាន់ម៉ានឹងជួយប្រទេសថៃ
ប្រទេសមីយ៉ាន់ម៉ា ៖ ទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី បានមានប្រសាសន៍បន្ទាប់ពីកិច្ចប្រជុំជាមួយរដ្ឋមន្ត្រីក្រសួងការបរទេសថៃ លោក Don Pramudwinai ថា មីយ៉ាន់ម៉ានឹងជួយប្រទេសថៃ ក្នុងការទទួលខុសត្រូវលើកម្មករមីយ៉ាន់ម៉ាចំនួន១,៦លាននាក់ដែលកំពុងរស់នៅប្រទេសថៃ ។
លោក Don Pramudwinai គណៈប្រតិភូពិសេសរបស់នាយករដ្ឋមន្ត្រីថៃ លោក ប្រាយុទ្ធ ចាន់អូចា បានធ្វើដំណើរទស្សនកិច្ចជាផ្លូវការរយៈពេល២ថ្ងៃទៅកាន់ប្រទេសមីយ៉ាន់ម៉ា ដើម្បីពង្រឹងចំណងមិត្តភាព និងបង្កើនកិច្ចសហប្រតិបត្តិការឱ្យកាន់តែប្រសើរជាងមុន ។
លោកស្រី អ៊ុងសាន ស៊ូជី បានកោតសរសើរដល់រដ្ឋាភិបាលថៃ ដែលបានគាំទ្រ និងជួយដល់កម្មករអន្តោប្រវេសន៍មីយ៉ាន់ម៉ា ហើយមានគម្រោងកែលម្អច្បាប់ឱ្យកាន់តែប្រសើរឡើងជាងមុនផងដែរ ។
ក្រុមប្រឹក្សារដ្ឋបានឲ្យដឹងថា ៖ « រដ្ឋាភិបាលមីយ៉ាន់ម៉ានឹងទទួលខុសត្រូវលើពលរដ្ឋរបស់ខ្លួនដែលធ្វើការក្នុងប្រទេសថៃ និងមិនឲ្យរដ្ឋាភិបាលទីក្រុងបាងកកទទួលខុសត្រូវតែម្នាក់ឯងនោះឡើយ » ។
លោកស្រី អ៊ុងសាន ស៊ូជី ក៏បានលើកឡើងអំពីបញ្ហាផ្សេងៗ ហើយសង្ឃឹមថា ប្រទេសទាំងពីរនឹងមានការដោះស្រាយបញ្ហារួមគ្នា ។
លោក Don Pramudwinai ថ្លែងថា ៖ « រដ្ឋាភិបាលថៃបានផ្តល់នូវផលប្រយោជន៍សង្គម និងសុខុមាលភាពដល់កម្មករមីយ៉ាន់ម៉ាផងដែរ។ ពួកគេបានទទួលសិទ្ធិស្មើនឹងកម្មករថៃ ដូចជា សេវាសុខភាព និងអាចបញ្ជូនកូនរបស់ពួកគេឱ្យចូលរៀននៅសាលារដ្ឋ ។ បច្ចុប្បន្ន មានកម្មករមីយ៉ាន់ម៉ាចំនួន១,៥៩លាននាក់កំពុងស្នាក់នៅក្នុងប្រទេសថៃ» ។
ប្រទេសថៃក៏បានជំរុញឱ្យមីយ៉ាន់ម៉ាមើលការខុសត្រូវលើវិនិយោគិនថៃ ដែលស្នាក់នៅមីយ៉ាន់ម៉ាផងដែរ ខណៈពួកគេគឺជាកត្តាជំរុញកំណើនវិនិយោគ ៕
ចែករំលែកព័តមាននេះ