រាជធានីភ្នំពេញ ៖ ក្រោយពីលេចចេញរូបថតសិចស៊ីជាច្រើនសន្លឹកមកដេនី ខ្វាន់ រងការរិះគន់ខ្លាំងពីមហាជន ។ ទន្ទឹមនេះមន្ត្រីក្រសួងវប្បធម៌ និងវិចិត្រសិល្បៈបានស្នើឱ្យដេនី ខ្វាន់ កែទម្លាប់ក្នុងការស្លៀកពាក់
រាជធានីភ្នំពេញ ៖ ក្រោយពីលេចចេញរូបថតសិចស៊ីជាច្រើនសន្លឹកមកដេនី ខ្វាន់ រងការរិះគន់ខ្លាំងពីមហាជន ។ ទន្ទឹមនេះមន្ត្រីក្រសួងវប្បធម៌ និងវិចិត្រសិល្បៈបានស្នើឱ្យដេនី ខ្វាន់ កែទម្លាប់ក្នុងការស្លៀកពាក់ មុនពេលក្រសួងចេញវិធានការណាមួយចំពោះនាង ។
ប្រតិកម្មរបស់មន្ត្រីក្រសួងវប្បធម៌ និងវិចិត្រសិល្បៈក្រោយពីនាងដេនី ខ្វាន់ ស្លៀកពាក់សិចស៊ីជ្រុលហួសហេតុក្នុងពិធីខួបកំណើតប្អូនប្រុសរបស់នាងកាលពីចុងសប្តាហ៍មុន ។
ឆ្លើយតបទៅនឹងការរិះគន់របស់មហាជន ដេនី ខ្វាន់ ចំអកថា អ្នកទាំងនោះមានចិត្តចង្អៀតចង្អល់ពេក និងជាមនុស្សខ្វះការពិចារណាទៅវិញ ។
អ្នករិះគន់ជាច្រើនស្នើឲ្យក្រសួងពាក់ព័ន្ធចេញគោលការណ៍ ឬកោះហៅតារាសម្តែងរូបនេះទៅព្រមាន ចំៗមុខ ក្រោយពីសេចក្តីណែនាំអំពីការស្លៀកពាក់របស់ក្រសួងវប្បធម៌ និងវិចិត្រសិល្បៈទើបតែចេញមិនទាន់បាន២ខែផងនោះត្រូវនាងមិនអើពើ ។
នាងដេនី ខ្វាន់ បានបញ្ចេញវីដេអូឃ្លីបមួយនៅថ្ងៃទី១០ ខែឧសភា ឆ្នាំ២០១៦ និយាយឆ្លើយតបអ្នករិះគន់ថា «នាងខ្ញុំនៅតែជាកូនខ្មែរម្នាក់ ហើយនាងខ្ញុំទទួលស្គាល់ពីការសិចស៊ីរបស់នាងខ្ញុំនាពេលកន្លងមក ប៉ុន្តែការដែលនាងខ្ញុំស្លៀកពាក់សិចស៊ីនោះ គឺមិនមែនស្លៀកពាក់ឡើងប៉ុស្តិ៍ទូរទស្សន៍ ឬថតភាពយន្តនោះទេ ផ្ទុយទៅវិញគឺជាការស្លៀកពាក់សម្រាប់ពិធីខាងក្រៅផ្ទាល់ខ្លួនប៉ុណ្ណោះ មិនមែនដូចការយល់ឃើញពីមហាជនមួយចំនួននោះឡើយ ។
ចំពោះបងប្អូនមួយចំនួនដែលបានចោទប្រកាន់មកលើនាងខ្ញុំថា ថតសិចស៊ីសម្រាប់ធ្វើស្រីខូច និងបង្អួតភ្នែកតាតានោះ គឺនាងចង់បញ្ជាក់ថា នាងខ្ញុំមិនមែនដល់ថ្នាក់ធ្វើជាស្រីបែបនោះដូចការយល់ឃើញរបស់អ្នកទាំងអស់នោះឡើយ។ បច្ចុប្បន្ននាងខ្ញុំមានគ្រប់យ៉ាងទាំងផ្ទះ លុយ ឡាន និងមានរបស់របរផ្ទាល់ខ្លួនក្រៅពីអាជីពសិល្បៈ ហេតុនេះនាងខ្ញុំមិនខ្វល់ខ្វាយដល់ថ្នាក់ចង់ធ្វើស្រីខូចនោះឡើយ ។
ត្រង់ចំណុចនេះនាងខ្ញុំចង់ប្រាប់ដល់អ្នករិះគន់ទាំងនោះថា មុននឹងនិយាយដូច្នេះត្រូវគិតពិចារណាផងថា អ្នកទាំងនោះមានបងប្អូនជាស្រីឬអត់។ ចំណែកមួយទៀត ការរិះគន់ទៅលើរូបនាងខ្ញុំថាបានចំណាយលុយខ្ជះខ្ជាយទៅទិញខោអាវ ថ្លៃៗឥតប្រយោជន៍ មិនចំណាយមកជួយអ្នកក្រ នោះរឹតតែខុសស្រឡះថែមទៀត ។
កន្លងមកនាងខ្ញុំតែងតែចំណាយពេល និងប្រាក់ផ្ទាល់ខ្លួនចុះទៅជួយប្រជាជនដែលមានភាពលំបាក ហើយសកម្មភាពទាំងនោះមិនត្រូវបានអ្នកដែលចូលចិត្តរិះគន់នាងខ្ញុំមើលឃើញឡើយ ផ្ទុយទៅវិញនៅពេលដែលនាងខ្ញុំស្លៀកសិចស៊ីវិញ គឺនាំគ្នារិះគន់ និងចែកចាយរូបភាពពីមួយទៅមួយទូទាំងប្រទេស ។ អ្វីដែលសំខាន់ទៀតនោះមានអ្នកខ្លះបានស្នើដល់ក្រសួងវប្បធម៌ និងវិចិត្រសិល្បៈឲ្យដកនាងខ្ញុំចេញពីវិស័យសិល្បៈថែមទៀតផង ។
ប្រសិនបើក្នុងករណីក្រសួងចង់ដកអ្នកណាមួយចេញពីវិស័យសិល្បៈនោះ គឺប្រាកដជាមានការពិចារណាមួយច្បាស់លាស់ ថាតើតារារូបនោះបានធ្វើអំពើខុសឆ្គងអ្វីខ្លះ ប៉ុន្តែសម្រាប់នាងខ្ញុំគឺគ្រាន់តែស្លៀកពាក់សិចស៊ីក្រៅសិល្បៈ មិនមែនស្លៀកចូលវត្ត ឬឡើងប៉ុស្តិ៍ទូរទ្សន៍នោះឡើយ» ។
ទាក់ទិននឹងរឿងរបស់នាងដេនី ខ្វាន់នោះ កាលពីថ្ងៃទី១១ ឧសភា ២០១៦ លោកថៃ នរៈសត្យា រដ្ឋលេខាធិការក្រសួងវប្បធម៌ និងវិចិត្រសិល្បៈថ្លែងថា «សិល្បករគួរតែភ្ញាក់រឭកដោយខ្លួនឯង គួរតុបតែខ្លួនឲ្យសក្តិសមទៅនឹងពេលវេលា ទីកន្លែង គឺកុំហួសហេតុពេក ។ មនុស្សគ្រប់រូបមិនថាតែសិល្បករទេ រូបរាងមានខាងក្នុង និងខាងក្រៅ មានកិត្តិយស មានកេរ្តិ៍ខ្មាស ប៉ុន្តែគួរកម្រិតឲ្យច្បាស់ខ្លួនឯងថាគួរមានកម្រិតណា ។ សិល្បករតែងតែរកអ្វីដែលធ្វើឲ្យគេចាប់អារម្មណ៍ ប៉ុន្តែមិនមែនមានតែការស្លៀកពាក់បែបលេចលើខើចក្រោមតែមួយមុខទេ គ្រាន់តែការស្លៀកពាក់បែបសមរម្យ គឺជាសោភ័ណភាពមួយបាត់ទៅហើយ មិនមែនមានតែការស្លៀកពាក់បែបរបូតរលូតនោះទេ ។ សិល្បករ ម្នាក់ៗគួរតែយល់ថាសម្រស់ កិត្តិយស វានឹងមិនអណ្តែតដោយសារតែការស្លៀកពាក់សិចស៊ី ឬរឿងអាស្រូវទេ វានឹងជាន់ពន្លិចកេរ្តិ៍ឈ្មោះខ្លួនឯងទៅវិញ» ។
ឆ្លើយតបទៅនឹងការលើកឡើងរបស់ដេនី ខ្វាន់ ថា ការស្លៀកពាក់សិចស៊ីរបស់នាងមិនមែនជាការស្លៀកពាក់ឡើងឆាកដែលត្រូវរិះគន់ទេនោះ លោកថៃ នរៈសន្យា បញ្ជាក់ថា «មិនថាតែលើឆាកទេ បច្ចុប្បន្ន ទីណាក៏មានទូរទស្សន៍ កាសែត ទស្សនាវដ្តី ដែរ ព្រោះតែមនុស្សគ្រប់គ្នាមានទូរស័ព្ទ ហើយនាងបង្ហាញខ្លួនជាសារធារណៈនៅក្នុងពិធីមួយ ដូចនេះគេកាន់តែប្រុងប្រយ័ត្នជាងការសម្តែងលើឆាកទៅទៀត ។ បើមិនចង់ឲ្យមានការផ្សព្វផ្សាយជាសារធារណៈ លុះត្រាតែនាងស្ថិតនៅក្នុងបន្ទប់តែម្នាក់ឯង» ។
ទោះជាយ៉ាងណាក្តី លោកថៃ នរៈសត្យា បញ្ជាក់ថា ក្រសួងវប្បធម៌ និងវិចិត្រសិល្បៈនៅមិនទាន់ចេញវិធានការជាក់លាក់បន្ថែមថ្មីពីលើសេចក្តីណែនាំមុននៅឡើយទេ ។
ក្រសួងវប្បធម៌ និងវិចិត្រសិល្បៈចង់ឲ្យសិល្បករព្យាយាមកែទម្លាប់ដោយខ្លួនឯង គឺមានតែវិធានការថ្នាក់ថ្នម ដោយយល់ថាជាខ្មែរដូចគ្នា ស្ថិតក្រោមឆត្ររបស់ក្រសួងវប្បធម៌ ដូចជាឪពុកម្តាយមិនអាចខុសដៃយកដៃ ខុសជើងយកជើងនោះទេ គឺចង់ណែនាំឲ្យអស់លទ្ធភាព ។ ទោះជាយ៉ាងណាក្តី ក្រសួងនឹងមានវិធានការផ្សេងពីនេះប្រសិនបើការណែនាំរបស់ក្រសួងមិនមានការយកចិត្តទុកដាក់ពីសិល្បករនោះ ។
តារាសម្តែងដេនី ខ្វាន់ មិនអាចសុំការឆ្លើយតប់ជុំវិញប្រតិកម្មរបស់មន្ត្រីក្រសួងវប្បធម៌ និងវិចិត្រសិល្បៈបានទេ ។ ទូរស័ព្ទរបស់នាងដេនី ខ្វាន់ ត្រូវប្អូនប្រុសរបស់នាងលោកគឹម សាន្ត ជាអ្នកលើក ហើយបញ្ជាក់ថា បងស្រីលោកដូរលេខទូរស័ព្ទកាលពីពេល ថ្មីៗកន្លងមក តែលោកមិនស្គាល់លេខនោះទេ ។
កន្លងមកនាងឆៃលី ដាឡែន បាក់ស្បាតនឹងភាពសិចស៊ីរបស់ខ្លួនដោយត្រូវស្ថានីយទូរទស្សន៍នានាលែងរាប់រកហៅសម្តែង ។ ឆៃលី ដាឡែន បានកែខ្លួន និងព្យាយាមសូមទោសជាសាធារណៈម្តងហើយម្តងទៀត ទម្រាំមានឱកាសដូចដើម ។
ក្រសួងវប្បធម៌ និងវិចិត្រសិល្បៈ កាលពីថ្ងៃទី២៥ ខែមីនា ឆ្នាំ២០១៦ បានចេញសេចក្តីណែនាំមួយចំពោះសិល្បករ សិល្បការិនីទាំងអស់ឱ្យប្រើប្រាស់សម្លៀកបំពាក់សមស្របតាមទំនៀមទម្លាប់ប្រពៃណីរបស់ជាតិ មានឥរិយាបថប្រកបដោយសីលធម៌ គុណធម៌ សុជីវធម៌ ដែលជាមរតកដ៏ល្អផូរផផង់នៃដូនតាយើង ។
ក្រោយសេចក្តីណែនាំនោះមិនបានប៉ុន្មានផង ស្រាប់តែដេនី ខ្វាន់ លេងខ្លួនសិចស៊ីស្ទើរតែអាក្រាតល្វែងខាងលើ ហើយថែមទាំងវាយប្រហារចំពោះអ្នករិះគន់ទៀត ៕
ចែករំលែកព័តមាននេះ