អ៊ីស្រាអែល ៖ វេជ្ជបណ្ឌិតជនជាតិអ៊ីស្រាអែល ពីរនាក់ ដែលធ្វើការនៅមន្ទីរពេទ្យទីក្រុងតេអាវីវ ត្រូវបានធ្វើរោគវិនិច្ឆ័យ បញ្ជាក់ថា វិជ្ជមានចំពោះកូវីដបំប្លែងថ្មី អូមីក្រុង Omicron…
អ៊ីស្រាអែល ៖ វេជ្ជបណ្ឌិតជនជាតិអ៊ីស្រាអែល ពីរនាក់ ដែលធ្វើការនៅមន្ទីរពេទ្យទីក្រុងតេអាវីវ ត្រូវបានធ្វើរោគវិនិច្ឆ័យ បញ្ជាក់ថា វិជ្ជមានចំពោះកូវីដបំប្លែងថ្មី អូមីក្រុង Omicron នេះបើតាមមជ្ឈមណ្ឌលវេជ្ជសាស្ត្រ បានបញ្ជាក់នៅថ្ងៃអង្គារទី៣០ វិច្ឆិកា ២០២១នេះ ខណៈដែលបុរសទាំងពីរនាក់ បានចាក់វ៉ាក់សាំងចំនួន បីដងរួចហើយ ។
យោងតាមមន្ទីរពេទ្យទីក្រុងតេអាវីវ បានអោយដឹងថា វេជ្ជបណ្ឌិត វ័យ៥០ឆ្នាំ បានធ្វើតេស្ត វិជ្ជមាន អូមីក្រុង បន្ទាប់ពីត្រលប់មកពីសន្និសីទនៅទីក្រុងឡុងដ៍វិញ បានជាច្រើនថ្ងៃ ។
ប្រភពពីមន្ទីរពេទ្យ អោយដឹងបន្តថា ការធ្វើតេស្ត PCR របស់វេជ្ជបណ្ឌិតវ័យ៥០ឆ្នាំ មុនពេលចាកចេញពីប្រទេសអង់គ្លេស និងពេលត្រឡប់មកប្រទេសអ៊ីស្រាអែល ភ្លាម គឺទទួលបានលទ្ធផល អវិជ្ជមាន ដូច្នេះបុរសរូបនេះ បានត្រឡប់ទៅធ្វើការវិញ ដែលជាកន្លែងដែលគាត់បានចម្លងមេរោគដល់លោកគ្រូពេទ្យម្នាក់ទៀត មានវ័យ ៧០ឆ្នាំ ។
ពេលនេះ អ្នកទាំងពីរ កំពុងសម្រាកនៅផ្ទះ ដោយមានរោគសញ្ញាស្រាលប៉ុណ្ណោះ ។ អ្នកដែលមានទំនាក់ទំនងជាមួយបុរសទាំងពីរនាក់ ត្រូវបានធ្វើតេស្ត ហើយរហូតមកទល់ពេលនេះ មិនមានលទ្ធផលវិជ្ជមានទេ ។
២ករណីឆ្លងថ្មីបន្ថែមទៀតនេះ នាំឲ្យប្រទេសអ៊ីស្រាអែល មានអ្នកឆ្លងអូមីក្រុង កើនឡើងដល់ទៅ ០៤ករណីហើយ ។
ករណីទី១ ត្រូវបានរកឃើញ នៅលើមនុស្សម្នាក់ ដែលត្រឡប់មកពីប្រទេសម៉ាឡាវី ។ ព័ត៌មានលម្អិត នៃករណីទី២ មិនត្រូវបានផ្សព្វផ្សាយជាសាធារណៈទេ ប៉ុន្តែប្រព័ន្ធផ្សព្វផ្សាយរបស់អ៊ីស្រាអែល បាននិយាយថា វាត្រូវបានគេរកឃើញនៅលើមនុស្សម្នាក់ដែលត្រឡប់មកពីអាហ្វ្រិកខាងត្បូង ៕
ចែករំលែកព័តមាននេះ