ឡានដឹកក្រដាសអេតចាយជួបគ្រោះក្រឡាប់ម្តុំស្តុបបាគូ
- ភ្នំពេញ
រាជធានីភ្នំពេញ ៖ រថយន្ត១គ្រឿងដឹកក្រដាសឡាំងអេតចាយសំពីងសំពោងខ្ពស់ហួសទ្រុងពេក ខណៈបើកបរបត់ឆ្វេងពុំបាន
រាជធានីភ្នំពេញ ៖ រថយន្ត១គ្រឿងដឹកក្រដាសឡាំងអេតចាយសំពីងសំពោងខ្ពស់ហួសទ្រុងពេក ខណៈបើកបរបត់ឆ្វេងពុំបានបន្ថយល្បឿនធ្វើឲ្យមានសភាពឃ្លេងឃ្លោង ហើយបាត់បង់លំនឹងក៏បានក្រឡា.ប់ទាំងកម្រោលនៅកណ្ដាលផ្លូវ ប៉ុន្តែជាសំណាងល្អពុំបាន បណ្ដាលឲ្យមាននរណាម្នាក់រងគ្រោះថ្នាក់នោះឡើយ។
ហេតុការណ៍ខាងលើនេះបានកើតឡើងកាលពីវេលាម៉ោង៨និង៤០នាទីព្រឹកថ្ងៃទី៣០ ខែវិច្ឆិកា ឆ្នាំ២០២១ នៅលើកំណាត់ផ្លូវលេខ២១៧ ហៅផ្លូវចំការដូង កែងផ្លូវ៥០ម៉ត្រត្រង់ចំណុចភ្លើងស្តុបបាគូ ស្ថិតនៅក្នុងភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ។
រថយន្តក្រឡា.ប់មួយគ្រឿងខាងលើនេះ ពណ៍ខៀវ ពាក់ស្លាកលេខ ភ្នំពេញ 3D-2270 បានរងការខូចខាតកាប៊ីន ចំណែកបុរសអ្នកបើកបរមិនត្រូវបានគេស្គាល់អត្តសញ្ញានោះទេ ហើយពុំមានរងរបួសនោះឡើយ។
តាមប្រភពព័ត៌មានបានឲ្យដឹងថា នៅមុនពេលកើតហេតុ រថយន្តនេះបានដឹកក្រដាសឡាំងអេតចាយសំពីសំពោងខ្ពស់ហួសទ្រុងបើកបរក្នុងល្បឿនលឿនគួរសមដែរ ធ្វើដំណើរក្នុងទិសដៅពីត្បូងទៅជើងតាមផ្លូវលេខ២១៧ ។ លុះពេលទៅដល់ត្រង់ចំណុចភ្លើងស្តុបបាគូ បានបត់ឆ្វេង ហើយដោយសារតែដឹកសំពីងសំពោងខ្ពស់ហួសមាឌហើយពេលបត់ពុំបន្ថយល្បឿន ទើបធ្វើឲ្យឃ្លេងឃ្លោងបាត់លំនឹង រួចក៏ក្រឡា.ប់នៅកណ្ដាលផ្លូវតែម្ដង។
តាមប្រភពដដែលបានបន្តឲ្យទៀតថា ខណៈនោះពុំបណ្ដាលឲ្យអ្នកបើកបររងរបួសឡើយ ហើយក៏ពុំមានការប៉ះពាល់ដល់អ្នកដំណើរតាមដងផ្លូវឬបង្កឲ្យមានការកកស្ទះចរាចរណ៍នោះដែរ ប៉ុន្តែរថយន្តបានរងការខូចខាតកាប៊ីន ។
ក្រោយពេលកើតហេតុ នគរបាលខណ្ឌដង្កោបានចុះទៅកាន់ទីនោះពិនិត្យមើលជាក់ស្ដែង រួចឲ្យម្ចាស់ហៅរថយន្តស្ទូចទៅស្ទូចលើកយករថយន្តនេះទៅធ្វើការជួសជុលឡើងវិញដោយខ្លួនឯង ៕
ចែករំលែកព័តមាននេះ