ហេតុអ្វីរដ្ឋត្រូវគ្រប់គ្រងតម្លៃតាមសាលាឯកជន?
ខណៈដែលការអប់រំនៅសាលារដ្ឋនៅមានកម្រិតនៅឡើយនោះ ឪពុកម្តាយជាច្រើននៅភ្នំពេញ បានសម្រេចបញ្ជូនកូនទៅសិក្សានៅតាមសាលាឯកជន ដោយរំពឹងថា នឹងមានគុណភាពជាង។
ខណៈដែលការអប់រំនៅសាលារដ្ឋនៅមានកម្រិតនៅឡើយនោះ ឪពុកម្តាយជាច្រើននៅភ្នំពេញ បានសម្រេចបញ្ជូនកូនទៅសិក្សានៅតាមសាលាឯកជន ដោយរំពឹងថា នឹងមានគុណភាពជាង។
ប៉ុន្តែទោះបីជាយ៉ាងណាក៏ដោយចុះ ឪពុកម្តាយមួយចំនួនមិនសប្បាយចិត្តនឹងសាលាឯកជនដែលមានការដំឡើងថ្លៃមិនសមរម្យ ដោយពេលខ្លះឪពុកម្តាយរបស់សិស្សហាក់ដូចជាក្លាយជាចំណាប់ខ្មាំងរបស់សាលាឯកជនទាំងនោះ។ ជាទូទៅឪពុកម្តាយសិស្សកម្រនឹងសម្រេចចិត្តផ្លាស់ប្តូរសាលារៀនរបស់កូនៗណាស់ នៅពេលដែលពួកគាត់អោយកូនរៀនសាលាឯកជនណាមួយហើយនោះ។ សាលាឯកជនមួយចំនួនយល់ច្បាស់អំពីកត្តាចិត្តសាស្ត្រនេះរបស់ឪពុកម្តាយ ហើយពួកគេក៏សម្រេចចិត្តដំឡើងថ្លៃសិក្សា ថ្លៃដឹកជញ្ជូន និងថ្លៃអាហារតាមការនឹកឃើញរបស់ពួកគេ ដើម្បីបង្កើនផលចំណេញ។ ពួកគេអាចលើកហេតុផលជាច្រើន ដើម្បីធ្វើការដំឡើងថ្លៃនេះ ដូចជាការបង្កើនប្រាក់ខែសម្រាប់គ្រូ ឬក៏ការបង់ពន្ធជូនរដ្ឋជាដើម។
ឪពុកម្តាយរបស់សិស្សមិនមានជម្រើសអ្វីក្រៅពីយល់ព្រមតាមការដំឡើងថ្លៃរបស់សាលាឡើយ ទោះបីជាពួកគេមានការលំបាកក្តី។ ការអនុញ្ញាតអោយសាលារៀនឯកជនដំឡើងថ្លៃសិក្សា ថ្លៃដឹកជញ្ជូន និងថ្លៃអាហារដោយគ្មានការគ្រប់គ្រងត្រឹមត្រូវនឹងធ្វើអោយមានការមិនសប្បាយចិត្តនៅក្នុងសង្គមកាន់តែខ្លាំង។
រដ្ឋាភិបាលនឹងត្រូវគេបន្ទោសចំពោះការឡើងថ្លៃនេះ ខណៈដែលសាលាឯកជនជាអ្នកទទួលផលចំណេញកាន់តែច្រើន។
ដើម្បីទប់ទល់នឹងបញ្ហានេះ រដ្ឋត្រូវមានយន្តការគ្រប់គ្រងតម្លៃតាមសាលារៀនឯកជនអោយមានប្រសិទ្ធភាពដោយមិនត្រូវអនុញ្ញាតអោយសាលាឯកជនធ្វើការដំឡើងថ្លៃស្រេចតែចិត្តនោះឡើយ។
បើសិនជារដ្ឋបន្តខកខាននៅក្នុងការគ្រប់គ្រងតម្លៃតាមសាលារៀនឯកជន ឪពុកម្តាយជាច្រើននឹងនៅតែបន្តក្លាយជាចំណាប់ខ្មាំងរបស់សាលាឯកជនដែលដំឡើងថ្លៃមិនចេះចប់មិនចេះហើយ។ វានឹងធ្វើអោយប៉ះពាល់ដល់ជីវភាពគ្រួសារខ្មែរជាច្រើន។
ដូច្នេះការគ្រប់គ្រងតម្លៃតាមសាលាឯកជនបានល្អនឹងអាចជួយមួយផ្នែកដល់ប្រជាជនកម្ពុជានៅក្នុងកាត់បន្ថយការចំណាយប្រចាំខែទៅលើការសិក្សារបស់កូន។
នេះជាអ្វីដែលរដ្ឋត្រូវយកចិត្តទុកដាក់ជាបន្ទាន់៕
ចែករំលែកព័តមាននេះ