ការនាំចេញរបស់ចិនកើនឡើងយឺត ខណៈការនាំចូលធ្លាក់ចុះ
ប្រទេសចិន ៖ ការនាំចេញរបស់ចិនមានកំណើនយឺត ខណៈការនាំចូលធ្លាក់ចុះយ៉ាងខ្លាំងនៅក្នុងខែមេសា គ្រាដែលការរើបឡើងវិញនៃសេដ្ឋកិច្ចរបស់ប្រទេសមួយនេះនៅទន់ខ្សោយ ។
ប្រទេសចិន ៖ ការនាំចេញរបស់ចិនមានកំណើនយឺត ខណៈការនាំចូលធ្លាក់ចុះយ៉ាងខ្លាំងនៅក្នុងខែមេសា គ្រាដែលការរើបឡើងវិញនៃសេដ្ឋកិច្ចរបស់ប្រទេសមួយនេះនៅទន់ខ្សោយ ។
ការនាំចេញបានកើនឡើង៤,១%ពីមួយឆ្នាំទៅមួយឆ្នាំកាលពីខែមុន ក្នុងទំហំទឹកប្រាក់១,១៣ទ្រីលានយន់ ស្មើនឹងប្រមាណ១៧៤លានដុល្លារអាមេរិក យឺតជាង១៨,៧% បើធៀបនឹងខែមីនា ។ នេះបើយោងតាមទិន្នន័យពីអគ្គនាយកដ្ឋានគយ ដែលបានបង្ហាញកាលពីថ្ងៃទី៨ ឧសភា កន្លងមក ។
ចំណែកការនាំចូលបានធ្លាក់ចុះ៥,៧% ពីមួយឆ្នាំទៅមួយឆ្នាំ ក្នុងទំហំទឹកប្រាក់៨២៧,៥ប៊ីលានយន់ដែលជាការធ្លាក់ចុះ១៨ខែជាប់ៗ ហើយនៅក្នុងខែមីនា បានធ្លាក់ចុះ១,៧%។ ប៉ុន្តែផលលើសពាណិជ្ជកម្មរបស់ប្រទេសចិន បានកើនឡើង២៩៨ប៊ីលានយន់នៅក្នុងខែមេសា កើនពី១៩៤,៦ប៊ីលានយន់ក្នុងខែមីនា ។
ពីមួយឆ្នាំទៅមួយឆ្នាំ ទំហំពាណិជ្ជកម្មបរទេសបានធ្លាក់ចុះ១,៩៥ទ្រីលានយន់ កាលពីខែមុន និងធ្លាក់ចុះ៤,៤% ពី៧,១៧ទ្រីលានយន់ក្នុងរយៈពេល៤ខែដំបូងឆ្នាំនេះ ។
ក្រុមហ៊ុន China International Capital Corp បានកត់សម្គាល់ថា ៖ «ទិន្នន័យនៃការនាំចេញក្នុងខែមេសាធ្លាក់ចុះ ដែលបានបង្ហាញសញ្ញាតាំងពីខែមីនាមកម្ល៉េះ ប៉ុន្តែវាបានធ្វើឲ្យប្រសើរឡើងនៅក្នុងត្រីមាសដំបូង ។ ការនាំចូលបន្ដធ្លាក់ចុះយ៉ាងលឿន ដែលឆ្លុះបញ្ចាំងពីតម្រូវការក្នុងស្រុកធ្លាក់ចុះ និងភាពទន់ខ្សោយដែលអាចបន្ដទៅថ្ងៃអនាគត» ។
ក្រុមហ៊ុនបានបន្ថែមថា ៖ « ក្នុងរយៈពេលមធ្យម ការងើបឡើងវិញនៃបណ្ដាប្រទេសដែលមានសេដ្ឋកិច្ចធំៗនឹងនៅតែទន់ខ្សោយ ក៏ដូចជាពាណិជ្ជកម្មពិភពលោកផងដែរ » ។
ការនាំចេញទៅកាន់សហគមន៍អឺរ៉ុប ដែលជាដៃគូពាណិជ្ជកម្មដ៏ធំជាងគេរបស់ចិន បានកើនឡើង១,៣% ពីមួយឆ្នាំទៅមួយឆ្នាំ ក្នុងរយៈពេល៤ខែដំបូង ខណៈដែលការនាំចេញទៅសហរដ្ឋអាមេរិក និងសមាគមប្រជាជាតិអាស៊ីអាគ្នេយ៍ដែលជាដៃគូពាណិជ្ជកម្មទី២ និងទី៣ របស់ចិន បានធ្លាក់ចុះ៣,៥%ដូចគ្នា ។ នេះបើយោងតាមទិន្នន័យដែលបានបង្ហាញ ។
ទោះបីជាយ៉ាងណា កំណើននៃការនាំចេញត្រូវបានគេរំពឹងថា នឹងកើនឡើងក្នុងខែឧសភានេះ ខណៈការនាំចូលអាចកើនឡើងផងដែរ ដោយផ្អែកទៅលើទីផ្សាររូបិយប័ណ្ណក្នុងស្រុក និងគោលនយោបាយសារពើពន្ធ ។ នេះបើយោងតាមការវិភាគរបស់ធនាគារ Bank of Communcation បានលើកឡើងនៅក្នុងរបាយការណ៍ ។
យោងតាមរបាយការណ៍ពាណិជ្ជកម្មចុងក្រោយបង្ហាញថា ភាពទន់ខ្សោយនៃផលិតកម្ម និងសកម្មភាពសេវាកម្ម ជាការចង្អុលបង្ហាញពីសេដ្ឋកិច្ចងើបឡើងវិញយឺតរបស់ប្រទេសចិន ។
យោងតាមទិន្នន័យផ្លូវការបានបង្ហាញថា សេដ្ឋកិច្ចចិនបានកើនឡើង៦,៧%ពីមួយឆ្នាំទៅមួយឆ្នាំក្នុងត្រីមាសដំបូង ដែលជាការកើនឡើងយឺតបំផុតក្នុងរយៈពេល៧ឆ្នាំមកនេះ៕
ចែករំលែកព័តមាននេះ