ខេត្តក្រចេះ ៖ ទ្រាំងជាប្រភេទរុក្ខជាតិកម្រ និងអាចប្រឈមមុខផុតពូជ កំពុងដង្ហោយឱ្យមានការជួយអភិរក្ស ខណៈរងការកាប់យកកំពូលលក់ឱ្យឈ្មួញ និងទន្ទ្រានកាប់គាស់កាយចោលយកដី ហើយម្យ៉ាងទៀត ស្របពេលរដូវប្រាំងប្រឈមនឹងភ្លើងឆេះព្រៃដែលកំពុងតែរីករាលដាល។ ទ្រាំងជាប្រភេទរុក្ខជាតិព្រៃម្យ៉ាងដែលចាស់ពីបុរាណយកស្លឹកទៅចារទុកជាគម្ពីរ និងមានអ្នកខ្លះយកទៅច្នៃធ្វើជាជញ្ជាំងផ្ទះ និងដំបូលផ្ទះ ។ សំរាប់ខេត្ដក្រចេះ គេសង្កេតឃើញទ្រាំងដុះមានជាគុម្ពតូចធំបែកមែកធាងសាខានៅតាមព្រៃក្នុងភូមិសាស្ដ្រឃុំស្វាយជ្រះ ឃុំឃ្សឹម ស្រុកស្នួល។
បុរសវ័យចំណាស់ម្នាក់រស់នៅភូមិស្វាយជ្រះរៀបរាប់ថាក្រោយសំរាកពីការងារបង្កបង្កើនផលគាត់តែងតែបររទេះទៅកាប់កំពូលទ្រាំងក្នុងព្រៃសំរាប់ទុកលក់ឱ្យឈ្មួញដោយគេទិញក្នុងមួយគីឡូក្រាមតំលៃពី១៥០ ទៅ២០០រៀល ។ ការកាប់យកកំពូលទ្រាំងនេះ គឺត្រូវជ្រើសរើសយកប្រភេទដើមវ័យកណ្ដាលមិនឱ្យចាស់ពេក ឬខ្ចីពេក ។ ក្នុងដៃប្រដាប់ដោយកាំបិតវែងយ៉ាងមុតមួយកំពុងតែកាប់សកកំពូលដើមទ្រាំងបណ្ដើរ គាត់និយាយបណ្តើរថា គាត់ប្រកបរបរកាប់កំពូលទ្រាំងលក់ជាយូរណាស់មកហើយ ហើយប្រជាពលរដ្ឋនៅក្នុងភូមិនេះក៏ដូចគ្នា ។ អ្នកភូមិបន្ទាប់ពីប្រកបរបរបង្កបង្កើនផលរួច គឺឆ្លៀតឱកាសមកកាប់ដើមទ្រាំងដឹកទៅដាក់មុខផ្ទះសំរាប់លក់។ រាល់ល្ងាចតែងតែមានរថយន្ដធុនធំរបស់ឈ្មួញដើរប្រមូលថ្លឹងទិញតាមផ្ទះ ។
បុរសវ័យចំណាស់រូបនេះបន្ដថា ប្រសិនបើត្រឹមការកាប់យកកំពូលលក់ដូចជាពួកគាត់គឺមិនវិនាសទេ ព្រោះដើមទ្រាំងកើតតកូនចៅបែកគុម្ពច្រើនពីមួយឆ្នាំទៅមួយឆ្នាំតែវាអាចប្រឈមមុខទៅនឹងការវិនាសហិនហោចក្រោមស្នាដៃអ្នកកាប់គាស់យកដី និងដុតព្រៃដែលកំពុងតែកើតមាន ។ ជារៀងរាល់ថ្ងៃជាពិសេសវេលាល្ងាចគេសង្កេតឃើញមានរថយន្ដតូចធំគ្រប់ប្រភេទរបស់ឈ្មួញប្រមូលទិញយកកំពូលទ្រាំងតាមផ្ទះប្រជាពលរដ្ឋចាប់ពីឃុំស្វាយជ្រះរហូតដល់ឃុំឃ្សឹម និងឃុំស្នួល ស្រុកស្នួល ។ គេទិញដាក់ពេញរថយន្ដដឹកសំដៅចូលទៅប្រទេសវៀតណាម តាមច្រករបៀងតូចធំ តែពុំឃើញសមត្ថកិច្ចណាមួយចេញសួរនាំរកច្បាប់ទំលាប់អ្វីទេ ទោះបីជាគេដឹងថា រុក្ខជាតិទ្រាំងនេះស្ថិតនៅក្នុងអនុផលព្រៃឈើយ៉ាងណាក៏ដោយ ។ កំពូលទ្រាំងដែលត្រូវគេដឹកចូលទៅប្រទេសវៀតណាមនេះ គឺយកទៅច្នៃធ្វើជារបស់របរប្រើប្រាស់ដូចជាមួក កន្ទេល ព្រមទាំងរបស់របរមួយចំនួនទៀត ។ បន្ទាប់ពីកែច្នៃរួចគេបញ្ជូនមកលក់នៅស្រុកខ្មែរវិញ។
ជុំវិញការប្រឈមមុខនឹងការវិនាសរបស់រុក្ខជាតិទ្រាំងនេះ មន្ដ្រីរដ្ឋបាលព្រៃឈើសង្កាត់ស្វាយជ្រះមួយរូបបង្ហើបប្រាប់ថា ដើមទ្រាំងត្រូវបានចាត់ទុកជាអនុផលព្រៃឈើមួយប្រភេទ ហើយកន្លងមកសមត្ថកិច្ចជំនាញធ្លាប់ណែនាំឈ្មួញធំៗដែលដើរប្រមូលទិញត្រូវទៅបំពេញឯកសារដឹកជញ្ជូនត្រឹមត្រូវ និងត្រូវបង់ពន្ឋចូលរដ្ឋតាមការកំណត់ ។ ម្យ៉ាងវិញទៀត អាជ្ញាធរកំពុងតែបង្កើតឱ្យមានការអភិរក្សទ្រាំងដោយសហគមន៍ ។ ទោះបីជាបែបណា ប្រសិទ្ធភានៃការអភិរក្សហាក់ដូចជានៅឆ្ងាយណាស់ ព្រោះមិនឃើញសកម្មភាពជាក់ស្តែងណាមួយក្នុងការការពាររុក្ខជាតិមួយនេះឱ្យមាននិរន្តរភាពទេ ៕
ចែករំលែកព័តមាននេះ