សម្តេចក្រុមព្រះ នរោត្តម រណឫទ្ធិ ចូលទិវង្គតហើយ
- ភ្នំពេញ
ភ្នំពេញ៖ សម្តេចក្រុមព្រះ នរោត្តម រណឫទ្ធិ បានចូលទិវង្គតហើយ នៅថ្ងៃទី២៨ ខែវិច្ឆិកា ឆ្នាំ២០២១។ នេះបើតាមឯកឧត្តម ខៀវ…
ភ្នំពេញ៖ សម្តេចក្រុមព្រះ នរោត្តម រណឫទ្ធិ បានចូលទិវង្គតហើយ នៅថ្ងៃទី២៨ ខែវិច្ឆិកា ឆ្នាំ២០២១។ នេះបើតាមឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន។
ឯកឧត្តម ខៀវ កាញារីទ្ធ បានបង្ហោះសារលើហ្វេសប៊ុកថា «ទើបទទួលដំណឹងពីឯកឧត្តម អ៊ុម ដារាវុឌ្ឍ ថា សម្តេចក្រុមព្រះ បានចូលទិវង្គត កាលពីព្រឹកមិញនេះ វេលាម៉ោង ៩ និង ៤០ ម៉ោងនៅក្នុងប្រទេសបារាំង ត្រូវនឹងម៉ោង ៣ និង ៤០នាទី ម៉ោងនៅភ្នំពេញ។ កំពុងរង់ចាំដំណឹងបញ្ជាក់បន្ថែមទៀត»។
ប្រសូតថ្ងៃទី២ ខែមករា ឆ្នាំ១៩៤៤ សម្តេចក្រុមព្រះ នរោត្តម រណឫទ្ធិ ជាព្រះរាជបុត្រទីពីររបស់ព្រះបាទ នរោត្តម សីហនុ និងត្រូវជាព្រះរាម មាតាទីទៃ នៃព្រះមហាក្សត្រកម្ពុជា បច្ចុប្បន្ន គឺព្រះករុណា ព្រះបាទសម្តេចព្រះបរមនាថ នរោត្តម សីហមុនី។
សម្តេចក្រុមព្រះ នរោត្តម រណឫទ្ធិ គឺជាព្រះប្រធានគណបក្សហ្វ៊ុនស៊ិនប៉ិច ហើយបានជាប់ឆ្នោត ក្លាយជានាយករដ្ឋមន្ត្រីទីមួយ នៅឆ្នាំ១៩៩៣ រហូតដល់ឆ្នាំ១៩៩៧។ បន្ទាប់មក ព្រះអង្គ ក៏បានក្លាយជាព្រះប្រធានរដ្ឋសភា ចន្លោះឆ្នាំ១៩៩៨ ដល់ឆ្នាំ២០០៦។
កាលពីថ្ងៃទី១៧ ខែមិថុនា ឆ្នាំ២០១៨ ក្បួនរថយន្តរបស់សម្តេចក្រុមព្រះ នរោត្តម រណឫទ្ធិ ជួបគ្រោះថ្នាក់ចរាចរណ៍ នៅផ្លូវជាតិលេខ៤ ក្នុងខេត្តព្រះសីហនុ បណ្តាលព្រះអង្គ រងរបួសធ្ងន់ធ្ងរ ហើយអ្នកម្នាង អ៊ុក ផល្លា ទទួលមរណភាព។ ភ្លាមៗ ព្រះអង្គ ត្រូវបានគេបញ្ជូនទៅព្យាបាល នៅប្រទេសថៃ និងក្រោយមក បញ្ជូនទៅព្យាបាលព្រះរោគ នៅប្រទេសបារាំង រហូតដល់ថ្ងៃចូលទិវង្គតនេះ៕
ចែករំលែកព័តមាននេះ