រាជធានីភ្នំពេញ ៖ ក្លឹបកម្សាន្ត GL Lounge អតីតក្លឹប Classic Nigh បានរៀបចំបង្ហាញសម្រស់ភេទទី៣ ដោយមានប្រគល់ពានរង្វាន់លើកទឹកចិត្តផងដែរ ។
កម្មវិធីប្រារព្ធឡើងកាលពីរាត្រីថ្ងៃទី៥ ឧសភា ឆ្នាំ២០១៦ នៅក្លឹបកម្សាន្ត GL Lounge
រាជធានីភ្នំពេញ ៖ ក្លឹបកម្សាន្ត GL Lounge អតីតក្លឹប Classic Nigh បានរៀបចំបង្ហាញសម្រស់ភេទទី៣ ដោយមានប្រគល់ពានរង្វាន់លើកទឹកចិត្តផងដែរ ។
កម្មវិធីប្រារព្ធឡើងកាលពីរាត្រីថ្ងៃទី៥ ឧសភា ឆ្នាំ២០១៦ នៅក្លឹបកម្សាន្ត GL Lounge ស្ថិតនៅតាមដងវិថីត្រសក់ផ្អែម រាជធានីភ្នំពេញ។ រាត្រីពិសេសនោះមានវត្តមានតារាជាច្រើនដួងចូលរួម ។
លោកពិសិដ្ឋ ម្ចាស់ក្លឹប GL Lounge និយាយថា ការបង្កើតកម្មវិធីនេះមានបំណងលើកទឹកចិត្តភេទទី៣ឱ្យមានកម្លាំងចិត្តខិតខំធ្វើការ ។ លើសពីនេះចង់ឲ្យពួកគេចៀសវាងអំពើមិនគប្បីដែលសង្គមស្អប់ខ្ពើម ។ ចំពោះបេក្ខជនចូលរួមទទួលពានរង្វាន់លើកទឹកចិត្តនេះគឺជាបុគ្គលិកផ្ទាល់ប្រចាំក្លឹប ។ បុគ្គលិកក្នុងក្លឹបជាភេទទី៣មានច្រើន តែអ្នកសម្តែងលើឆាកនេះមានតែ១៨នាក់ប៉ុណ្ណោះ ។ ភេទទី៣ទាំង១៨រូបនេះទទួលបានពានរង្វាន់ដូចគ្នា ដោយចែកចេញជាបួនផ្នែក ទី១រើសយកស្រីស្អាត ទី២ អ្នកឆ្នើម ទី៣អ្នកមានទេពកោសល្យ និងទី៤ ពានប្រជាប្រិយភាព ។
នេះជាលើកទី១ហើយដែលក្លឹប GL Lounge រៀបចំកម្មវិធីធំមួយ ។ ជាទូទៅការសម្តែងរបស់ភេទទី៣ប្លែកអារម្មណ៍ពីមួយថ្ងៃទៅមួយថ្ងៃធ្វើឲ្យទស្សនិកជនសប្បាយរីករាយបាត់អស់ភាពនឿយហត់ ហើយមានភ្ញៀវចូលកម្សាន្តក្នុងក្លឹបគ្រប់វ័យ មិនថាចាស់ក្មេង ឬសំដៅជាអ្នកភេទទី៣ទេ ។
លោកខេវិន អ្នកគ្រប់គ្រងប្រចាំក្លឹបឲ្យដឹងថា នេះជាខួបឆ្នាំទី១២ដែលក្លឹបកកើតឡើងតាំងពីដំបូងមក ។ ការរៀបចំកម្មវិធីនេះដើម្បីលើកទឹកចិត្តដល់បុគ្គលិកឆ្នើមប្រចាំក្លឹប ។ ក្នុងរាជធានីភ្នំពេញក្លឹបកម្សាន្ត GL Loung អាចថាពិសេសជាងគេសម្រាប់ការសម្តែងរបស់ភេទទី៣ ហើយតែងតែធ្វើឲ្យមហាជនផ្ទុះសំណើច ។ ក្លឹបនេះបើកដំណើរការមានបំណងលើកទឹកចិត្តភេទទី៣ឱ្យមានការងារធ្វើ ព្រោះភេទទី៣មានការរើសអើងច្រើន ។ តាមពិតភេទទី៣មានសមត្ថភាពក្នុងការធ្វើអ្វីមួយជួយសង្គម ។ ជាក់ស្តែងមានតារាភេទទី៣ចេញពីក្លឹប GL Lounge មានឈ្មោះល្បី គឺកញ្ញាយេយេ កញ្ញាភេងខេក កញ្ញាប្រិមប្រិយ និងលោកវីត ។
នាពេលខាងមុននេះ ក្លឹប GL Lounge មានគម្រោងប្រកួតកញ្ញាឯកភេទទី៣ ដោយមានបេក្ខជន៣០នាក់រួចជាស្រេចហើយពីគ្រប់ទិសទីបានដាក់ពាក្យចូលរួម ។ ក្នុង៣០នាក់យកតែបីនាក់សម្រាប់ទទួលពានរង្វាន់ និងផ្នែកប្រជាប្រិយមួយរូប ។
កញ្ញាយេយេជាតារាភេទទី៣បំពេញការងារនៅក្លឹប GL Lounge ច្រើនឆ្នាំនិយាយថា «ពួកយើងមិនបានប្រើពេលវេលាទៅធ្វើអ្វីខុសនឹងសង្គមឡើយ ដោយយើងយកសមត្ថភាពមកបម្រើការងារជាមួយភាព សប្បាយៗចែកជូនទស្សនិកជន ។ជាពិសេសពេលនេះនាងខ្ញុំមានអារម្មណ៍រីករាយនៅពេលដែលកិច្ចការរបស់នាងខ្ញុំបានលូតលាស់ទៅមុខ មានឱកាសសម្តែងគ្រប់ស្ថានីយទូរទស្សន៍នានា ។ មិនថាតែទូរទស្សន៍ទេ សូម្បីតែការចេញថតខារ៉ាអូខេមួយចំនួនក៏មានវត្តមានដូចគេដែរ ។ដូចនេះសូមបងប្អូនទាំងអស់កុំរើសអើងភេទទី៣ ពួកយើងក៏មានបេះដូង មានគំនិតដែរ» ៕
ចែករំលែកព័តមាននេះ