រាជធានីភ្នំពេញ ៖ នៅមុននេះបន្តិច យុវជនទំនើងម្នាក់ ដែលបានជេរប្រមាថមើលងាយ និងដេញវាយសមត្ថកិច្ច ដែលកំពុងអនុវត្តច្បាប់ចរាចរណ៍ផ្លូវគោក នៅចំណុចក្រោមស្ពានអាកាសស្ទឹងមានជ័យនោះ ត្រូវបានឃាត់ខ្លួនបានកាលពីវេលាម៉ោង ០១នាទីរសៀលថ្ងៃទី២៦…
រាជធានីភ្នំពេញ ៖ នៅមុននេះបន្តិច យុវជនទំនើងម្នាក់ ដែលបានជេរប្រមាថមើលងាយ និងដេញវាយសមត្ថកិច្ច ដែលកំពុងអនុវត្តច្បាប់ចរាចរណ៍ផ្លូវគោក នៅចំណុចក្រោមស្ពានអាកាសស្ទឹងមានជ័យនោះ ត្រូវបានឃាត់ខ្លួនបានកាលពីវេលាម៉ោង ០១នាទីរសៀលថ្ងៃទី២៦ ខែវិច្ឆិកា ឆ្នាំ២០២១នេះ នៅចំណុចសាលមហោស្របចេនឡា ម្តុំផ្សារដើមគរ និងនាំខ្លួនទៅសាកសួរ នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីចាត់ការបន្តតាមនីតិវិធីច្បាប់ ។
ការចាប់ឃាត់ខ្លួនយុវជនទំនើងរូបនេះ ក្រោយពីលោកនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ បានបញ្ជាតាមរយៈសារជាសំឡេង ឲ្យកម្លាំងនគរបាលរាជធានីភ្នំពេញ ចាប់ឃាត់ខ្លួនយុវជនទំនើងម្នាក់ ដែលល្មើសច្បាប់ចរាចរណ៍ ហើយជេរប្រមាថមើលងាយ គំរាមដកស័ក្តិ និងបម្រុងវាយមន្ត្រីនគរបាលចរាចរណ៍ ដែលកំពុងអនុវត្តច្បាប់ នៅគោលដៅស្ពានអាកាសស្ទឹងមានជ័យ ។
នាយឧត្តមសេនីយ៍ សន្ដិបណ្ឌិត នេត សាវឿន បានណែនាំច្រើនដងហើយ មានករណីកើតឡើង មើលងាយ មើលថោក មកលើកម្លាំងសមត្ថកិច្ច ដែលកំពុងបំពេញកាតព្វកិច្ច នៅលើដងផ្លូវសាធារណៈ អ៊ីចឹងត្រូវហៅកម្លាំងអន្ដរាគមន៍ដាក់ខ្នោះភ្លាម យកមកប៉ុស្ដិ៍ អត់មានឈ្លោះ អត់មានប្រកែកប្រណាំង ។ យើងត្រូវប្ដឹងទៅតុលាការពីបទរារាំង បទបំផ្លាញកិច្ចការរបស់យើង មើលងាយមើលថោកកងកម្លាំង ។ រឿងនៅភ្នំពេញនេះ ត្រូវរៀបឯកសារទៅតុលាការ ។
សូមរម្លឹកឡើងវិញថា ជារឿងទំនើងមួយ ដែលយុវជនម្នាក់ បានជេរប្រមាថធ្ងន់ៗលើសមត្ថកិច្ចកំពុងអនុវត្តច្បាប់ ដោយគំរាមដកស័ក្តិចោល និងបម្រុងប្រើហិង្សាបន្ថែមទៀត ដោយគ្រាន់តែផ្តើមចេញពីការដែលយុវជនរូបនោះ ព្យាយាមជិះម៉ូតូត្រឡប់ក្រោយ គេចពីការគោលដៅអនុវត្តច្បាប់ចរាចរណ៍របស់សមត្ថកិច្ច ហើយបើកម៉ូតូទៅបង្កគ្រោះថ្នាក់ ដល់អ្នកដទៃទៀត ។
ហេតការណ៍នេះ បានបង្កអោយមានការភ្ញាក់ផ្អើលឡើងជាខ្លាំង កាលពីវេលាម៉ោង១៤រសៀលថ្ងៃទី២៥ ខែវិច្ឆិកា ឆ្នាំ២០២១ នៅចំណុចក្រោមស្ពានអាកាសស្ទឹងមានជ័យ ស្ថិតតាមបណ្តោយផ្លូវ២៧១ កែងនឹងផ្លូវលេខ២១៧ ក្នុងសង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ។
យុវជនទំនើងរូបនោះ មិនទាន់ត្រូវបានស្គាល់អត្តសញ្ញាណ ដោយមានវ័យប្រមាណ ជាង ២០ឆ្នាំ ជិះម៉ូតូមួយគ្រឿង ម៉ាកស្មាស់រ៉េវវូ ពណ៌ខ្មៅ ពាក់ស្លាកលេខ ភ្នំពេញ 1BG-5792 ។
ពេលនោះ សមត្ថកិច្ចបានដើរ ទៅជួយលើកម៉ូតូ និងសាកសួរនាំ អំពីមូលហេតុ ស្រាប់តែយុវជនរូបនោះ កើតចិត្តខឹងសម្បាជាមួយសមត្ថកិច្ច នឹងបានប្រើប្រាស់សម្តីជេរដៀលប្រមាថធ្ងន់ៗ សុទ្ធតែពាក្យអសុរសអាមឹង និងបានសម្លុតគំរាមដកស័ក្តិ រួមជាបម្រុងនឹងប្រើប្រាស់ហិង្សា ទៅលើសមត្ថកិច្ចជាច្រើន លើកច្រើនសារទៀតផង បង្កអោយមានការភ្ញាក់ផ្អើលជាខ្លាំង ។
បន្ទាប់ពីទទួលរងនូវការជេរប្រមាថ និងបម្រុងប្រើប្រាស់ហិង្សាហើយនោះ សមត្ថកិច្ចបានសម្រេចធ្វើការនាំខ្លួនយុវជនរូបនោះ ទៅកាន់ការិយាល័យនគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីសាកសួរនាំបន្តនីតិវិធី ។
ជុំវិញ ទង្វើដ៏ទំនើងរបស់យុវជនខាងលើនេះ គេនៅរងចាំមើល ថាតើ ជនទំនើងរូបនេះ អាចនឹងត្រូវរួចខ្លួន ដោយមិនមានកំហុសអ្វី ឬត្រូវអនុវត្តទោសទណ្ឌតាមច្បាប់ ពីបទដែលរូបគេ ជេរគំរាមគំហែង និងប៉ងប្រើប្រាស់ហិង្សា ទៅលើមន្ត្រីអ្នកអនុវត្តច្បាប់នោះ ៕
ចែករំលែកព័តមាននេះ