រាជធានីភ្នំពេញ ៖ ទំហំពាណិជ្ជកម្មកម្ពុជាជាមួយប្រទេសដៃគូក្នុងតំបន់ និងសកលលោកនៅក្នុងឆ្នាំ២០១៥កន្លងមក មានទឹកប្រាក់សរុប១៩.២១១លានដុល្លារ ធ្លាក់ចុះ៣៥% បើធៀបនឹងរយៈពេលដូចគ្នាកាលពីឆ្នាំ២០១៤ ។ នេះបើតាមរបាយការណ៍របស់វិទ្យាស្ថានស្ថិតិជាតិ និងរដ្ឋាករកម្ពុជា ដែលផ្តល់ដោយក្រសួងពាណិជ្ជកម្មកម្ពុជា ។
របាយការណ៍ដដែលបង្ហាញថា ចាប់តាំងពីឆ្នាំ២០១០ រហូតដល់ឆ្នាំ២០១៤ ទំហំពាណិជ្ជកម្មជាមួយប្រទេសជាដៃគូទាំងក្នុង និងក្រៅតំបន់ មានសន្ទុះគួរឲ្យកត់សម្គាល់ ។
ជាក់ស្ដែង នៅក្នុងឆ្នាំ២០១០ មានទឹកប្រាក់សរុបជាង១០.៤៨០លានដុល្លារ ក្នុងនោះទឹកប្រាក់នាំចេញមានជាង ៥.៥៨៣លានដុល្លារ និងនាំចូលជាង៤.៨៩៦លានដុល្លារ ។
នៅក្នុងឆ្នាំ២០១១ ការនាំចេញ និងនាំចូលមានទឹកប្រាក់ជាង១២.៨៣០លានដុល្លារ កើនឡើងប្រមាណ២២% ។ នៅក្នុងឆ្នាំ២០១២ ទំហំពាណិជ្ជកម្មកម្ពុជាមានទឹកប្រាក់ជាង១៤.៨៩៧លានដុល្លារ កើនឡើង១៦%។ សម្រាប់ឆ្នាំ២០១៣ មានទឹកប្រាក់ជាង១៨.៤៧៩លានដុល្លារ កើនឡើង២៤% និងនៅឆ្នាំ២០១៤ មានទឹកប្រាក់ជាង២៩.៧០៧លានដុល្លារ កើនឡើង៦១% បើធៀបនឹងរយៈពេលដូចគ្នាក្នុងឆ្នាំកន្លងមក ។
ពាក់ព័ន្ធនឹងការធ្លាក់ចុះនេះនៅក្នុងឆ្នាំ២០១៥កន្លងមកនេះ បើតាមអ្នកវិភាគសេដ្ឋកិច្ចឯករាជ្យ លោក ស្រី ចន្ធី បានមានប្រសាសន៍ថា៖ « ការធ្លាក់ចុះនេះ ដោយសារតែសេដ្ឋកិច្ចពិភពលោកមានការលូតលាស់យឺត ដែលធ្វើឱ្យការនាំចេញរបស់កម្ពុជាថយចុះ ។ ខ្ញុំជឿថា មិនត្រឹមតែការនាំចេញមានការថយចុះប៉ុណ្ណោះទេ សូម្បីតែចំនួនភ្ញៀវទេសចរដែលចូលមកកម្ពុជា ក៏មានកំណើនយឺតផងដែរ ដោយសារតែកំណើនសេដ្ឋកិច្ចចិនធ្លាក់ចុះ ហើយនៅខាងអឺរ៉ុបក៏ជួបបញ្ហា ។ ម្យ៉ាងទៀត អាចមកពីខាងអ្នកបញ្ជាទិញសម្លៀកបំពាក់នៅពេលកន្លងមក ពួកគាត់បញ្ជាទិញពីប្រទេសផ្សេង ពីព្រោះកាលពីឆ្នាំទៅ កម្ពុជាមានបញ្ហាកម្មករធ្វើបាតុកម្មធ្វើឲ្យអាក់ខានដល់ខ្សែសង្វាក់ផលិតកម្ម » ។
យោងតាមព្រឹត្តិបត្រសហគមរោងចក្រកាត់ដេរនៅកម្ពុជា (GMAC) បានបង្ហាញថា ក្នុងត្រីមាសទី៤ឆ្នាំ២០១៥ (តុលា-ធ្នូ) ចំនួនកូដកម្មដែលកើតឡើងលើសមាជិក ហើយបានជូនដំណឹងមកសមាគមមានចំនួន២៨ករណី បើធៀបនឹងរយៈត្រីមាសទី៣(កក្កដា-កញ្ញា)កើនឡើង២២% ។ កំណើននេះធ្វើឲ្យចំនួនថ្ងៃដែលខូចខាតដោយសារតែកូដកម្មនៅត្រីមាសទី៤មានរហូតដល់១៥៨.៩៣៩ថ្ងៃ កើនឡើងប្រមាណ២៤,៤២% បើធៀបនឹងចំនួនថ្ងៃខូចខាតដោយសារកូដកម្មក្នុងត្រីមាសទី៣ ។
លោក ស្រី ចន្ធី បានបន្ដថា ៖ « ការធ្វើពាណិជ្ជកម្មរបស់យើងនាពេលកន្លងមក គឺផ្អែកសំខាន់ទៅលើវិស័យកាត់ដេរ ស្បែកជើង សម្លៀកបំពាក់ ហើយកម្លាំងពលកម្មយើងនៅមានតម្លៃសមរម្យ បើធៀបនឹងប្រទេសក្នុងតំបន់ ។ ការអភិវឌ្ឍវិស័យហេដ្ឋារចនាសម្ព័ន្ធ នៅកម្ពុជាមានច្រើន ដែលជាកត្តាទាក់ទាញ ។ លើសពីនេះទៀត ខាងសហគមន៍អឺរ៉ុប និងខាងអាមេរិក គេបើកទីផ្សារឲ្យយើង ដែលធ្វើឲ្យកម្ពុជាអាចនាំស្រូវ និងអង្ករទៅខាងអឺរ៉ុប និងចិនបានច្រើន » ។
លោកបន្ថែមថា ៖ « បើយើងសង្កេតមើលចាប់តាំងពីកម្ពុជាចូលជាសមាជិក WTO កាលពីឆ្នាំ២០០៤កន្លងមកឃើញថា ទំហំពាណិជ្ជកម្មកម្ពុជាកាន់តែរីកចម្រើនឡើង ដោយសារតែគេបើកចំហទីផ្សារឲ្យកម្ពុជា ជាពិសេស ទៅលើវិស័យកាត់ដេរសម្លៀកបំពាក់ ។ ប៉ុន្តែអ្វីដែលសំខាន់នោះ គឺដោយសារតែកម្ពុជាមានស្ថិរភាពនយោបាយល្អ កម្ពុជាមានគោលនយោបាយសេដ្ឋកិច្ចល្អ ហើយច្បាប់វិនិយោគមានការអនុគ្រោះសម្រាប់ទាក់ទាញវិនិយោគិនបរទេស » ។
លោកបញ្ជាក់ថា ៖ « នៅឆ្នាំ២០១៦នេះ ខ្ញុំគិតថា ប្រហែលជាគ្មានអ្វីជាបញ្ហានោះទេ ។ ការនាំចេញរបស់យើងនឹងល្អ ព្រោះសេដ្ឋកិច្ចចិន អាមេរិកាំង និងនៅអឺរ៉ុបអត់មានបញ្ហាទេ ។ អីុចឹងហើយ ខ្ញុំជឿថា វាអាចទៅដោយរលូនបានច្រើនជាងឆ្នាំកន្លងមក » ។
ដើម្បីជំរុញការធ្វើពាណិជ្ជកម្មឲ្យកាន់តែមានការរីកចម្រើន លោក ស្រី ចន្ធី យល់ឃើញថា ៖ « ការលំបាករបស់ប្រទេសយើង គឺពឹងផ្អែកខ្លាំងពេកទៅលើរោងចក្រធុនស្រាល។ គួរតែធ្វើ ម៉េចទាក់ទាញឲ្យមានការវិនិយោគលើវិស័យឧស្សាហកម្មធុនមធ្យម និងធ្ងន់ ឬខាងបច្ចេកវិទ្យា ។ ប៉ុន្តែយើងខ្វះមនុស្សមានជំនាញ ហើយផ្នែកហេដ្ឋារចនាសម្ព័ន្ធដឹកជញ្ជូននៅមិនទាន់គ្រប់គ្រាន់ ជាពិសេស ប្រព័ន្ធដឹកជញ្ជូន និងអគ្គិសនីនៅមានតម្លៃខ្ពស់ជាងប្រទេសផ្សេងទៀត ។ ដូចនេះ គួរតែសម្រួលទាក់ទងនឹងឯកសារសម្រាប់នាំចេញ បើយើងអាចធ្វើឲ្យកាន់តែប្រសើរឡើង ដោយចំណាយកាន់តែតិច ហើយរយៈពេលធ្វើកាន់តែលឿន និងធ្វើឲ្យមានការទាក់ទាញ » ៕
ចែករំលែកព័តមាននេះ