រាជធានីភ្នំពេញ ៖ បើគ្មានអ្វីប្រែប្រួលទេ កម្ពុជានឹងមានរោងចក្រចម្រាញ់ប្រេងកាតរបស់ខ្លួននៅចុងឆ្នាំ២០១៨ខាងមុខនេះ ដែលជាការវិនិយោគរួមគ្នារវាងក្រុមហ៊ុនខេមបូឌាន ភេត្រូខេមីខល ខូអិលធីឌី (CPC)
រាជធានីភ្នំពេញ ៖ បើគ្មានអ្វីប្រែប្រួលទេ កម្ពុជានឹងមានរោងចក្រចម្រាញ់ប្រេងកាតរបស់ខ្លួននៅចុងឆ្នាំ២០១៨ខាងមុខនេះ ដែលជាការវិនិយោគរួមគ្នារវាងក្រុមហ៊ុនខេមបូឌាន ភេត្រូខេមីខល ខូអិលធីឌី (CPC) ជាមួយក្រុមហ៊ុន CNPC Northeast Refining & Chemical Engineering របស់ប្រទេសចិន ។
រោងចក្រចម្រាញ់ប្រេងកាតនេះ នឹងអនុវត្តនៅដំណាក់កាលទី១ ក្នុងទំហំទឹកប្រាក់៦២០លានដុល្លារអាមេរិក ដែលមានសមត្ថភាពផលិតបាន២លានតោនក្នុង១ឆ្នាំ ស្ថិតនៅស្រុកព្រៃនប់ ខេត្តព្រះសីហនុ លើផ្ទៃដីប្រមាណ៤០ហិកតា ក្នុងចំណោមផ្ទៃដីសរុប៤០០ហិកតា ។
ថ្លែងក្នុងពិធីចុះហត្ថលេខា កាលពីថ្ងៃទី៤ឧសភា ឆ្នាំ២០១៦ លោកឧកញ៉ា ហាន់ ឃៀង អគ្គនាយកប្រតិបត្តិរបស់ក្រុមហ៊ុន (CPC) បានមានប្រសាសន៍ថា ៖ « ក្រុមហ៊ុនយើងដាក់ទុនវិនិយោគចំនួន៦២០លានដុល្លារអាមេរិក សម្រាប់គម្រោងដំណាក់កាលទី១ នៃការសាងសង់រោងចក្រចម្រាញ់ប្រេងនេះ ។ បើគ្មានការប្រែប្រួលទេនោះ ការសាងសង់វគ្គដំបូងនេះនឹងត្រូវបញ្ចប់នៅចុងឆ្នាំ២០១៨ ជាមួយនឹងសមត្ថភាពផលិតជាផលិតផលសម្រេចបាន២លានតោនក្នុង១ឆ្នាំ ។ នេះអាចរាប់ជាកាលានុវត្តភាពនៃការអភិវឌ្ឍ និងឈានឡើងនៃវិស័យឧស្សាហកម្មប្រេងឥន្ធនៈកម្ពុជា ដើម្បីកិត្តិនាមរួមរបស់កម្ពុជា និងជាពេលវេលាដ៏សមស្របមួយសម្រាប់កម្ពុជា ក្នុងការកសាងកេរ្ដិ៍ឈ្មោះបោះសំឡេងនៅទូទាំងពិភពលោក ខណៈដែលខ្លួនមានសមត្ថភាពអាចផលិតប្រេងសម្រាប់ប្រើប្រាស់ក្នុងស្រុក និងធ្វើការនាំចេញបាន » ។
លោកឧកញ៉ាបន្ដថា៖ « គម្រោងនេះនឹងត្រូវសាងសង់ឡើងជាមួយឧបករណ៍ ព្រមទាំងបច្ចេកវិទ្យាទំនើបចុងក្រោយបំផុត ព្រោះវាជារោងចក្រចម្រាញ់ប្រេងទី១នៅកម្ពុជា ។ ក្រុមហ៊ុននឹងបង្កើនការវិនិយោគបន្ថែមនៅក្នុងគម្រោងចំនួន៣ប៊ីលានដុល្លារអាមេរិកទៀត ជាមួយនឹងការបង្កើនសមត្ថភាពផលិតឲ្យបាន៥លានតោនក្នុង១ឆ្នាំ នៅដំណាក់កាលបន្ទាប់ » ។
លោក LI LIMIN ប្រធានអគ្គនាយកក្រុមហ៊ុន CNPC Northeast បានមានប្រសាសន៍ថា ៖ « CNPC Northeast ជាសហគ្រាសរដ្ឋរបស់ចិនក្នុងវិស័យឧស្សាហកម្មគីមីឥន្ធនៈ ហើយជាសហគ្រាសបុត្រសម្ព័ន្ធរបស់សហគ្រាសរដ្ឋដ៏ធំមួយរបស់សាធារណរដ្ឋប្រជាមានិតចិន ឈ្មោះ «ក្រុមហ៊ុន CNPC» (ស៊ី.អិន.ភី.ស៊ី) ។ ក្រុមហ៊ុនCNPC បានចុះបញ្ជីផ្សារភាគហ៊ុននៅឆ្នាំ២០១០ ដោយមានតម្លៃហ៊ុនសរុបជាង៣.០០០ប៊ីលានដុល្លារអាមេរិក ។
លោកបន្តថា ៖ « ក្រុមហ៊ុន CNPC Northeast ជាក្រុមហ៊ុននាំមុខគេដែលមានជំនាញខាងរចនាប្លង់សរុបទាំងការសាងសង់និងដំឡើងខ្សែសង្វាក់ផលិកម្មរោងចក្រចម្រាញ់ប្រេង ។ ក្រុមហ៊ុននេះមានធនធានមនុស្សជំនាញផ្នែកវិស្វកម្មសំណង់ឧស្សាហកម្មគីមីឥន្ធនៈប្រកបដោយសក្តានុពល ។ ដោយសារ «ក្រុមហ៊ុនស៊ី.ភី.ស៊ី» របស់កម្ពុជាផ្តល់នូវទំនុកចិត្តខ្ពស់បំផុតដល់សហគ្រាសយើងខ្ញុំ ទើបសម្រេចឲ្យយើងធ្វើជាភាគីអនុវត្តកិច្ចសន្យាការងារលទ្ធកម្ម និងសាងសង់រោងចក្រចម្រាញ់ប្រេងនេះ » ។
ថ្លែងនាឱកាសនោះ លោក ស៊ុយ សែម រដ្ឋមន្ត្រីក្រសួងរ៉ែ និងថាមពល ក៏បានសម្ដែងនូវការស្វាគមន៍ចំពោះគម្រោងនេះផងដែរ ។
លោករដ្ឋមន្ត្រី បានមានប្រសាសន៍ថា ៖ « ការវិនិយោគនេះបានបង្ហាញយ៉ាងច្បាស់ពីទំនុកចិត្តរបស់បណ្ដាវិនិយោគិនទៅលើស្ថិរភាពនយោ បាយ និងបរិយាកាសសេដ្ឋកិច្ចនៅកម្ពុជា ។ គម្រោងនេះ មិនត្រឹមតែផ្ដល់នូវគុណសម្បត្តិដ៏មហាសាលដល់កម្ពុជាប៉ុណ្ណោះទេ ថែមទាំងបានចូលរួមចំណែកក្នុងការរឹតចំណងមិត្តភាព និងកិច្ចសហប្រតិបត្តិការដ៏ជិតស្និទ្ធរបស់កម្ពុជា និងចិនផងដែរ » ។ លោករដ្ឋមន្ត្រី ក៏បានសម្តែងនូវការអរគុណយ៉ាងស្មោះចំពោះរដ្ឋាភិបាលចិន ដែលបានជំរុញវិនិយោគិនឱ្យមកវិនិយោគនៅកម្ពុជា ។
គួរបញ្ជាក់ថា ក្រុមហ៊ុន ខេមបូឌាន ភេត្រូខេមីខល ខូអិលធីឌី «C.P.C» គឺជាក្រុមហ៊ុនមួយមានម្ចាស់ភាគហ៊ុនជាពាណិជ្ជករក្នុងស្រុកនិងបរទេស ដែលបានចុះបញ្ជិការពាណិជ្ជកម្មនៅកម្ពុជា កាលពីឆ្នាំ២០១០ ។ កន្លងមក ក្រុមហ៊ុននេះបានទទួលអាជ្ញាប័ណ្ណពីរាជរដ្ឋាភិបាលកម្ពុជាឲ្យធ្វើការវិនិយោគសាងសង់រោងចក្រចម្រាញ់ប្រេងកាតយ៉ាងធំមួយនៅក្នុងភូមិសាស្ត្រខេត្តព្រះសីហនុ ។ រោងចក្រចម្រាញ់ប្រេងកាតនេះ ជាគម្រោងវិនិយោគលើវិស័យប្រេងឥន្ធនៈប្រកបដោយមហិច្ឆតាតែមួយគត់ មិនធ្លាប់មានពីមុននៅកម្ពុជាគិតមកដល់ពេលនេះ នឹងត្រូវប្រើទឹកប្រាក់បណ្តាក់ទុនប្រមាណ៣ពាន់លានដុល្លារអាមេរិក ។ នៅពេលសាងសង់រួចជាស្ថាពរហើយដំណើរការពេញសមត្ថភាព រោងចក្រនេះអាចផលិតប្រេងបាន៥លានតោនក្នុង១ឆ្នាំ ។
បច្ចុប្បន្ននេះ កម្ពុជាបាននាំចូលនូវប្រេងឥន្ធនៈទាំងស្រុងពីប្រទេសវៀតណាម សិង្ហបុរី និងថៃ ខណៈដែលប្រេងនិងឧស្ម័ននៅបាតសមុទ្រ និងក្រោមដីរបស់ខ្លួន មិនទាន់អាចធ្វើអាជីវកម្មបាន ៕
ចែករំលែកព័តមាននេះ