ខេត្តកំពង់ស្ពឺ ៖ ប៉ុន្មានថ្ងៃ ជាប់ៗគ្នាមនុស្សម្នាភ្ញាក់ផ្អើលទៅមើលបារមីពស់អ្នកតាចូលសណ្ឋិតលើបុរសម្នាក់ ។ ហេតុការណ៍នេះកើតឡើងតាំងពីថ្ងៃទី២ ឧសភា ២០១៦ មកនៅទួលអង្គកំណប់ ក្នុងសង្កាត់រកាធំ ក្រុងច្បារមន ខេត្តកំពង់ស្ពឺ ។ តួអង្គបុរសដែលបារមីពស់ចូលសណ្ឋិតនោះឈ្មោះលីន អាយុ៣១ឆ្នាំ មានទីលំនៅក្នុងភូមិអង្គសេរី សង្កាត់រកាធំ ។
បុរសបារមីពស់ចូលសណ្ឋិតនោះ រៀបរាប់ថា នៅពេលគាត់ទៅមើលគោ ម្តងៗ តែងតែយកបាយ និងល្ង ទុកហូបជាប់ជាប្រចាំហើយមិនភ្លេចរំលែកបន្តិចដាក់សែនថ្វាយនៅទួល អង្គ។ ការធ្វើបែបនេះចាប់តាំងពីអំឡុងឆ្នាំ២០១៥មក។ នៅថ្ងៃទី២៩ មីនា ២០១៦ ពេលគាត់ដេញគោទៅឃ្វាល ស្រាប់តែឃើញពស់ថ្លាន់ធំមួយក្បាលនៅទួលអង្គនោះ។ គាត់និយាយទៅកាន់ពស់នោះថា«កុំធ្វើបាបកូនចៅ កុំឱ្យកូនចៅខ្លាច» ។ ថាតែប៉ុណ្ណឹងស្រាប់តែពស់នោះលូនចូលក្នុងរូងបាត់ទៅ ។
បន្ទាប់មកនៅថ្ងៃទី២ ឧសភា នាពេលយប់ ស្រាប់តែបុរសឃ្វាលគោយល់សប្តិឃើញពស់បារមីនោះប្រាប់ថា «ឃ្លានបបរស និងដំឡូងជ្វា សូមដាក់ថ្វាយរបស់ទាំងនោះដល់បារមីផង » ។ ស្អែកឡើងលោកលីនបានដាំបបរស ព្រមទាំងយកដំឡូងជ្វាស្ងោរ ទៅថ្វាយនៅទួលអង្គកំណប់ឧទ្ទិសដល់បារមីពស់ ។ ដាក់ថ្វាយរួចហើយគាត់ក៏ចេញទៅឃ្វាលគោ ។ លុះយប់ឡើងបារមីពស់ប្រាប់លោកលីនថា «គាត់ជាមនុស្សមាននិស្ស័យជាមួយគ្នា ដូច្នេះសូមទៅយកកំណប់នៅទួលអង្គចុះ » តែគាត់បដិសេធមិនព្រមយកទេ ព្រោះគាត់មិនមែនជាមនុស្សលោភលន់ ខ្លាចក្រែងយកហើយ កើតក្តីអន្តរាយដល់គ្រួសារ ។
បន្ទាប់ពីជួបរឿងទាំងនោះមក បុរសគង្វាលគោបានយកភ្លេងពិណពាទ្យទៅលេងថ្វាយថែមទាំងនិមន្តព្រះសង្ឃ៧អង្គសូត្រមន្ត និងវេរភត្តាហារនៅលើទីទួលអង្គទៀតផង ។ គាត់ឧទ្ទិសកុសលថ្វាយដល់បារមីពស់ថ្លាន់ ដែលតែងតែពន្យល់សប្តិដល់គាត់ ។
អ្វីដែលជាហេតុភេទអស្ចារ្យនោះត្រង់ថា នៅពេលភ្លេងពិណពាទ្យកំពុងតែបន្លឺឡើង ស្រាប់តែបារមីពស់ចូលសណ្ឋិតក្នុងរូបបុរសគង្វាលគោ ធ្វើឱ្យគាត់លូនដូចជាសត្វពស់ទៅរកស៊ីធូបដែលអ្នកមានជំនឿអុជ ព្រមទាំងលិទ្ធទឹកទៀតផង ។
បុរសបារមីពស់ចូលសណ្ឋិត មិនបានដឹងខ្លួនទាល់តែសោះ រហូតដល់បារមីចេញទៅវិញទើបគាត់ដឹងខ្លួន ។ មកដល់ពេលនេះគាត់នៅឈឺខ្លួននៅឡើយ ។
អ្នកស្រុកឱ្យដឹងថា បុរសឈ្មោះលីន ជាមនុស្សស្លូតបូត សុភាពរាបសា ស្គាល់ចាស់ទុំ ។ ឱ្យតែមានពិធីបុណ្យក្នុងភូមិ លោកលីន តែងតែទៅជួយដោយមិនគិតពីការនឿយ ហត់ និងមិនយកប្រាក់កម្រៃទេ ។
ចំពោះទួលអង្គកំណប់នោះវិញ មានតាំងពីយូរណាស់មកហើយ ។ អ្នកស្រុកជឿថា ទីទួលនោះមានបារមីសក្ដិសិទ្ធិណាស់ កាលពីដើមឡើយឱ្យតែអ្នកភូមិរៀបពិធីបុណ្យ ឬរៀបមង្គលការកូនចៅ ហើយខ្វះចាន ឆ្នាំងប្រើប្រាស់ តែងតែទៅអុជធូបបន់សុំខ្ចីយកទៅប្រើ ។ ក្រោយពេលបន់មួយថ្ងៃ ស្អែកឡើងទៅមើលនឹងឃើញមានចាន ឆ្នាំងពេញព្រៀបនៅលើទួលអង្គ ។ បន្ទាប់ពីខ្ចីយកទៅប្រើហើយ ត្រូវយកទៅសងវិញ ។ ទោះជាយ៉ាងណាក្តី ក្រោយៗមកអ្នកខ្ចីយកទៅប្រើមិនសូវយកទៅសងវិញទេ ដូច្នេះហើយក៏ខ្ចីវត្ថុប្រើប្រាស់នោះលែងបានទៀត ។ រហូតដល់សព្វថ្ងៃ អ្នកស្រុកនៅតែមានជំនឿថា ទួលអង្គកំណប់មានបារមីស័ក្ដិសិទ្ធិនៅឡើយ ។
អ្នកភូមិដែលទៅចោមរោមមើលមានជំនឿថា ពស់ថ្លាន់ដែលប្រាកដខ្លួនឱ្យឃើញនោះ គឺជាពស់អ្នកតាមានបារមីនៅយាមកំណប់នៅទួល អង្គ ។ អ្វីដែលអ្នកភូមិធ្លាប់ជួបប្រទះកន្លងមក គឺបើបាត់គោក្របី ឬរបស់អ្វីមួយនោះ គ្រាន់តែទៅអុជធូបបន់ ប្រាកដជារកឃើញវិញ ។ ពិសេសជាងនេះទៅទៀត អ្នកណាសុំលេខឆ្នោតច្បាស់ជាចាក់ត្រូវមិនខាន ។ ជាក់ស្ដែងនៅពេលបុរសឈ្មោះលីន កំពុងតែបួងសួងសុំឱ្យបារមីពស់បង្ហាញខ្លួន ស្រាប់តែឃើញពស់តូចមួយនៅលើដើមឈើ ។ ពស់នោះត្រូវបុរសឈ្មោះលីន អះអាងថា«ជាបារមីសម្ដែងឱ្យខ្លួនតូច កុំឱ្យកូនចៅខ្លាច ។ បើសម្ដែងឱ្យធំប៉ុនដើមត្នោតក៏បាន តែបារមីមិនធ្វើដូច្នេះទេ» ៕
ចែករំលែកព័តមាននេះ