រាជធានីភ្នំពេញ ៖ ដើម្បីជំរុញការអភិវឌ្ឍវិស័យអចលនវត្ថុប្រកបដោយចីរភាព ស្ថិរភាព ប្រសិទ្ធភាព និងស័ក្ដិសិទ្ធិភាព គេគួររៀបចំស្តង់ដារអ្នកវាយតម្លៃអចលនវត្ថុ ។ សម្រាប់ប្រទេសដែលមិនទាន់មានស្តង់ដារវាយតម្លៃអចលនវត្ថុដូចជាកម្ពុជា គួររៀបចំស្តង់ដារវាយតម្លៃអចលនវត្ថុនេះឡើងឱ្យបានឆាប់…
រាជធានីភ្នំពេញ ៖ ដើម្បីជំរុញការអភិវឌ្ឍវិស័យអចលនវត្ថុប្រកបដោយចីរភាព ស្ថិរភាព ប្រសិទ្ធភាព និងស័ក្ដិសិទ្ធិភាព គេគួររៀបចំស្តង់ដារអ្នកវាយតម្លៃអចលនវត្ថុ ។ សម្រាប់ប្រទេសដែលមិនទាន់មានស្តង់ដារវាយតម្លៃអចលនវត្ថុដូចជាកម្ពុជា គួររៀបចំស្តង់ដារវាយតម្លៃអចលនវត្ថុនេះឡើងឱ្យបានឆាប់ និងត្រូវមានស្តង់ដារអ្នកវាយតម្លៃអចលនវត្ថុរួមមួយក្នុងក្របខណ្ឌតំបន់អាស៊ាន ។ នេះជាការលើកឡើងរបស់លោក អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ។
លោកបន្តថាក្រៅពីនេះដើម្បីអភិវឌ្ឍន៍វិស័យនេះឲ្យទៅមុខពិសេសការស្តារឡើងវិញក្រោយវិបត្តិកូវីដ១៩នេះ គេគួរជំរុញលើកកម្ពស់ការងារពង្រឹងវិជ្ជាជីវៈនិងគុណវុឌ្ឍអ្នកវាយតម្លៃអចលនវត្ថុឱ្យកាន់តែប្រសើរ រួមនិងការពង្រឹងកិច្ចសហប្រតិបត្តិការរវាងឯកជននិងឯកជន ឯកជន និងនិយ័តករ និងរវាងនិយ័តករ និងនិយ័តករ តាមរយៈការផ្តាស់ប្តូរជំនាញ បទពិសោធន៍ បច្ចេកវិទ្យា ការវិនិយោគ និងអាជីវកម្មរួមគ្នា ។
លោក អូន ព័ន្ធមុន្នីរ័ត្ន បានផ្តល់អនុសាសន៍បែបនេះនៅពេលលោកបានចូលរួម សមាជលើកទី ២៣ របស់សមាគមអ្នកវាយតម្លៃអចលនវត្ថុអាស៊ាន (AVA) ដែលសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) ធ្វើជាម្ចាស់ផ្ទះនៅថ្ងៃទី ២៥ វិច្ឆិកា២០២១ ក្រោមប្រធានបទ «ការវាយតម្លៃអចលនវត្ថុ ក្នុងអំឡុងពេលនៃការរីករាលដាលជំងឺកូវីដ-១៩» ។
លោករដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា អ្នកវាយតម្លៃអចលនវត្ថុដើរតួនាទីយ៉ាងសំខាន់សម្រាប់អភិវឌ្ឍន៍វិស័យអចលនវត្ថុនៅក្នុងប្រទេស និងតំបន់ ។ ទោះបីជាកម្ពុជាកំពុងប្រឈមនិងជំងឺកូវីដ ១៩ ប៉ុន្តែវិស័យអចលនវត្ថុនៅក្នុងប្រទេសនៅតែមានសក្តានុពលខ្ពស់ និងមានតម្លៃទាបសមរម្យសម្រាប់ការវិនិយោគបើប្រៀបធៀបទៅនិងប្រទេសជិតខាង ។
លោករដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានលើកឡើងថា ក្នុងឆ្នាំ ២០២២ សេដ្ឋកិច្ចប្រទេសកម្ពុជាត្រូវបានរំពឹងថា នឹងសម្រេចបានកំណើនប្រមាណ ៤,៨% ដោយសារការបន្តងើបឡើងវិញនៃសកម្មភាពសេដ្ឋកិច្ចក្នុងស្រុក និងសកល ។ ជាមួយគ្នានេះអនុវិស័យអចលនវត្ថុនៅកម្ពុជាត្រូវបានព្យាករណ៍ថា នឹងងើបឡើងវិញក្នុងកំណើនទាប ២,៤% នៅក្នុងឆ្នាំ ២០២១ និង ៤,៨% នៅឆ្នាំ ២០២២ ដោយសារការកើនឡើងជាសន្សឹមៗនៃលំហូរទុនវិនិយោគពីខាងក្រៅ ខណៈការវិនិយោគ និងតម្រូវការក្នុងស្រុកលើវិស័យអចលនវត្ថុមានតម្លៃទាប និងមធ្យមនឹងបន្តរក្សាបានកំណើនល្អប្រសើរ ។
«តំបន់សំខាន់ៗមួយចំនួនដូចជា រាជធានីភ្នំពេញ និងខេត្តកណ្តាល ដែលគម្រោងសាងសង់អាកាសយានដ្ឋានថ្មីកំពុងត្រូវបានអនុវត្តន៍, ខេត្តព្រះសីហនុ កំពុងត្រូវបានប្រែក្លាយជាតំបន់សេដ្ឋកិច្ចពិសេសពហុបំណង, ខេត្តសៀមរាប ជាតំបន់ទេសចរណ៍ប្រវត្តិសាស្ត្រ, ក្រុងបាវិតដែលជាមាត់ច្រកព្រំដែនកម្ពុជា វៀតណាម និងក្រុងប៉ោយប៉ែត ដែលជាមាត់ច្រកព្រំដែនកម្ពុជា ថៃ» លោក អូន ព័ន្ធមុន្នីរ័ត្ន បញ្ជាក់ ៕
ចែករំលែកព័តមាននេះ