ខេត្តឧត្តរមានជ័យ ៖ បុរសម្នាក់បានស្លា.ប់បាត់បង់ជីវិត និងម្នាក់ទៀតរងរបួស ក្នុងហេតុការណ៍គ្រោះថ្នាក់ចរាចរណ៍ក្រឡាប់រថយន្ត កាលពីវេលាម៉ោង៨យប់ ថ្ងៃទី០៤ ឧសភា ២០១៦ ។ ហេតុការណ៍នេះ បានកើតឡើងនៅចំណុចចង្កេះភ្នំដងរែក
ខេត្តឧត្តរមានជ័យ ៖ បុរសម្នាក់បានស្លាប់បាត់បង់ជីវិត និងម្នាក់ទៀតរងរបួស ក្នុងហេតុការណ៍គ្រោះថ្នាក់ចរាចរណ៍ក្រឡាប់រថយន្ត កាលពីវេលាម៉ោង៨យប់ ថ្ងៃទី០៤ ឧសភា ២០១៦ ។ ហេតុការណ៍នេះ បានកើតឡើងនៅចំណុចចង្កេះភ្នំដងរែក តាមបណ្តោយផ្លូវជាតិលេខ៦៧B ក្នុងភូមិជើងភ្នំ ឃុំត្រពាំងប្រី ស្រុកអន្លង់វែង ។
ជនរងគ្រោះឈ្មោះ ហេង ចិត្ត ភេទប្រុស អាយុ១៦ឆ្នាំ រស់នៅភូមិដូនកី ឃុំដូនកី ស្រុកពញាក្រែក ខេត្តត្បូងឃ្មុំ បានបាត់បង់ជីវិតភ្លាមៗនៅនឹងកន្លែងកើតហេតុ និងម្នាក់ទៀតឈ្មោះ រិន រិទ្ធី ភេទប្រុស អាយុ១៨ឆ្នាំ រងរបួស រស់នៅភូមិទួលគ្រួស ឃុំថ្លាត ស្រុកអន្លង់វែង ខេត្តឧត្តរមានជ័យ ជាអ្នកបើកបររថយន្ត ពាក់ស្លាកលេខសៀមរាប 2A-0625 ដឹកគ្រឿងទេស ។
សាក្សីនៅកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តកាមរីកែច្នៃ ដឹកទំនិញបើកបរចេញពីចំណុចមាត់ច្រកទ្វារអន្តរជាតិជាំសាងាំ ធ្វើដំណើរចុះពីលើកំពូលភ្នំដងរែក ពេលមកដល់ចង្កេះភ្នំ ស្រាប់តែរថយន្តនោះបង្កើនល្បឿនយ៉ាងលឿនទៅបុករនាំងថ្មចិញ្ចើមផ្លូវក្រឡាប់សង្កត់ព្រូរថយន្តម្នាក់ស្លាប់ភ្លាមៗ ។
ប៉ូលិសចរាចរណ៍ស្រុកអន្លង់វែង ឱ្យដឹងថា បន្ទាប់ពីបានទទួលព័ត៌មានករណីគ្រោះថ្នាក់ចរាចរណ៍ សមត្ថកិច្ចបានចុះទៅដល់កន្លែងកើតហេតុឃើញបុរសម្នាក់បានស្លាប់ និងម្នាក់ទៀតរងរបួសស្រាល សមត្ថកិច្ចក៏បានទូរស័ព្ទហៅរថយន្តពេទ្យបង្អែកស្រុកអន្លង់វែង ដឹកសពយកទៅដាក់វត្តអន្លង់វែង រង់ចាំឪពុកម្តាយ និងសាច់ញាតិមកទទួលយកទៅ ដោយឡែករថយន្តបង្កត្រូវបានសមត្ថកិច្ចឱ្យរថយន្តស្ទួចយកទៅរក្សាទុកនៅអធិការស្រុកអន្លង់វែង រង់ចាំធ្វើការដោះស្រាយ ។
គួររំលឹកផងដែរថា នៅកន្លែងចង្កេះភ្នំដងរែកនេះ តែងតែកើតមានឧប្បត្តិហេតុគ្រោះថ្នាក់ចរាចរណ៍ជាច្រើនលើកមកហើយ មនុស្សចាស់ក្មេង ប្រុសស្រីបានស្លាប់បាត់បង់ជីវិតអស់ជាច្រើននាក់ផងដែរ សូមអំពាវនាវដល់ពលរដ្ឋខ្មែរ រួមទាំងភ្ញៀវជាតិ និងភ្ញៀវអន្តរជាតិ ដែលធ្វើដំណើរឆ្លងកាត់ត្រូវមានការប្រុងប្រយ័ត្ន ៕
ចែករំលែកព័តមាននេះ