រាជធានីភ្នំពេញ ៖ នៅយប់ថ្ងៃអាទិត្យទី៨ ឧសភា កម្មវិធីប្រកួតប្រដាល់អន្តរជាតិដែលមានឈ្មោះថា «កំពូលជើងឯកស្រាបៀរប្លេកខេត» នឹងដល់ថ្ងៃកំណត់បើករេញឱ្យកីឡាករកម្ពុជា២រូប និងថៃ២រូបប្រកួតគ្នាជូនទស្សនិកជន
រាជធានីភ្នំពេញ ៖ នៅយប់ថ្ងៃអាទិត្យទី៨ ឧសភា កម្មវិធីប្រកួតប្រដាល់អន្តរជាតិដែលមានឈ្មោះថា «កំពូលជើងឯកស្រាបៀរប្លេកខេត» នឹងដល់ថ្ងៃកំណត់បើករេញឱ្យកីឡាករកម្ពុជា២រូប និងថៃ២រូបប្រកួតគ្នាជូនទស្សនិកជនបានទស្សនាកម្សាន្តទៀតហើយ ។ នៅក្នុងព្រឹត្តិការណ៍នោះ គេនៅមិនទាន់ដឹងថា អ្នកណានឹងឈ្នះអ្នកណានៅឡើយទេ ដោយសារតែកីឡាករថៃក៏អួតរឿងខ្លាំង ហើយកីឡាករកម្ពុជាក៏អួតថាខ្លួនមិនអន់ ។
ការប្រកួតដែលនឹងធ្វើឡើងនៅលើសង្វៀនទូរទស្សន៍អាស៊ីអាគ្នេយ៍នោះ នឹងចាប់ផ្ដើមឡើងនៅម៉ោង៨យប់តទៅ ដោយមានការរំពឹងថា នឹងមានអ្នកទស្សនាមិនខុសគ្នាពីការប្រកួតអន្តរជាតិរៀងរាល់២សប្ដាហ៍ម្ដងនោះទេ ដោយសារតែសមាសភាពដែលតម្រូវឱ្យប៉ះគ្នាគឺមានក្រេឌីតល្អ ។ កីឡាករកម្ពុជា២រូប គឺឡុង សុវណ្ណឌឿន និងគឿម សុវណ្ណនឿត នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅយប់ថ្ងៃអាទិត្យ ដែលនឹងមកដល់នៅចុងសប្ដាហ៍នេះ។ អ្នករៀបចំការប្រកួតបានអះអាងថា កីឡាករទាំង៤រូបមានបំណងប៉ះគ្នាយូរហើយមុនពេលមានការសម្រេចរៀបចំព្រឹត្តិការណ៍ប្រដាល់អន្តរជាតិរបស់ស្រាបៀរប្លេកខេត ឲ្យពួកគេប្រកួតគ្នានេះ ។ ក្នុងនោះ ភាគីកីឡាករកម្ពុជាបានទាំងសុំសាកកណ្ដាប់ដៃជាមួយកីឡាករថៃតាំងពីមុនមានការផ្គូផ្គងនោះផង ។
លោក ញាណ សុធី អ្នករៀបចំកម្មវិធីប្រកួតប្រដាល់ប្រចាំស្ថានីយទូរទស្សន៍អាស៊ីអាគ្នេយ៍បានថ្លែងថា កីឡាករឡុង សុវណ្ណឌឿន មកពីក្លិបសាលវ័ន្តកីឡា នឹងត្រូវជួបប្រកួតជាមួយកីឡាករថៃឈ្មោះ ភេច អារុណ ក្នុងនាមជាគូឯកសម្រាប់ព្រឹត្តិការណ៍ប្រដាល់អន្តរជាតិនៅយប់ថ្ងៃអាទិត្យនោះ ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកឡុង សាលវ័ន្ដ បានស្នើឱ្យកូនសិស្សរបស់ខ្លួនប៉ះប្រកួតជាមួយកីឡាករថៃរូបនេះតែម្ដង ដោយសារតែ ភេច អារុណ ជាប់ឈ្មោះជាជើងខ្លាំង ហើយពិបាកស្វែងរកកីឡាករទម្ងន់៦៩គីឡូក្រាមប៉ះជាមួយ ។ លោកថា គ្រូបង្វឹកប្រចាំក្លិបសាលវ័ន្ដកីឡា ចង់ឱ្យកូនសិស្សរបស់ខ្លួនជួបប្រកួតដើម្បីដកបទពិសោធន៍សមត្ថភាព និងចង់ឱ្យលេចធ្លោតាមរយៈការវាយបំបាក់កីឡាករថៃរូបនេះឱ្យដួលបាក់ស្បាតនៅលើសង្វៀននោះផង ។
លោកជឿជាក់ទៅលើសមត្ថភាពពូកែគេច និងពូកែវាយសន្ធាប់របស់កីឡាករកម្ពុជា ទើបទទួលយកពាក្យស្នើសុំរបស់លោកឡុង សាលវ័ន្ត ហើយដាក់ឲ្យកីឡាករដែលជាពិធីករកីឡាប្រចាំនៅទូរទស្សន៍CTN រូបនេះ ឱ្យឡើងប្រកួតជាមួយជើងខ្លាំង ភេច អារុណ ។ លោកនិយាយថា ៖«សម្រាប់គូនេះ កីឡាករថៃខ្លាំង ប៉ុន្តែមកពីខ្ញុំទុកចិត្តលើឡុង សុវណ្ណឌឿន និងបានសួរទៅកាន់លោកឡុង សាលវ័ន្ដ ថា ឡុង សុវណ្ណឌឿន ហ៊ានឡើងវៃ៉ជាមួយអត់ ហើយគាត់ឆ្លើយថាកំពុងរកមុខយូរហើយ ទើបយើងសម្រេចឱ្យប៉ះគ្នាតែម្ដងនៅយប់ថ្ងៃអាទិត្យហ្នឹងនៅក្នុងព្រឹត្តិការណ៍ប្រដាល់Black Cat»។ លោកថា កីឡាករថៃ ភេច អារុណ ធ្លាប់ប្រកួត៨៥លើក ឈ្នះ៧៤លើក និងចាញ់១១លើក ក្នុងពេលដែលកីឡាករកម្ពុជាគូនេះ ធ្លាប់ប្រកួត៨៨លើក ឈ្នះ៧៥លើក ចាញ់១០លើក និងស្មើ៣លើក ។
សម្រាប់កីឡាករ គឿម សុវណ្ណនឿត វិញ លោកញាណ សុធី បញ្ជាក់ថា ថ្វីដ្បិតតែគេនៅក្មេង និងមានស្នាដៃឡើងប្រកួតអន្តរជាតិមិនច្រើន តែគេក៏មានបច្ចេកទេស និងថ្វីដៃមិនធម្មតានោះទេ ទើបនាំឱ្យលោកសម្រេចចិត្តផ្គូផ្គងឱ្យប៉ះប្រកួតជាមួយកីឡាករជើងខ្លាំងរបស់ថៃឈ្មោះ ថៃ អ៊ូឡេក នៅក្នុងព្រឹត្តិការណ៍ប្រដាល់អន្តរជាតិរបស់ស្រាបៀរBlack Cat នៅយប់ថ្ងៃអាទិត្យនោះដែរ ។ លោកថា ការប្រកួតរបស់គូនេះ នៅមិនទាន់ដឹងថាអ្នកណាល្អជាងអ្នកណានោះទេ ប៉ុន្តែការប្រកួតទាំងមូលទំនងជានឹងស្វិតស្វាញ ដោយសារតែកីឡាករកម្ពុជាក៏ត្រូវការឈ្នះ ហើយកីឡាករថៃក៏ជាជើងខ្លាំងដែលមិនងាយទៅរួច ។ លោកថា កីឡាករថៃធ្លាប់ប្រកួត៥១លើក ឈ្នះ៤០លើក ចាញ់១០លើក និងស្មើ១លើក រីឯកីឡាករកម្ពុជាធ្លាប់ប្រកួត៤៥លើក ឈ្នះ៣៥លើក ចាញ់៨លើក និងស្មើ២លើក។
នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនទូរទស្សន៍អាស៊ីអាគ្នេយ៍ថ្ងៃអាទិត្យនោះក៏មានការប្រកួតអន្តរជាតិ២គូផងដែរ ដូចជា កីឡាករកម្ពុជា សេក ចាន់រាជ្យ ធ្លាប់ប្រកួត៤៩លើក ឈ្នះ៤១លើក ចាញ់៥លើក ស្មើ៣លើក ប៉ះគ្នាជាមួយកីឡាករថៃឈ្មោះ កាំឡៃ យោគ ដែលធ្លាប់ប្រកួត៧១លើក ឈ្នះ៥៨លើក ចាញ់១៣លើក និងមួយគូទៀតគឺកីឡាករ សារឿន ច័ន្ទ ធ្លាប់ប្រកួត៨០លើក ឈ្នះ៦៨លើក ចាញ់១១លើក និងស្មើ១លើក ឡើងប្រកួតជាមួយកីឡាករថៃឈ្មោះ ប្រាវីត ដែលធ្លាប់ប្រកួត៩២លើក ឈ្នះ៧៩លើក ចាញ់១១លើក និងស្មើ២លើក ៕
ចែករំលែកព័តមាននេះ