រាជធានីភ្នំពេញ ៖ មីក្រូហិរញ្ញវត្ថុ ជាវិស័យមួយជួយជំរុញកំណើនសេដ្ឋកិច្ចជាតិ និងជួយកាត់បន្ថយភាពក្រីក្រ តាមរយៈការផ្ដល់កម្ចី បញ្ញើ និងសេវាកម្មផ្សេងៗទៀត ដែលផ្ដោតសំខាន់ទៅលើកសិករក្នុងការផ្ដល់កម្ចីសម្រាប់របរកសិកម្ម
រាជធានីភ្នំពេញ ៖ មីក្រូហិរញ្ញវត្ថុ ជាវិស័យមួយជួយជំរុញកំណើនសេដ្ឋកិច្ចជាតិ និងជួយកាត់បន្ថយភាពក្រីក្រ តាមរយៈការផ្ដល់កម្ចី បញ្ញើ និងសេវាកម្មផ្សេងៗទៀត ដែលផ្ដោតសំខាន់ទៅលើកសិករក្នុងការផ្ដល់កម្ចីសម្រាប់របរកសិកម្ម ការចិញ្ចឹមសត្វ និងការដាំដុះដំណាំផ្សេងៗ ។ ក្រៅពីនោះ មីក្រូហិរញ្ញវត្ថុក៏ផ្ដល់កម្ចីសម្រាប់ម្ចាស់អាជីវកម្មខ្នាតតូចៗមួយចំនួនផងដែរ ។ វិស័យមួយនេះបាននិងកំពុងរីកចម្រើនគួឲ្យកត់សម្គាល ដែលអាចឆ្លុះបញ្ចាំងតាមរយៈវត្តមាននៃគ្រឹះស្ថានមីក្រូហិរញ្ញវត្ថុថ្មីៗ និងការពង្រីកបណ្តាញប្រតិបត្តិការគ្របដណ្តប់នៅទូទាំងប្រទេស ។
គិតមកដល់ចុងត្រីមាសទី១ ឆ្នាំ២០១៦នេះ ទំហំនៃការផ្តល់ឥណទាននៅក្នុងវិស័យមីក្រូហិរញ្ញវត្ថុ មានទឹកប្រាក់ប្រមាណ៣ប៊ីលានដុល្លារ បើធៀបនឹងរយៈពេលដូចគ្នាកាលពីឆ្នាំ២០១៥ កើនឡើងប្រមាណ៨% ហើយភាគច្រើន គឺផ្តល់ឥណទានខាងវិស័យពាណិជ្ជកម្ម និង SMEs » ។ នេះបើតាមប្រធានសមាគមគ្រឹះស្ថានមីក្រូហិរញ្ញវត្ថុកម្ពុជា ។
លោកឧកញ៉ា ហួត អៀងតុង ប្រធានសមាគមគ្រឹះស្ថានមីក្រូហិរញ្ញវត្ថុកម្ពុជា និងជាប្រធានអគ្គនាយកគ្រឹះសា្ថនមីក្រូហិរញ្ញវត្ថុហត្ថាកសិករ លីមីធីត បានមានប្រសាសន៍ថា ៖ «ការទទួលបាននូវកំណើនប្រមាណ៨%នេះ ខ្ញុំមើលឃើញថា ដោយសារតែម៉ាក្រូសេដ្ឋកិច្ចរបស់ប្រទេសកម្ពុជានៅតែមានកំណើនល្អ ហើយការរកស៊ីទទួលទានរបស់ប្រជាពលរដ្ឋនៅតែល្អធម្មតា។ ម្យ៉ាងទៀត ស្ថានភាពនយោបាយកម្ពុជានៅតែមានស្ថិរភាពល្អដែលអនុញ្ញាតឲ្យប្រជាពលរដ្ឋ និងអ្នកវិនិយោគផ្សេងៗប្រកបមុខរបរទទួលទានបានងាយស្រួល » ។
ទាក់ទងនឹងដំណើររបស់វិស័យមីក្រូហិរញ្ញវត្ថុកម្ពុជានាបច្ចុប្បន្ននេះ លោកប្រធានសមាគមគ្រឹះស្ថានមីក្រូហិរញ្ញវត្ថុកម្ពុជា បានឱ្យដឹងថា ហាក់ដូចជាមានភាពប្រសើរឡើង ដោយសារតែគ្រប់ដៃគូទាំងអស់មានការពង្រឹងគុណភាព និងសេវាកម្មរបស់ខ្លួនបានល្អ ។
លោកមានប្រសាសន៍យ៉ាងដូច្នេះថា ៖ « យើងដូចជាមើលមិនឃើញនូវហានិភ័យអ្វីធ្ងន់ធ្ងរទេ ទោះបីការប្រកួតប្រជែងកាន់តែច្រើនក្តី ប៉ុន្តែការប្រកួតប្រជែងកើតមាន វាមិនមែនជារឿងហានិភ័យទៅដល់វិស័យនេះទេ ។ ការប្រកួតប្រជែងកើតឡើង រឹតតែធ្វើឲ្យវិស័យមីក្រូហិរញ្ញវត្ថុកាន់តែល្អប្រសើរឡើង ពីព្រោះគ្រប់គ្រឹះស្ថានទាំងអស់ គាត់នឹងពង្រឹងគុណភាពសេវាកម្ម និងខិតខំថែរក្សាអតិថិជនរបស់គាត់ ហើយការប្រកួតប្រជែងគ្នានេះ គឺវាជារឿងល្អសម្រាប់អ្នកប្រើប្រាស់សេវាកម្ម » ។
លោកឧកញ៉ាបន្ថែមទៀតថា ៖ « ដោយសារតែការប្រកួតប្រជែងនេះកាន់តែខ្លាំងឡើងៗ អុីចឹងហើយយើងឃើញថា អត្រាការប្រាក់មានភាពល្អមែនទែន ។ ខ្ញុំយល់ឃើញថា អត្រាការប្រាក់បានថយចុះរហូតដល់ខ្ទង់១,១% ឬ១,២%ក្នុងមួយខែ ហើយវិស័យមីក្រូហិរញ្ញវត្ថុរបស់យើងកាន់តែមានការវិវត្តល្អ ។ ដោយឡែក ការផ្តល់ឥណទានរបស់គ្រឹះស្ថានមីក្រូហិរញ្ញវត្ថុនៅក្នុងត្រីមាសទី២ខាងមុខនេះ ខ្ញុំគិតថា វានឹងនៅតែកើនឡើងបន្តទៀត ដោយសារតែកត្តាសន្តិភាពរបស់ប្រទេសកម្ពុជាយើងល្អ ហើយឱកាសនៃការធ្វើអាជីវកម្មនៅតែល្អដដែល » ។
យោងតាមរបាយការណ៍ប្រចាំឆ្នាំរបស់ធនាគារជាតិនៃកម្ពុជា គិត្រឹមថ្ងៃទី៣១ ធ្នូ ឆ្នាំ២០១៥ បង្ហាញថា គ្រឹះស្ថានមីក្រូហិរញ្ញវត្ថុនៅកម្ពុជា ក្នុងឆ្នាំ២០១៥កន្លងទៅ មានចំនួនសរុប៥៨ ក្នុងនោះគ្រឹះស្ថានមីក្រូហិរញ្ញវត្ថុចំនួន៨ មានសិទ្ធិទទួលប្រាក់បញ្ញើពីអតិថិជន ។ ធនាគារពាណិជ្ជមានចំនួន៣៦, ធនាគារឯកទេសមាន១២ និងការិយាល័យតំណាងចំនួន៨ ។ ដោយឡែកក្រុមហ៊ុនភតិសន្យាហិរញ្ញវត្ថុមានចំនួន៩ ។ រីឯអង្គការ និងសមាគមមិនមែនរដ្ឋាភិបាលដែលជាប្រតិបត្តិករឥណទានមានចំនួន១០៩ ៕
ចែករំលែកព័តមាននេះ