រាជធានីភ្នំពេញ ៖ ថ្ងៃស្អែក កីឡាករកីឡាការិនីចំបាប់់កម្ពុជា២រូប បានទៅដល់ប្រទេសតួកគីហើយ ដើម្បីត្រៀមខ្លួនប្រកួតជម្រុះដណ្ដើមយកបេក្ខភាពទៅកាន់ព្រឹត្តិការណ៍អូឡាំពិកដូចគ្នានឹងកីឡាការិនី ស៊ន សៀវម៉ី ដែលទើបទទួលបានឱកាស ។ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានអះអាងថា លោកកំពុងរង់ចាំអ៊ុតមើលលទ្ធផលរបស់បេក្ខភាពទាំងពីរ ដើម្បីឲ្យច្បាស់ថា តើនៅក្នុងព្រឹត្តិការណ៍អូឡាំពិកឆ្នាំនេះ បេក្ខភាពនឹងមានសមាជិកត្រូវទៅប៉ុន្មាននាក់ បូករួមទាំងបេក្ខភាពក្នុងសិទ្ធិអនុគ្រោះផងនោះ ។
កាលពីយប់ថ្ងៃទី៣ ឧសភា មុននេះ កីឡាករ កីឡាការិនី២រូបគឺកញ្ញា ចូវ សុធារ៉ា និងលោក ងួន មករា បានធ្វើដំណើរទៅកាន់ប្រទេសតួកគីដើម្បីចូលរួមពិធីប្រកួតជម្រុះលើវិញ្ញាសាចំបាប់សម្រាប់ដណ្ដើមកៅអីទៅកាន់ព្រឹត្តិការណ៍អូឡាំពិក ដែលនឹងធ្វើនៅខែកញ្ញា ក្នុងឆ្នាំ២០១៦នេះ។ អ្នកទាំងពីរនឹងត្រូវប្រកួតជាមួយកីឡាករ-កីឡាការិនីមកពីប្រទេសអាស៊ី អាមេរិក ឬអឺរ៉ុប តែមិនទាន់ដឹងថាប្រទេសណាខ្លះនៅឡើយ ។ យ៉ាងណាក៏ដោយ មានការរំពឹងភាគច្រើនថាចូវ សុធារ៉ា ឬងួន មករា នឹងអាចមានសង្ឃឹមខ្ពស់ ប្រសិនបើគូប្រកួតដែលពួកគេជួបមិនមែនជាកីឡាករ-កីឡាការិនីលំដាប់ពិភពលោក ដែលអាចបំបាក់ក្ដីសង្ឃឹមរបស់ពួកគេ ។ នៅលើហ្វេសប៊ុករបស់កីឡាការិនី ចូវ សុធារ៉ា បានបង្ហាញពីការតាំងចិត្តថា នាងនឹងប្រឹងប្រែងឲ្យអស់ពីលទ្ធភាពជាមួយនឹងការខំប្រឹងហ្វឹកហាត់ដើម្បីត្រៀមខ្លួន ។
មិនខុសគ្នាដែរកីឡាករ ងួន មករា ក៏បានបង្ហាញពីការខំប្រឹងហ្វឹកហាត់ដូចគ្នាផងដែរ ដើម្បីដណ្ដើមឱកាសចេញទៅប្រកួតនៅក្នុងព្រឹត្តិការណ៍អូឡាំពិក ។ យ៉ាងណាក៏ដោយនៅមិនទាន់ប្រាកដថា ការប្រឹងប្រែងរបស់ពួកគេទទួលបានលទ្ធផលកម្រិតណានោះទេ ដោយសារតែបេក្ខភាពដែលត្រូវប្រកួតជម្រុះនៅក្នុងប្រទេសតួកគី មិនមែនជាកីឡាករ-កីឡាការិនីធម្មតា ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានអះអាងថា សម្រាប់អូឡាំពិកនៅក្នុងប្រទេសប្រេស៊ីលឆ្នាំនេះ កម្ពុជាទទួលបានបេក្ខភាពចំនួន៥នាក់ដោយស្វ័យប្រវត្តិរួចហើយ សម្រាប់ឱកាសចេញប្រកួត ដោយលោកកំពុងចាំអ៊ុតលទ្ធផលពីការប្រកួតចំបាប់របស់ចូវ សុធារ៉ា និង ងួន មករា មួយតង់ទៀត ដើម្បីប្រាកដថា កម្ពុជាបានបន្ថែមបេក្ខភាពឬក៏អត់ ។ លោកថា បេក្ខភាពដែលបានទទួលសិទ្ធិចេញទៅប្រកួតទាំងនោះរួមមាន បេក្ខភាពមកពីកីឡាហែលទឹក២រូប មកពីកីឡារត់ប្រណាំង២រូប និង១រូបទៀតគឺ ស៊ន សៀវម៉ី ដែលទើបដណ្ដើមបានបេក្ខភាពដោយពេញសិទ្ធិ ។ លោកថា បេក្ខភាព៤រូបទៀតបានទៅអូឡាំពិករាល់៤ឆ្នាំម្ដង គឺដោយសារតែសិទ្ធិអនុគ្រោះប៉ុណ្ណោះ ដែលនេះគឺលក្ខខណ្ឌរបស់អូឡាំពិកចំពោះប្រទេសជាសមាជិកដែលទាមទារឲ្យមានវិញ្ញាសាកីឡាចំនួន២ចូលរួមដោយស្វ័យប្រវត្តិ ដែលកម្ពុជាបានជ្រើសយកកីឡាហែលទឹក និងរត់ប្រណាំង ។
លោកថា លោកកំពុងចាំអ៊ុតពីលទ្ធផលរបស់ចូវ សុធារ៉ា និងងួន មករា ដើម្បីឲ្យប្រាកដថា តើកម្ពុជានឹងកើនបេក្ខភាព ឬនៅរក្សាតែ៥នាក់សម្រាប់ព្រឹត្តិការណ៍អូឡាំពិក នៅប្រេស៊ីលខាងមុខ ។ លោកនិយាយថា៖ «ទៅអូឡាំពិកហ្នឹងយើងបានទាំង៥នាក់ហើយសម្រាប់៣វិញ្ញាសាដែលកម្ពុជាទទួលបាន ដោយរាប់ទាំងសិទ្ធិអនុគ្រោះផង ប៉ុន្តែបើ២នាក់ដែលទៅប្រកួតជម្រុះចំបាប់នៅតួកគីហ្នឹង បើជោគជ័យយើងចំណេញមួយវិញ្ញាសាទៀតសម្រាប់អូឡាំពិកក្នុងខែសីហាហ្នឹង!»។ លោកថា បេក្ខភាពចូវ សុធារ៉ា និងងួន មករា សុទ្ធតែជាបេក្ខភាពនាំមុខគេផ្នែកចំបាប់នៅក្នុងប្រទេសកម្ពុជា ដូច្នេះបើអ្នកទាំងពីរមិនអាចទទួលបានផ្លែផ្កាណាមួយ គឺមានន័យថាវិញ្ញាសាចំបាប់របស់កម្ពុជាមិនអាចទៅរួចនោះឡើយ ។ យ៉ាងណាមិញ លោករំពឹងថា បើសំណាងកម្ពុជានឹងបានចំណេញកីឡាករ ឬកីឡាការិនីពីការប្រកួតជម្រុះនេះ ដ្បិតបើបេក្ខភាពកម្ពុជាប្រកួតបានល្អ ខាងអូឡាំពិកក៏អាចនឹងផ្ដល់សិទ្ធិអនុគ្រោះឲ្យចូលប្រកួតផងដែរ ប្រសិនបើចូវ សុធារ៉ា និងងួន មករា មិនទទួលបានកៅអីទៅប្រកួតដោយស្វ័យប្រវត្តិ ។
ការប្រកួតជម្រុះនៅក្នុងប្រទេសតួកគីនេះ ចូវ សុធារ៉ា នឹងប្រកួតក្នុងប្រភេទទម្ងន់៥៣គីឡូក្រាម និងងួន មករា ប្រកួតក្នុងប្រភេទទម្ងន់៧៤គីឡូក្រាម ហើយអ្នកទាំងពីរគឺជាជើងខ្លាំងដែលធ្លាប់ដណ្ដើមបានមេដាយជូនជាតិនៅលើឆាកអន្តរជាតិច្រើនលើករួចមកហើយ ៕
ចែករំលែកព័តមាននេះ