ធាតុរបស់កវីគង្គ ប៊ុនឈឿន នឹងយកមកដល់ប្រទេសវិញនៅថ្ងៃទី២១ ឧសភា ឆ្នាំ២០១៦ ខាងមុខនេះ ។ បើតាមគម្រោងរបស់ក្រុមគ្រួសាររបស់លោក នឹងធ្វើការតម្កល់ទុកនៅគេហដ្ឋានរបស់លោកមុត ថារី នៅភ្នំពេញថ្មី រហូតដល់គម្រប់១០០ថ្ងៃ ដើម្បីផ្តល់ឱកាសដល់សាច់ញាតិ និងមហាជន ដែលមានបំណងមកអុជធូប ។
ចំណែករឿងដង្ហែធាតុរបស់លោកទៅកាន់ស្ទឹងសង្កែខេត្តបាត់ដំបងនោះ ត្រូវបានក្រុមគ្រួសារបញ្ជាក់ថា នៅមិនទាន់កំណត់ពេលវេលាច្បាស់លាស់នៅឡើយទេ ។ គួររំលឹកថា កវីម្ចាស់ស្ទឹងសង្កែ លោកព្រឹទ្ធាចារ្យគង្គ ប៊ុនឈឿន បន្ទាប់ពីលាចាកលោកបន្សល់បណ្តាំផ្ញើដល់យុវជនខ្មែរឱ្យរក្សាវប្បធម៌ ប្រពៃណីជាតិរបស់ខ្លួន ។
វីដេអូឃ្លីបបង្ហោះតាមហ្វេសប៊ុកកាលពីពេល ថ្មីៗនេះលោកគង្គ ប៊ុនឈឿនបញ្ជាក់ថា «សរុបមកក្នុងនាមកវីម្ចាស់ស្ទឹងសង្កែ ខ្ញុំក៏ឃើញថា ជីវិតរបស់ខ្ញុំហាក់ដូចជាមានន័យខ្លះដែរហើយមុននឹងលាចាកលោកនេះទៅ ។ ព្រោះអីខ្ញុំគ្មានអីជាគួរឲ្យសោកស្តាយនោះទេ ដោយគ្មាន មរតកគ្មាន អ្វីៗដែលជាកម្មសិទ្ធិដែលគួរឲ្យសោកស្តាយ អត់មានទេ តែសំខាន់អ្វីដែលខ្ញុំសោកស្តាយត្រង់ថា បើសិនណាពេលវេលាអាចឲ្យខ្ញុំនៅយូរតទៅខ្ញុំនឹងធ្វើស្នាដៃពីនេះ ពីនោះដើម្បីបំរើជាតិខាងវប្បធម៌ ស្តាយតែប៉ុណ្ណឹងទេ ។
ទោះបីជាខ្ញុំបាត់បង់ជីវិតទៅក្តីខ្ញុំផ្តាំផ្ញើដល់យុវជន យុវនារីខ្មែរទាំងអស់ត្រូវតែស្រឡាញ់អត្តសញ្ញាណជាតិខ្មែរ ទោះបីទៅដល់ទីណាក៏ដោយ ថែព្រលឹងជាតិរបស់យើង។ អ្នកនៅទីណាក៏ដោយត្រូវតែចេះស្រឡាញ់គ្នា សាមគ្គីភាពគ្នា ។
សូមកុំភ្លេចថាត្រូវរួបរួមសាមគ្គីគ្នា បានប្រទេសយើង ជនជាតិយើងរស់បានរុងរឿង ។ ផ្ទុយទៅវិញបើកាលណាមានការបែកបាក់គ្នា ទោះបីជាខិតខំយ៉ាងណាក៏ទៅមិនរួចដែរ។ អាហ្នឹងដែលជាប្រវត្តិរបស់ជាតិយើង តាំងពីដើមមកហើយ ប៉ុន្តែនៅពេលណាយើងរួបរួមគ្នាជាធ្លុងមួយនោះ ប្រទេសយើងនឹងរុងរឿងរីកចម្រើន តែនៅពេលណា មានការបែកបាក់ទៅឆ្វេង ទៅស្តាំ នោះនឹងហិនហោចហើយ អាហ្នឹងត្រូវតែចាំ ។
ក្នុងប្រវត្តិសាស្ត្រខ្មែរ បានចែងយ៉ាងច្បាស់លាស់ណាស់ ។ សម្រាប់យុវជនយុវនារីដែលស្រឡាញ់មាតុភូមិ អក្សរសាស្ត្រ ត្រូវខំប្រឹងធ្វើយ៉ាងណាកុំឲ្យភ្លេចខ្លួនឲ្យសោះក្នុងការចងចាំអត្តសញ្ញាណជាតិយើងទោះបីបានធ្វើអ្វីក៏ដោយ ។
ខ្ញុំវាស្តាយដែលមិនបានរស់នៅជួយ ដោយសារមានតម្រិះបន្តិចបន្តូចបន្តទៅទៀត ប៉ុន្តែខ្ញុំសុំផ្តាំថា ធ្វើអ្វីត្រូវស្ថិតក្នុងស្មារតីជាខ្មែរ ស្រឡាញ់ខ្មែរ និងរួបរួមគ្នា» ។
លោកគង្គ ប៊ុនឈឿន ដែលជាកវីជើងចាស់មានរហស្សនាម «កវីម្ចាស់ស្ទឹងសង្កែ» បានទទួលមរណភាព ដោយរោគាពាធ កាលពីថ្ងៃអាទិត្យទី១៧ មេសា ២០១៦ នៅមន្ទីរពេទ្យនៃប្រទេសន័រវ៉េស ។ លោកជាអ្នកនិពន្ធឆ្នើមដែលបានកសាងស្នាដៃផ្នែកនិពន្ធច្រើនទាំងផ្នែក ប្រលោមលោក បទចម្រៀង និងភាពយន្ត ។
លោកគង្គ ប៊ុនឈឿន បានចាកចេញពីកម្ពុជា ទៅរស់នៅប្រទេសន័រវ៉េស អស់រយៈពេលជាច្រើនឆ្នាំមកហើយ ។ លោកកើតនៅ
ថ្ងៃទី១៨ ខែតុលា ឆ្នាំ១៩៣៩ នៅភូមិចម្ការសំរោង ឃុំចម្ការសំរោង ស្រុកបាត់ដំបង ខេត្តបាត់ដំបង ។ ឪពុករបស់លោកគង្គ ប៊ុនឈឿន ឈ្មោះគង់ ឈិន មានស្រុកកំណើតនៅខេត្តតាកែវ និងម្តាយឈ្មោះម៉រ ភឹង មានស្រុកកំណើតនៅខេត្តបាត់ដំបង ៕
ចែករំលែកព័តមាននេះ