រាជធានីភ្នំពេញ ៖ អាចចាត់ទុកជាការចាប់ផ្តើមដំបូងសម្រាប់ឆ្នាំ២០១៦ នៃការចេញដំណើរលើការងារចុះធ្វើអធិការកិច្ចរបស់ក្រសួងមហាផ្ទៃគឺនៅរាជធានីភ្នំពេញ មុនខេត្តក្រុងនានានៅទូទាំងប្រទេសក្នុងរយៈពេល១សប្តាហ៍ បំណងជួយពង្រឹងប្រសិទ្ធិភាពការងារ ហើយក៏ជាការស្វែងរកមន្ត្រីណាដែលខិលខូច បង្កភាពអសកម្ម និងរាំងស្ទះដល់ការងារអភិវឌ្ឍន៍របស់រដ្ឋបាលរាជធានីភ្នំពេញ ។
ក្នុងកិច្ចប្រជុំការងារអធិការកិច្ច និងរដ្ឋបាលរវាងក្រសួងមហាផ្ទៃ និងរដ្ឋបាលសាលារាជធានីភ្នំពេញ នៅសាលារាជធានីភ្នំពេញ កាលពីថ្ងៃទី០៣ មីនា ២០១៦ កន្លងមកនេះ លោកកុល វីរក្ស អនុរដ្ឋលេខាធិការក្រសួងមហាផ្ទៃបានលើកឡើងថា ការចុះធ្វើអធិការកិច្ចនេះ សូមកុំឱ្យមានការយល់ថា ក្រុមអធិការកិច្ចពីក្រសួងមហាផ្ទៃ ចុះទៅឆ្គឹះឆ្គៀលការងាររបស់អស់លោក ។
ផ្ទុយទៅវិញ ការចុះនេះ ដើម្បីសហការជាមួយក្រុមប្រតិបត្តិថ្នាក់ក្រោមជាតិ ក្នុងពេលកំពុងជិះលើទូកនៃរដ្ឋបាលឯកភាពតែមួយ បំពេញការងារ បម្រើគោលនយោបាយរបស់រាជរដ្ឋាភិបាល បម្រើឱ្យការអភិវឌ្ឍន៏ និងបម្រើសេវាជូនប្រជាពលរដ្ឋឲ្យកាន់តែមានប្រសិទ្ធិភាព ។
លោកបន្តថា គោលដៅនៃការងារអធិការកិច្ច គឺជួយបំពេញបន្ថែមឋាមពលដែលនៅខ្វះខាត និងការងារនៅសេសសល់ក្នុងនោះមានការងារបំរើសេវាសាធារណៈ សេវារដ្ឋបាល សំណូមពររបស់ពលរដ្ឋឲ្យកាន់តែប្រសើរឡើង,មានប្រសិទ្ធភាព និងស្របតាមច្បាប់ ស្វែងយល់ពីបញ្ហាប្រឈមនឹងរកឲ្យឃើញភាពអសកម្មរបស់មន្ត្រីដែលធ្វើឲ្យស្ទះដល់ដំណើរការអភិវឌ្ឍន៏ និងប៉ះពាល់ដល់គោលនយោបាយរបស់រាជរដ្ឋាភិបាល ។
លោកកុល វីរក្ស បានឱ្យដឹងទៀតថា ជាមួយគ្នានេះ ត្រូវរកឱ្យឃើញកំហុស ដែលមន្ត្រីប្រព្រឹត្តខុសម្តងហើយម្តងទៀត ខុសមិនព្រមកែ និងខុសដោយអចេតនា ត្រូតពិនិត្យការងារពាក់ពន្ធ័នឹងចរាចររដ្ឋបាល, លិខិតស្នាមឯកសារផ្សេងៗ បើធ្វើមិនបានម៉ត់ចត់ទេ វានឹងក្លាយជាការបែកបាក់ផ្ទៃក្នុង និងប៉ះពាល់ដល់គោលនយោបាយរបស់រាជរដ្ឋាភិបាល ត្រូវកំណត់ឱ្យបានច្បាស់ការងារណាត្រូវធ្វើមុន ការងារណាត្រូវធ្វើបន្ទាប់ ទោះបីមន្ត្រីនោះមកពីបក្សនយោបាយណាក៏ដោយ ក៏ស្ថិតនៅក្នុងរដ្ឋបាលឯកភាពតែមួយ ។
លោកកុល វីរក្ស បានសំណូមពរដល់អាជ្ញាធររាជធានីភ្នំពេញ, ខណ្ឌ, សង្កាត់ និងផ្នែកពាក់ពន្ធ័ទាំងអស់ សុំផ្តល់កិច្ចសហការជាមួយមន្ត្រីអធិការកិច្ចដែលចុះអនុវត្តភារកិច្ចក្នុងរាជធានីភ្នំពេញឲ្យទទួលបានលទ្ធផលល្អផង ។
ចែករំលែកព័តមាននេះ