ខេត្តត្បូងឃ្មុំ ៖ ដោយមានការចង្អុលបង្ហាញពីសំណាក់លោកឧត្តមសេនីយ៍ត្រី ម៉ៅ ពៅ ស្នងការនគរបាលខេត្ត និងលោកព្រះរាជអាជ្ញាអមសាលាដំបូងខេត្តនោះ កម្លាំងនគរបាលជាច្រើននាក់បានបើកប្រតិបត្តិការបង្ក្រាបគ្រឿងញៀន ដោយធ្វើឡើងកាលពីវេលាម៉ោង០៤ និង៥០នាទីរសៀលថ្ងៃទី៣ ឧសភា ២០១៦ ស្ថិតត្រង់ចំណុចភូមិទ្រាទី៤ ឃុំទ្រា ស្រុកក្រូចឆ្មារ ដោយឃាត់បានជនសង្ស័យ៣នាក់ និងថ្នាំញៀន៥កញ្ចប់, ជញ្ជីងអេឡិចត្រូនិក១គ្រឿង តែមេខ្លោងជួញដូរថ្នាំញៀនដ៏សកម្មនោះបានរត់គេចខ្លួនបាត់ ។
តាមរបាយការណ៍របស់លោកអនុសេនីយ៍ឯក វ៉ា សម្បត្តិ អធិការរងនគរបាលស្រុកក្រូចឆ្មារឱ្យដឹងថា តំបូងនៅវេលាម៉ោង៣រសៀលថ្ងៃដដែល លោកវរសេនីយ៏ទោ សាំ ហេង អធិការនគរបាលស្រុកក្រូចឆ្មារ បានប្រើប្រាស់កម្លាំងមូលដ្ឋានឱ្យទៅទិញថ្នាំញៀននៅផ្ទះឈ្មោះគ្រី ម៉ាហៀត ហៅទិត្យ ភេទប្រុស អាយុ២១ឆ្នាំ ជាខ្មែរអ៊ិស្លាម រស់នៅភូមិទ្រាទី៤ ខាងលើចំនួន៤០ម៉ឺនរៀល និង១០០ដុល្លារ ហើយសមត្ថកិច្ចបានរង់ចាំឃ្លាំមើលពីចម្ងាយ ។ របាយការណ៍ដដែលបន្តថា ក្នុងពេលដែលប្រគល់លុយ និងថ្នាំហើយនោះ សមត្ថកិច្ចបានសំរុកចូល ដើម្បីចាប់ជននេះ គ្រាន់តែឃើញកម្លាំងនគរបាលមេក្លោងជួញដូរគ្រឿងញៀនសកម្មនោះបានរត់គេច ចូលទៅព្រៃឫស្សីដែលដុះទ្រុបទ្រុល គេចខ្លួនបាត់ដោយតាមរកមិនឃើញ ។
បន្ទាប់មកទៀត លោកអធិការនគរបាលស្រុកក្រូចឆ្មារ បានសុំគោលការណ៍ពីលោកស្នងការនគរបាលខេត្ត និងលោកព្រះរាជអាជ្ញាអមសាលាដំបូងខេត្ត ដើម្បីឆែកឆេរលំនៅឋាន គឺសមត្ថកិច្ចបានប្រើប្រាស់កម្លាំងច្រើនហ៊ុមព័ទ្ធ ដោយមានការប្រុងប្រយ័ត្ន ព្រមទាំងបានឃាត់មនុស្ស៣នាក់ ក្នុងនោះ១-ឈ្មោះសុខ អាំណៈ ភេទស្រី អាយុ៥៣ឆ្នាំ ត្រូវជាម្តាយរបស់ឈ្មោះទិត្យ ២-ឈ្មោះគ្រី ណូរីយៈ ភេទស្រី អាយុ១៩ឆ្នាំ ៣-ឈ្មោះម៉ាត់ រំលី ភេទប្រុស អាយុ២៣ឆ្នាំ ដោយបានដកហូតថ្នាំញៀន សរុបទាំងអស់៥កញ្ចប់។
ចែករំលែកព័តមាននេះ