ខេត្តសៀមរាប ៖ ស្របពេលដែលអនុប្រធានទី១នៃរដ្ឋសភា លោកងួន ញ៉ិល គ្រោងនឹងចាត់វិធានការទប់ស្កាត់ការបំផ្លិចបំផ្លាញព្រៃឈើនៅតំបន់ព្រៃឡង់ដែលមានព្រំប្រទល់ជាប់ខេត្ដចំនួន៤ គឺខេត្ដក្រចេះ ព្រះវិហារ ស្ទឹងត្រែង និងខេត្ដកំពង់ធំ ពីសំណាក់ក្រុមហ៊ុនដីសម្បទាន បែរជាមានសេចក្ដីរាយការណ៍មកថា មានក្បួនរថយន្ដធំៗលំដាប់យក្សចំនួន៩គ្រឿងបានធ្វើសកម្មភាពដឹកឈើចេញពីខេត្ដក្រចេះឆ្លងកាត់ចម្ងាយផ្លូវដ៏សែនវែងអន្លាយ ទៅលក់នៅខេត្ដ បន្ទាយមានជ័យ ។ ប៉ុន្ដែសមត្ថកិច្ចជំនាញបានអះអាងថា ជាឈើរបស់ក្រុមហ៊ុនមួយឈ្មោះ«កម្ពុជា-វៀតណាម» ដែលមានមូលដ្ឋាននៅខេត្ដក្រចេះ និងមានច្បាប់ដឹកជញ្ជូនពីរដ្ឋបាលព្រៃឈើត្រឹមត្រូវ។
សេចក្ដីរាយការណ៍បានឱ្យដឹងថា ព័ត៌មានអំពីការដឹកជញ្ជូនឈើមានលក្ខណៈទ្រង់ទ្រាយធំនោះត្រូវបានលេចធ្លាយកាលពីព្រឹកថ្ងៃទី១ មីនា នៅពេលដែលក្បួនរថយន្ដធុនធំលំដាប់យក្សយីឌុបគ្របកៅស៊ូតង់ជិតៗចំនួន៥គ្រឿងក្នុងចំណោម៩គ្រឿងត្រូវបានសមត្ថកិច្ចចំរុះរួមមានរដ្ឋបាលព្រៃឈើសៀមរាប និងប៉ូលិសប្រឆាំង បទល្មើសសេដ្ឋកិច្ចខេត្ដ-ក្រសួងធ្វើការស្ទាក់ត្រួតពិនិត្យរកលិខិតស្នាមនៅលើផ្លូវក្រវាត់ក្រុងសៀមរាប ។ មន្ដ្រីរដ្ឋបាលព្រៃឈើសៀមរាបមួយរូបដែលសុំមិនឱ្យបញ្ចេញឈ្មោះបាននិយាយថាឈើដែលដឹកតាមក្បួនរថយន្ដធុនធំទាំង៩គ្រឿង នោះជាឈើរបស់ក្រុមហ៊ុនឈ្មោះ «កម្ពុជា-វៀតណាម» មានមូលដ្ឋាននៅខេត្ដក្រចេះ និងមានលិខិតដឹកជញ្ជូនពីរដ្ឋបាលព្រៃឈើ គឺក្នុងរថយន្ដមួយគ្រឿងៗដឹកចាប់ពីជាង២០ទៅជិត៣០ម៉ែត្រគូប ។ បើសរុបទៅឃើញថាឈើទាំងអស់មានចំនួនជាង២០០ម៉ែត្រគូប។
មន្ដ្រីរដ្ឋបាលព្រៃឈើដដែលបានឱ្យដឹងទៀតថា ឈើដែលដឹកតាមរថយន្ដយក្សទាំងនោះជាប្រភេទឈើលេខ២ លេខ៣ និងឈើក្រៅលំដាប់ថ្នាក់ដោយមានការចុះហត្ថលេខាទទួលស្គាល់លើលិខិតដឹកជញ្ជូនដោយលោកនាយផ្នែករដ្ឋបាលព្រៃឈើឆ្លូង ខេត្ដក្រចេះ គឺជាឈើមានប្រភពចេញពីដីសម្បទានសេដ្ឋកិច្ចរបស់ក្រុមហ៊ុន «កម្ពុជា-វៀតណាម» ដែលរដ្ឋាភិបាលផ្ដល់សិទ្ធិឱ្យដាំដើមកៅស៊ូ ។
គួរកត់សំគាល់ផងដែរថា កន្លងមកមានក្រុមហ៊ុនវិយោគមួយចំនួនបានទទួលដីសម្បទានសេដ្ឋកិច្ចពីរដ្ឋាភិបាលដើម្បីធ្វើការដាំដំណាំកសិឧស្សាហកម្ម «កៅស៊ូ» ។ ក៏ប៉ុន្ដែនៅក្នុងចំណោមក្រុមហ៊ុនទាំងនោះមានក្រុមហ៊ុនខ្លះ មិនបានអនុវត្ដទៅតាមផែនការមេដែលបានធ្វើកិច្ចសន្យាជាមួយក្រសួងកសិកម្មរុក្ខាប្រមាញ់ និងនេសាទ និងក្រុមប្រឹក្សាអភិវឌ្ឍន៍កម្ពុជានៅឡើយទេ ខ្លះបានឆ្លៀតយកឱកាសនោះទៅធ្វើអាជីវកម្មឈើព្រៃទៅវិញដែលបញ្ហាទាំងនេះមិនមែនជាការអភិវឌ្ឍទេ តែវាជាការបំផ្លាញធនធានធម្មជាតិទៅវិញ គឺគិតតែពីកាប់ឈើអារលក់ធ្វើដើមទុនប្រៀបដូចធ្វើនំអត់មានម្សៅ។
សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាធ្លាប់បានមានប្រសាសន៍ថា យើងមិនអាចកាប់ព្រៃស្រោងដាំកៅស៊ូបានទេ ការធ្វើកសិកម្មបែបហ្នឹងអត់លេងចូលទេ ។ តំបន់ណាដែលអាចធ្វើកសិកម្មបានយើងធ្វើ ប៉ុន្ដែយើងមិនអាចទៅកាប់ឈើហ៊ុបធំៗ រួចហើយដាំដើមកៅស៊ូទេ។ សម្ដេចបានមានប្រសាសន៍យ៉ាងដូច្នេះកាលពីថ្ងៃទី១០ កុម្ភៈ កន្លងទៅ នៅក្នុងឱកាសចែកសញ្ញាបត្រដល់និស្សិតកសិកម្ម។ សកម្មភាពដឹកជញ្ជូនឈើយ៉ាងគគ្រឹកគគ្រេងដែលខាងជំនាញរដ្ឋបាលព្រៃឈើអះអាងថាមានច្បាប់នោះ នាពេលបច្ចុប្បន្នសំរាប់ខេត្ដសៀមរាបត្រូវបានគេមើលឃើញថា វាបានកើតឡើងជាហូរហែដែរ ។ ប៉ុន្ដែករណីការដឹកជញ្ជូនឈើរបស់ក្រុមហ៊ុន «កម្ពុជា-វៀតណាម» មកពីខេត្ដ ក្រចេះនេះអាចចាត់ទុកថា ជាសកម្មភាពដឹកជញ្ជូនឈើជាលក្ខណៈទ្រង់ទ្រាយគួរឱ្យព្រួយបារម្មបំផុតចំពោះធនធានធម្មជាតិដែលជារតនៈសម្បត្ដិដ៏មានតម្លៃរបស់ជាតិយើង ៕
ចែករំលែកព័តមាននេះ